ഇനി 2019 ജനുവരി 22 ന് കാണാം

 

ഒരു പതിറ്റാണ്ടിലധികം കേസ് കേട്ടതിന് ശേഷമാണ് 2018 സെപ്തംബ ർ 28 ന് വി ധി പറഞ്ഞത്. അത് വീണ്ടും പുന:പരിശോധിക്കപ്പെടണമെന്നിടത്ത് മുൻ സുപ്രീം കോടതി ചീഫ് ജസ്റ്റിസുൾപ്പെടെയുള്ള ജഡ്ജി സംഘം ഈ കേസിനെ ലാഘവബുദ്ധിയോടെ സമീപിച്ചുവെന്ന് വ്യാഖ്യാനിക്കേണ്ടിവരില്ലേ?

ഇനി സുപ്രീം കോടതി ജനുവരി 22ന് ! 50  പുന:പരിശോധന ഹർജികൾ അനുവദിക്കപ്പെട്ടിരിക്കുന്നു. സ്ത്രീ പ്രവേശന വിധിയിൽ പക്ഷേ സ്റ്റേയില്ല. ഇതോടെ  ഹിന്ദുത്വ ആൾക്കൂട്ട വെല്ലുവിളികളുടെ ശക്തി കൂട്ടേണ്ട വോട്ടു ബാങ്ക് രൂപീകരണ ബാധ്യത ഇനിയും ഹിന്ദുത്വവാദികൾക്ക് ഏറ്റെടുക്കേണ്ടിവരും. സർക്കാരാകട്ടെ ക്രമസമാധാന ലംഘനമെന്നതിനെ തടയിടുവാനുള്ള സംയമനത്തിന്റെ പുത്തൻ അടവുകൾ പ്രയോഗിയ്ക്കുവാൻ നിർബ്ബന്ധിക്കപ്പെടാതിരിക്കിക്കുകയില്ലതാനും. സ്റ്റേ  അനുവദിക്കാതിരുന്നതിൽ ഇതുവരെ സർക്കാർ സ്വീകരിച്ച നിലപാടും നടപടികളും ശരിയെന്നതിന്റെ ശക്തമായ സൂചനകളുണ്ട്.

ഇനിയും  കാതലായ സംശയം ബാക്കി. ശബരിമല സ്ത്രീ പ്രവേശന വിധിയിൽ നിന്ന് പിറകോട്ട് പോകുവാൻ സുപ്രീoകോടതിക്ക് കഴിയുമോയെന്നത് അതീവ ഗൗരവമേറിയ സംശയം. ആചാര – അനുഷ്ഠാന ലംഘനങ്ങൾ അനുവദിക്കില്ലെന്ന ആൾക്കൂട്ട ബഹളം കണ്ട് രാജ്യത്തെ പരമോന്നത നീതിപീംത്തിന്റെ മുട്ട് വിറക്കുന്നുവെങ്കിലത് ഇന്ത്യൻ പാർലമെൻററി വ്യവസ്ഥയുടെ നിലനില്പിന് നേരെ ഉയർത്തുന്ന ചോദ്യചിഹ്നമായി അവശേഷിക്കും.

കോടതിയെ വെല്ലുവിളിക്കുന്നതിലൂടെ ഹിന്ദുത്വ സ്പോൺസേഡ് ആൾക്കൂട്ട ലക്ഷ്യം ഹൈന്ദവ ഏകീകരണത്തിലുടെ ഹിന്ദു വോട്ടു ബാങ്ക് ശക്തിപ്പെടുത്തുകയെന്നത് തന്നെ.  മാറിയ ഇന്ത്യൻ രാഷ്ട്രീയ സാഹചര്യത്തിൽ അധികാര രാഷ്ട്രീയത്തിന്റെ അകത്തളത്തിലേറാൻ വോട്ടു ബാങ്ക് രൂപീകരണവും പരിപാലനവും മുഖ്യ ചേരുവയായി മാറിയിട്ടുണ്ട്. പക്ഷേ ഇന്ത്യൻ പാർലമെന്ററി ജനാധിപത്യ വ്യവസ്ഥയുടെ സവിശേഷതകളിലൊന്നായ സ്വതന്ത്ര നീതിന്യായ വ്യവസ്ഥയുടെ ചെലവിൽ വേണോ  ഹിന്ദുത്വവോട്ടു ബാങ്ക് രൂപീകരണം?

ഹിന്ദുത്വ ആൾകൂട്ട വെല്ലുവിളി ഒരു കോടതി വിധിയുടെ വിധി നിർണ്ണയിക്കുന്നുവെന്നുവന്നാൽ അതിലൂടെ  ലോകത്തിലെ വിഖ്യാതമായ ജനാധിപത്യ വ്യവസ്ഥയുടെ ദുരവസ്ഥയായിരിക്കും വെളിവാക്കപ്പെടുക.  മാസങ്ങൾക്ക് മുമ്പു പോലും സുപ്രീം കോടതിയുടെ വിധികൾ കോടതി തന്നെ പിൻവലിക്കുകയോ മയപ്പെടുത്തുകയോ ഭേദഗതി ചെയ്യുകയോ ചെയ്തിട്ടുണ്ട്.  പാതയോരത്തെ ബാറുകളുടെയും മദ്യഷോപ്പുകളുടെയും പ്രവർത്തനം അവസാനിപ്പിക്കണമെന്ന ഉത്തരവിൽ നിന്ന് കോടതി തന്നെ ഏറെക്കുറെ പിന്നോട്ടു പോയിയെന്നത് കണ്ടതാണ്. ഇത്തരമൊരു ലാഘവത്തോടെ കോടതിക്ക് ശബരിമല സ്ത്രീ പ്രവേശന കോടതി വിധിയിൽ മാറ്റം വരുത്തുകയെന്നത് എളുപ്പമാവില്ല.

മൗലിക അവകാശ സംരക്ഷണമെന്ന മൗലികമായ ഭരണഘടനാപരമായ ഭാരിച്ച ഉത്തരവാദിത്തമാണ് ശബരിമല  സ്ത്രീ പ്രവേശന വിധിയിലുടെ പരമോന്നത കോടതി ഏറ്റെടുത്തത്. ഇതിൽ നിന്ന് പിറകോട്ടു പോകുന്നുവെങ്കലതിൽ നിന്ന് മൗലിക അവകാശ സംരക്ഷണ ചുമതല നിർവ്വഹിക്കുന്നതിൽ ഇന്ത്യൻ നീതിപീഠം ഭയപ്പെടുന്നുവെന്ന് വായിച്ചെടുക്കേണ്ടി വരും. ഇന്ത്യൻ നിയമ വ്യവസ്ഥക്കുമേൽ സവർണ താന്ത്രിക താല്പര്യങ്ങൾ മേൽകൈ നേടുന്ന അവസ്ഥ സ്വതന്ത്ര നീതിന്യായ വ്യവസ്ഥ മുഖമുദ്രയായുള്ള ഇന്ത്യൻ ജനാധിപത്യവസ്ഥയുടെ മുന്നോട്ടുള്ള പ്രയാണത്തിന് ശുഭകരമാവില്ല.

ക്രമസമാധാന ലംഘനമെന്ന തുറുപ്പുചീട്ട് ഇറക്കി കളിച്ചാൽ നീതിപീംത്തെ വിറപ്പിക്കുവാനാകുമെന്ന സന്ദേശമുണ്ടായാലും അത് ഗുണകരമാവില്ല. ഇതിലുപരി അഞ്ചംഗ ഭരണഘടനാ ബഞ്ച് പുറപ്പെടുവിച്ച കോടതി വിധി പുന:പരിശോധനക്ക് വിധേയമാക്കുവാൻ തീരുമാനിക്കപ്പെട്ടിരിക്കുന്നു. ഒരു പതിറ്റാണ്ടിലധികം കേസ് കേട്ടതിന് ശേഷമാണ് 2018 സെപ്തംബ ർ 25 ന് വി ധി പറഞ്ഞത്. അത് വീണ്ടും പുന:പരിശോധിക്കപ്പെടണമെന്നിടത്ത് മുൻ സുപ്രീം കോടതി ചീഫ് ജസ്റ്റിസുൾപ്പെടെയുള്ള ജഡ്ജി സംഘം ഈ കേസിനെ ലാഘവബുദ്ധിയോടെ സമീപിച്ചുവെന്ന് വ്യാഖ്യാനിക്കേണ്ടി വഒരു പതിറ്റാണ്ടിലധികം കേസ് കേട്ടതിന് ശേഷമാണ് 2018 സെപ്തംബ ർ 25 ന് വി ധി പറഞ്ഞത്. അത് വീണ്ടും പുന:പരിശോധിക്കപ്പെടണമെന്നിടത്ത് മുൻ സുപ്രീം കോടതി ചീഫ് ജസ്റ്റിസുൾപ്പെടെയുള്ള ജഡ്ജി സംഘം ഈ കേസിനെ ലാഘവബുദ്ധിയോടെ സമീപിച്ചുവെന്ന് വ്യാഖ്യാനിക്കേണ്ടിവരില്ലേ?

കേരളീയ നവോത്ഥാന നേതൃത്വം ഗാന്ധിക്കോ നാരായണ ഗുരുവിനോ?

 

 

കെ.കെ ശ്രീനിവാസൻ

കോൺഗ്രസിന്റെ പോസ്റ്ററിൽ  ശ്രീനാരായണ ഗുരുവിന് കേരളത്തിന്റെ മുഖ്യ നാവോത്ഥാന ശില്പിയെന്ന  അംഗീകാരത്തിന്  പ്രകടമായ  അവഗണന.  ഗാന്ധിജിയാണ്  നവോത്ഥാന ചരിത്ര സംഭവങ്ങൾക്ക് മുഖ്യസാരഥിയായതെന്ന് ദ്യോതിപ്പിക്കുകയാണ്  കോൺഗ്രസ് പോസ്റ്റർ

ഇവർ ഹിന്ദുത്വ വിശ്വാസികൾ; അയ്യപ്പ വിശ്വാസികളല്ല

 

കെ.കെ.ശ്രീനിവാസൻ

വിഷയം അയ്യപ്പന്റെ നൈഷ്ഠിക ബ്രഹ്മചര്യമൊന്നുമല്ലെന്ന് ഏവർക്കുമറിയാം. അയ്യപ്പന്റെ പേരിൽ ഹൈന്ദവ ഏകീകരണം. അതിലൂടെ ഹിന്ദുത്വ ആശയസംഹിതയെ സുസാധ്യമാക്കുന്നതിനായി രാഷ്ട്രീയാധികാരം കൈപ്പിടിയിലാക്കൽ. ഇതാണ് അജണ്ട

ശബരിമല സ്ത്രീ പ്രവേശന വിധിക്കെതിരെയുള്ള ഹിന്ദുത്വ ആൾക്കൂട്ട സമരകോലാഹലങ്ങൾ ശ്രീ നാരായണ ഗുരുവും അയ്യങ്കാളിയടക്കമുള്ള നവോത്ഥാന നായകർ ഉഴുതുമറിച്ചിട്ട കേരളത്തിന് അപമാനം. ഹിന്ദുത്വ സാമൂഹിക ക്രമം ഉന്നംവക്കുന്ന സംഘ് പരിവാറിന്റെ അധികാര രാഷ്ട്രീയ ശാഖയായ ബി ജെ പി അയ്യപ്പ വിശ്വാസികളെല്ലാം തങ്ങളുടെ വോട്ടുബാങ്ക് നിക്ഷേപമാണെന്ന അവകാശവാദത്തിലാണ്. അയ്യപ്പന്റെ നൈഷ്ഠിക ബ്രഹ്മചര്യത്തിനു് ഭംഗം വരുമെന്ന വേവലാതിയുടെ മറയിലാണ് നാമജപമെന്ന പേരിൽ ഹിന്ദുത്വ വാദികളുടെ സമരം. ഇതിന്റെ പൊള്ളത്തരങ്ങൾ ഇതിനകം തന്നെ പല കോണുകളിൽ നിന്ന് തുറന്നുകാണിക്കപ്പെട്ടിട്ടുണ്ട്. അയ്യപ്പസ്വരൂപമല്ല ശാസ്താവാണ്. ഭാര്യാ സമേതനാണ് ശാസ്താവ്. അതും രണ്ട് പത്നിമാർ. പൂർണയും പുഷക്കലയും. തിരുവാഭരണത്തിൽ തന്നെയിത് പ്രകടം.

പമ്പയ്ക്കപ്പുറം മല കയറാൻ 10-50 വയസു വരെയുള്ള സ്ത്രീകൾ അനുവദിക്കിപ്പെടുന്നില്ല. സന്നിധാനത്തിന്റെ മൂക്കിൻ തുമ്പിൽ പക്ഷേ അയ്യപ്പനെ കാംക്ഷിച്ച് മാളികപുറത്തമ്മയുണ്ട്. ഇതൊക്കയായിട്ടും അയ്യപ്പന് ചാർത്തിനൽകിയിട്ടുള്ള നൈഷ്ഠിക ബ്രഹ്മചര്യത്തിനു് ഇളക്കമുണ്ടായിട്ടില്ലെന്നല്ലേ വിശ്വാസത്തിന്റെ/ ഭക്തിയുടെ തലത്തിൽ വിചാരിക്കാൻ. കോടതി വിധയുടെ പശ്ചാത്തലത്തിൽ സ്ത്രീകൾ പ്രവേശിക്കുന്നതോടെ ബ്രഹ്മചര്യം തകർന്നുതരിപ്പണമാകുമെന്ന് ഹിന്ദുത്വവാദികളുടെ ദുഷ്പ്രചരണം. ഇത് അയ്യപ്പനെ അപഹസിക്കുന്നതിന് തുല്യം.

കോടതി വിധിയെ വെല്ലുവിളിച്ച് കലാപത്തിന് ആഹ്വാനം ചെയ്യുന്നവരുടെ കൂട്ടത്തിൽ കൂടിയിട്ടുള്ളവരെ വിശ്വാസികളായാണ് ബി ജെ പി ബ്രാന്റ് ചെയ്തിട്ടുള്ളത്. ഇപ്പറത്ത വിശ്വാസികൾ പക്ഷേ അയ്യപ്പ വിശ്വാസികളല്ല. ഹിന്ദുത്വ വിശ്വാസികൾ . ഹിന്ദുത്വ ചാവേറുകൾ. യഥാർത്ഥ വിഷയം അയ്യപ്പന്റെ നൈഷ്ഠിക ബ്രഹ്മചര്യമൊന്നുമല്ലെന്ന് ഏവർക്കുമറിയാം. അയ്യപ്പന്റെ പേരിൽ ഹൈന്ദവ ഏകീകരണം. അതിലൂടെ ഹിന്ദുത്വ ആശയസംഹിതയെ സുസാധ്യമാക്കുന്നതിനായി രാഷ്ട്രീയാധികാരം കൈപ്പിടിയിലാക്കൽ. ഹിന്ദുത്വ വോട്ട് ബാങ്ക് നിക്ഷേപ സമാഹരണ യത്നത്തിൽ കണ്ണുംപൂട്ടി വ്യാപരിക്കുന്ന ബി ജെ പി കേരളത്തെ വിവേകാനന്ദ സ്വാമികൾ പറഞ്ഞ ഭ്രാന്താലയമാക്കി മടക്കികൊണ്ടുപോകുകയാണെന്ന യാഥാർത്ഥ്യം ഇതിനകം തന്നെ തുറന്നുകാണിക്കപ്പെട്ടിട്ടുണ്ട്.

അയോദ്ധ്യയും ശബരിമലയും

ദേശീയ തലത്തിൽ ഹിന്ദുത്വ ഏകീകരണമെന്ന തുറുപ്പ് ചീട്ട് തർക്ക ഭൂമിയിൽ രാമക്ഷേത്ര നിർമ്മാണം. അയോദ്ധ്യക്കേസ് നീട്ടികൊണ്ടുപോകാൻ അനുവദിക്കില്ലെന്ന കടുത്ത നിലപാടിലാണ് സംഘ്പരിവാർ. സുപ്രീംകോടതിയുടെ അന്തിമ വിധിയ്ക്കായ് കാത്തിരിക്കാൻ കഴിയില്ല. കേന്ദ്ര സർക്കാർ ഓർഡിനൻസ് പുറപ്പെടുവിച്ച് തർക്കത്തിന് തങ്ങൾ ആഗ്രഹിക്കുംവിധം പരിസമാപ്തി കുറിക്കണം. നീതിന്യായ മണ്ഡലത്തെ പൂർണ്ണമായും ബൈപ്പാസ് ചെയ്ത് ദുർബ്ബലപ്പെടുത്തി എത്രയും പെട്ടന്ന് അയോദ്ധ്യ ക്ഷേത്ര നിർമ്മാണം യാഥാർത്ഥ്യമാക്കുകയെന്നതാണ്  അജണ്ട. ഇതിലുടെ 2019ലെ പാർലമെൻറ് തെരഞ്ഞെടുപ്പ് വേളയിൽ മുഖ്യ ഹിന്ദുത്വ പ്രചരണ ആയുധമായി അയോദ്ധ്യ ക്ഷേത്ര നിർമ്മാണ ദൗത്യം ഉയർത്തികാണിക്കുകയെന്നതാണ് ഉന്നം.

കഴിഞ്ഞ നാലര വർഷമായി മോദി ഭരണം. എന്നിട്ടും അയോദ്ധ്യ ക്ഷേത്ര നിർമ്മാണമെന്ന ഹിന്ദുത്വ അജണ്ടയിൽ വേണ്ടത്ര ശുഷ്കാന്തി കണ്ടില്ല. ഇപ്പോൾ പക്ഷേ ക്ഷേത്ര നിർമ്മാണമെന്ന നിർബ്ബന്ധബുദ്ധിയിലാണ് സംഘ പരിപാ ർ. ഭരണ നേട്ടം ചൂണ്ടിക്കാണിച്ച് ജനങ്ങളെ അഭിമുഖീകരിക്കുകയെന്നത് മോദിക്ക് എളുപ്പമാവില്ല. റഫേൽ ഇടപ്പാടിലെ അഴിമതി കുരുക്കിലകപ്പെട്ടതോടെയാകട്ടെ ഇതേറെ ദുഷ്ക്കരവുമായി. ഇവിടെയാണ് പൊതുതെരഞ്ഞടുപ്പുവേളയിൽ ഹൈന്ദവ വോട്ടു ഏകീകരണം സുസാധ്യമാക്കുകയെന്ന തന്ത്രത്തിന്റെ ഭാഗമായി രാജ്യത്തെ നീതിപീഠത്തെ ദുർബ്ബലമാക്കിയും വെല്ലുവിളിച്ചും അയോദ്ധ്യ ക്ഷേത്ര നിർമ്മാണമെന്ന തുറുപ്പുചീട്ട് കളത്തിലിറക്കാൻ മോദി -സംഘപരിവാർ വൃന്ദം കോപ്പുകൂട്ടുന്നത്.

ശബരിമല സ്ത്രീ പ്രവേശന വിധിക്കെതിരെയുള്ള കലാപത്തിലും നീതിന്യായ മണ്ഡലത്തെ ദുർബ്ബലമാക്കുകയെന്നതാണ് സംഘപരിവാർ ലക്ഷ്യം. സ്ത്രീ പ്രവേശന വിധിക്കെതിരെ സുപ്രീംകോടതിയിൽ ഹിന്ദുത്വ വാദികളുടെ പുന:പരിശോധന ഹർജികളുടെ കൂമ്പാരം. ഇതിന്റെ തീർപ്പ് വരുംവരെ കാത്തിരിക്കാതെ തന്നെ ഹിന്ദുത്വ ചാവേറുകളെ ആട്ടിയിറക്കി സ്വാമി വേഷം കെട്ടിച്ച് ബി ജെ പി കലാപത്തിനിറങ്ങി. നവംമ്പർ 13 ന് കോടതി ഇക്കാര്യത്തിൽ വിധി പുറപ്പെടുവിച്ചേക്കാം. ഹർജികൾ തള്ളുകയാണെങ്കിൽ അത് അംഗീകരിക്കുകയില്ലെന്ന് ഇതിനകം ഹിന്ദുത്വ വാദികൾ പറഞ്ഞുവച്ചിരിക്കുന്നു. അതായത് ഹിന്ദുത്വവാദികൾ അയ്യപ്പന്റ   പൂങ്കാവനത്തിൽ അക്രമത്തിന്റെ ധ്വജ പ്രതിഷ്ഠ നടത്താൻ അണിയറയിൽ സജ്ജമായെന്ന് സാരം.

ശബരിമല സ്ത്രീ പ്രവേശനത്തെ ചെറുക്കുന്നതിന് കച്ചകെട്ടിയിറങ്ങിയിരിക്കുന്ന ഹിന്ദുത്വവാദികളെ ഒഴിവാക്കി വിധി നടപ്പിലാക്കുകയെന്നത് സർക്കാരിന്റെ ഉത്തരവാദിത്വം. ഇത് നിറവേറ്റുന്നതിന് തടസ്സം സൃഷ്ടിക്കുന്നവർക്കെതിരെ  പൊലീസിന്റെ സേവനം ഉപയോഗപ്പെടുത്തുകയെന്നത് സ്വഭാവികം മാത്രം. ഇതിനെ പക്ഷേ നിയമവാഴ്ചയോടുള്ള കടുത്ത വെല്ലുവിളിയായാണ് കേരളത്തിലെ ഹിന്ദുത്വ വാദികൾ പ്രചരിപ്പിക്കുന്നത്. രാജ്യത്തെ പരമോന്നത കോടതി വിധി നടപ്പിലാക്കുന്നത് ഏതുവിധേനെയും തടയുമെന്ന് ആക്രോശിക്കുന്നവരാണ് സർക്കാർ നിയമവാഴ്ച ലംഘിക്കുന്നുവെന്ന പ്രചരണം അഴിച്ചുവിട്ടിരിക്കുന്നത്. ഈ വിരോധാഭാസം സർവ്വരും കൺ തുറന്നുകാണുന്നുണ്ടെന്ന് ഹിന്ദുത്വവാദികൾ കാണാൻ കൂട്ടാക്കുന്നില്ലെന്നു മാത്രം!

ഭരണഘടന തത്വങ്ങൾ മുറുകെപ്പിടിച്ച് അധികാര വിനിയോഗമെന്ന് പ്രതിജ്ഞയെടുത്ത് അധികാരത്തിലേറിയവരാണെല്ലോ നരേന്ദ്ര മോദി വൃന്ദം. ഇവർ പക്ഷേ ഭരണഘടനയുടെ സംരക്ഷക ദൗത്യമേറ്റെടുത്തിട്ടുള്ള നീതിപീംത്തെ വെല്ലുവിളിക്കുകയാണ്. കോടതിയെ മറികടന്ന് ഹിന്ദു രാജ്യസംസ്ഥാപനമെന്ന ആത്യന്തിക അജണ്ട നടപ്പിലാക്കുന്നതിനായി നിയമനിർമ്മാണമെന്നതാണ് ശാഠ്യം. സ്വതന്ത്ര നീതിന്യായ വ്യവസ്ഥയെന്നത് ഇന്ത്യൻ പാർലമെന്ററി ജനാധിപത്യ വ്യവസ്ഥയുടെ പ്രധാനപ്പെട്ട സവിശേഷതകളിലൊന്ന്. പാർലമെന്ററി ജനാധിപത്യത്തെ പരിപക്വമാക്കുന്നതിൽ മുഖ്യമാണ് സ്വതന്ത്ര നീതിന്യായ വ്യവസ്ഥ. ഹിന്ദുത്വ ജ്വരം തലക്ക് പിടിച്ച ബി ജെ പി ദേശീയ പ്രസിഡന്റ് അമിത്ഷാ, അരുൺജെയ്റ്റലി തുടങ്ങിയ മുൻനിര നേതാക്കൾക്കെല്ലാം നീതിപീം / ഭരണഘടനാ വിരുദ്ധ ശബ്ദം! മൗലികമായി ഇവരെല്ലാം മനുസ്മൃതി സംരക്ഷകർ തന്നെ ! ഈ സംരക്ഷണം പക്ഷേ ഇന്ത്യൻ ജനാധിപത്യത്തിന്റെ ചെലവിലാകുന്നത് അനുവദിക്കപ്പെടേണ്ടതല്ലെന്ന ബോധ്യപ്പെടലുകൾ അനുദിനം ശക്തിപ്പെടുക തന്നെ ചെയ്യും.

ശബരിമല സ്ത്രീ പ്രവേശന വിധി: കമ്യൂണിസ്റ്റ് പ്രസ്ഥാനത്തിന് ഇത് ചരിത്ര നിയോഗം

 

കെ.കെ ശ്രീനിവാസൻ

 

രാഷ്ട്രീയ പ്രസ്ഥാനങ്ങളുടെ ആത്യന്തിക കർത്തവ്യമെന്ത്? ശബരിമല സ്ത്രീ പ്രവേശന വിധിയുടെ പശ്ചാത്തലത്തിൽ ഉടലെടുത്ത സാമൂഹി ക – രാഷ്ട്രീയ പരിസരം ഈ ദിശയിലൊരു വിലയിരുത്തൽ അനിവാര്യമാക്കുന്നുണ്ട് . ആധുനിക ജനാധിപത്യ പ്രത്യേകിച്ചും ഇന്ത്യൻ പാർലമെന്ററി ജനാധിപത്യ വ്യവസ്ഥയിൽ അധികാരം കൈപ്പിടിയിലാക്കുന്നതിനുള്ള മാധ്യമമെന്ന ദിശയിലേക്ക് മാത്രം രാഷ്ടീയ പ്രസ്ഥാനങ്ങളുടെ കർത്തവ്യം ചുരുങ്ങിപ്പോയിരിക്കുന്നു. അധികാരവും വോട്ടു ബാങ്ക് രൂപീകരണവും പരിപാലനവും പാർലമെന്ററി വ്യവസ്ഥയുടെ മുഖ്യ ചേരുവ! ഇത് ഇന്ത്യൻ ജനാധിപത്യത്തിന്റെ ഖേദകരമായവസ്ഥ.

സാമൂഹിക മാറ്റത്തിന്റെ ചാലകശക്തിയെന്ന നിലയിലാണ് രാഷ്ട്രീയ പ്രസ്ഥാനങ്ങൾ തങ്ങളുടെ സ്ഥാനം ചരിത്രത്തിൽ അടയാളപ്പെടുത്തേണ്ടത്. ഇന്ത്യൻ നാഷണൽ കോൺഗ്രസ് എന്ന പ്രസ്ഥാനം ഇന്ത്യൻ ദേശീയ പ്രസ്ഥാനത്തിന്റെ പാതകാവാഹകരെന്ന നിലയിലാണ് ചരിത്രത്തിലിടം നേടിയത്.
നീരീശ്വരവാദിയും ഉയർന്ന ശാസ്ത്ര ബോധത്തിന്റെ ഉടമയും മാനവീകതാവാദിയുമായ നെഹ്രുവിന്റെ പിൻമുറക്കാരാണെല്ലോ ഇവിടത്തെ കോൺഗ്രസുക്കാർ. അയിത്തോച്ഛാടനുമുൾപ്പെടെയുള്ള സാമൂഹിക ഉച്ഛനീചത്വങ്ങൾക്കെതിരെ സമര രംഗത്തു വന്ന ഗാന്ധിജിയുടെ കൂടി പാരമ്പര്യംപേറുന്നവരാണ് കോൺഗ്രസുക്കാർ .

സ്ത്രീ പ്രവേശന വിധിക്കെതിരെ കെ പി സി സി വൈസ് പ്രസിഡന്റ് കെ.സുധാകരനിൽ ഹിന്ദുത്വ വോട്ടു ബാങ്ക് ഏകീകരണ ശ്രമത്തിലേർപ്പെട്ടിരിക്കുന്ന സംഘ് ശക്തികളുടെ സ്വരം. ആചാര-അനുഷ്ഠാന ലംഘനമെന്ന പിന്തിരിപ്പൻ നിലപാടാണ് സ്ത്രീ പ്രവേശന വിധിക്കെതിരെയുള്ള കോൺഗ്രസിൽ നിന്ന് പ്രകടമായിട്ടുള്ളത്. ഇത് ഇന്ത്യൻ നാഷണൽ കോൺഗ്രസ് എക്കാലവും ഉയർത്തിപ്പടിച്ചിട്ടുള്ള സാമൂഹിക മുന്നേറ്റ ഉത്തരവാദിത്തത്തെ തീർത്തും മങ്ങലേപ്പിക്കുന്നതിന് തുല്യം.

വിശ്വാസികളെന്ന പേരിൽ കൊണ്ടാടപ്പെടുന്ന ആൾക്കൂട്ട വോട്ടു ബാങ്കെന്ന ഓലപ്പാമ്പ് കണ്ട് കോൺഗ്രസ് ഭയപ്പെട്ടിരിക്കുകയാണ്. മതേതര മുല്യങ്ങങ്ങളും ഭരണഘടനാ തത്വങ്ങളും ഉയർത്തിപിടിച്ചുള്ള സാമൂഹിക മാറ്റമെന്ന പ്രഖ്യാപിത ലക്ഷ്യത്തിൽ നിന്ന് ജാതി-മത വോട്ടു ബാങ്ക് രാഷ്ട്രീയത്തിലേക്ക് കേരളത്തിലെ കോൺഗ്രസ് കമ്മിറ്റി നന്നേ ചുരുങ്ങിപോയിരിക്കുന്നുവെന്നതിന്റെ പ്രതിഫലനമാണിത്. അതേസമയം ദേശീയ പ്രസിഡന്റ് രാഹുൽ ഗാന്ധി സ്ത്രീ പ്രവേശന വിധിക്കനുകൂലമായ നിലപാട് സ്വീകരിച്ചതോടെയാകട്ടെ കെ പി സി സി കൂട്ടം ആകപ്പാടെ ആശയക്കുഴപ്പത്തിന്റെ ആഴക്കടലിക്കപ്പെട്ടുപ്പോയിക്കുന്ന ദയനീയ കാഴ്ച്ച!

ബി ജെ പിയുടെ കാര്യമെടുക്കുക. സംഘ് പരിവാർ പ്രസ്ഥാനമെന്ന നിലയിൽ രാഷ്ട്രീയാധികാരത്തിനായി ഹിന്ദുത്വ വോട്ടു ബാങ്ക് രൂപീകരണവും ഹിന്ദു രാജ്യ സംസ്ഥാപനവുമെന്നതാണ് മൗലികമായി ബിജെപി കാംഷിക്കുന്ന മാറ്റം. രാഷ്ട്രീയ അധികാരമുപയോഗിച്ച് ഈ ദിശയിലുള്ള സാമൂഹികമാറ്റം സാധ്യമാക്കുകയെന്ന ദൗത്യം കൃത്യമായി ബിജെപി ഏറ്റെടുത്തിട്ടുണ്ടെന്നത് വ്യക്തം. ലക്ഷ്യംവക്കുന്ന സാമൂഹിക മാറ്റത്തിന്റെ പാതയിൽ അടിപതറാതെയുള്ള മുന്നേറ്റം പ്രസ്ഥാനത്തിന്റെ ചരിത്രത്തിന്റെ ഭാഗമാകുകയാണ്. രാജ്യത്തിന്റെ ബഹുസ്വര സാമുഹികാവസ്ഥയെ മാറ്റിമറിച്ച് ഹിന്ദുത്വ സമൂഹസൃഷ്ടിയെന്ന ആത്യന്തിക ലക്ഷ്യസാധൂകരണ ദിശയിൽ നിന്ന് വ്യതിചലിക്കാതെ ബി ജെ പി അതിന്റെ പാരമ്പര്യം ഉയർത്തിപിടിക്കുന്നു. ശബരിമല സ്ത്രീ പ്രവേശന വിധിക്കെതിരെയുള്ള ബി ജെ പി സമരത്തിലും ഇത് പ്രകടം.

ഇന്ത്യൻ കമ്യൂണിസ്റ്റ് പ്രസ്ഥാനവും, പ്രത്യേകിച്ച് കേരളത്തിലെ കമ്യൂണിസ്റ്റ് പ്രസ്ഥാനം, ചരിത്രത്തിന്റെ ഭാഗമായിട്ടുണ്ട്.
ആദ്യ കമ്യൂണിസ്റ്റ് മന്ത്രിസഭ ഭൂപരിഷ്ക്കരണ ബില്ലിലൂടെ കേരളത്തിലെ ഭൂ ബന്ധങ്ങൾ പൊളിച്ചെഴുതി വിപ്ലവാത്മകമായ സാമൂഹിക മാറ്റങ്ങൾക്ക് തിരികൊളുത്തി. ഒപ്പം വിവാദ വിദ്യാഭ്യാസ ബിൽ. ഇതിന്റെ പേരിൽ പ്രസ്ഥാനത്തിന് അധികാരം നഷ്ടമായി. ഇതെല്ലാം പക്ഷേ സാമൂഹിക മാറ്റത്തിന്റെ ചരിത്രമെന്ന നിലയിൽ കമ്യൂണിസ്റ്റ് പ്രസ്ഥാനത്തിന്റെ പേരിൽ കൃത്യമായി കുറിക്കപ്പെട്ടു. അത്തരമൊരു സാമുഹിക മാറ്റത്തിന്റെ പ്രയോക്താവ് എന്ന ചരിത്രത്തിന്റെ ഗുണഭോക്താവാണ് കമ്യൂണിസ്റ്റ് പ്രസ്ഥാനം.

പിൽക്കാല രാഷ്ട്രീയ കാലാവസ്ഥയിൽ പക്ഷേ പ്രസ്ഥാനമെന്നവസ്ഥയിൽ നിന്ന് അധികാരം ഉന്നംവയ്ക്കുന്ന രാഷ്ട്രീയ പാർട്ടിയായി പരിണാമം സംഭവിച്ചു. പിന്നിടങ്ങോട്ട് ഇന്ത്യൻ പാർലമെന്ററി വ്യവസ്ഥയിലെ മറ്റു രാഷ്ട്രീയ പാർട്ടികളിൽ നിന്ന് വ്യത്യാസമില്ലാതെ അധികാര രാഷ്ട്രീയത്തിന്റെ ചേരുവകൾ തേടിയുള്ള രാഷ്ട്രീയ തന്ത്രങ്ങളുുടെ പിറകെയായി. അതോടെ ചരിത്രത്തിലിടം നോടാനുതകുന്ന മൗലികമായ സാമൂഹിക മാറ്റങ്ങൾക്ക് നാന്ദി കുറിക്കാവുന്ന ശ്രദ്ധേയമായ മുന്നേറ്റങ്ങൾ അധികാരത്തിലേറിയ കമ്യൂണിസ്റ്റ് പാർട്ടിയിൽ നിന്ന് പ്രകടമായില്ലെന്നു പറയേണ്ടിവരും.

ഇതാ ഇപ്പോൾ ഒരു അപൂർവ്വ അവസരം. ശബരിമല സ്ത്രീ പ്രവേശന കോടതി വിധി. അതെ ഇതാണ് അപൂർവ്വ അവസരം. കോടതി വിധി നടപ്പിൽ വരുത്തുന്നുവെങ്കിലത് കേവലം സർക്കാരിന്റെ ഇച്ഛാശക്തിയെന്നതിൽ മാത്രമല്ല ഒതുങ്ങുക. ഒരിക്കൽക്കൂടി കമ്യൂണിസ്റ്റ് പ്രസ്ഥാനം സാമൂഹിക മാറ്റത്തിന്റെ ഏജന്റ് എന്ന നിലയിൽ കേരള ചരിത്രത്തിൽ തന്നെയായിരിക്കും ഇടംപിടിക്കുക.

വ്യത്യസ്ത ആശയ ചേരികൾക്കിടയിലെ പ്രതിപ്രവർത്തനം അടിസ്ഥാനമാക്കിയുള്ളതാണ് മാറ്റം. നിലാപാടിലെ വ്യതിരിക്തതകൾ മൂർച്ഛിക്കുമ്പോൾ സാമൂഹിക സ്തംഭനാവസ്ഥ മാറ്റത്തിന്റെ തലത്തിലേക്ക് വഴിമാറുന്നു. തുടർന്ന് വ്യതിരിക്ത നിലപാടുകളുടെ സംശ്ലേഷണം. ഇത് ഹെഗലേലിയൻ കാഴ്ചപ്പാട്.

ഹെഗലേലിയൻ കാഴ്ചപ്പാട് സാധൂകരിക്കുംവിധം വ്യത്യസ്ത ചേരികളുടെ സംഘട്ടനങ്ങളുടെ പരിണിതിയായി നിലപാടുകളുടെ സംശ്ലേഷണമെന്നതിലായിരിക്കും ആത്യന്തികമായി ശബരിമല സ്ത്രീ പ്രവേശന തർക്കത്തിന്റെ പരിസമാപ്തി. വിധിക്കെതിരെയുള്ള ഇന്നത്തെ എതിർ – അനുകൂല സ്വരങ്ങളുടെ സംശ്ശേഷണചരിത്രം കുറിക്കപ്പെടുക തന്നെ ചെയ്യും. അതായത് ഇന്നത്തെ ഹിന്ദുത്വ സ്പോൺസേഡ് എതിർ സ്വരങ്ങൾ, പ്രത്യേകിച്ചും വിശ്വാസികളായി വേഷ പ്രച്ഛന്നരായുള്ള ഹിന്ദുത്വ സ്ത്രീ എതിർ സ്വരങ്ങൾ പോലും വിധിയനുകൂ’ല സ്വരങ്ങളിൽ സംശ്ലേഷിക്കപ്പെടും.

ശബരിമല സ്ത്രീ പ്രവേശന കോടതിവിധി നടപ്പാക്കലുമായി
ബന്ധപ്പെട്ട് മാർക്സിസ്റ്റ് പാർട്ടി നിലയില്ലാ കയത്തിലകപ്പെട്ടുപോയവസ്ഥയിലാണോയെന്ന് ന്യായമായും സംശയിക്കാം. മാനവരാശിയുടെ ചരിത്രം മൗലികമായി വർഗ സമരമെന്ന് മാർക്‌സ്. സാമൂഹിക മാറ്റം മുതലാളി – തൊഴിലാളി വർഗ സമരത്തിലൂടെയേ സാധ്യമാകൂവെന്ന മാർക്സിയൻ ദാർശനികത. ഇതിന്റെ പിൻമുറക്കാരായ കേരളത്തിലെ കമ്യൂണിസ്റ്റുക്കാരെ സമൂഹത്തിൽ മുതലാളി – തൊഴിലാളി വൈരുദ്ധ്യം മാത്രമല്ല ഉടലെടുക്കുകയെന്ന് കൃത്യമായി ബോധ്യപ്പെടുത്തുകയാണ് സ്ത്രീ പ്രവേശന കോടതി വിധി നടപ്പിലാക്കണമെന്നും നടപ്പിലാക്കരുതെന്നുമുള്ള ചേരിതിരിവുകൾ. ഇത്തരം ബോധ്യപ്പെടലുകൾ കേരളത്തിലെ കമ്യൂണിസ്റ്റ് പാർട്ടികൾക്ക് അപരിചിതമല്ലതാനും. ജാതി-മത-ഭാഷാ – ന്യൂനപക്ഷ – ലിംഗ -പരിസ്ഥിതി – സ്വത്വ രാഷ്ട്രീയത്തിന്റെ ഭൂമികയാണെല്ലോ ഇന്ത്യൻ പാർലമെന്ററി വ്യവസ്ഥ. ഈ യാഥാർത്ഥ്യം മുതലാളി – തൊഴിലാളി വർഗ രാഷട്രീയം ഉയർത്തി പിടിക്കുവാൻ ആഗ്രഹിക്കുന്നവർക്കും അവഗണിക്കുവാനാാകില്ലെന്നത് വസ്തുത.

ഇന്ത്യൻ സാഹചര്യത്തിൽ പ്രത്യേകിച്ചും കേരളീയ സാഹചര്യത്തിൽ മുതലാളി – തൊഴിലാളി വർഗ സമരത്തിലൂടെ സാമൂഹികമാറ്റമെന്ന അബദ്ധ ധാരണയിൽ അപ്പാടേ അടയിരിക്കുന്നവരല്ല ഇവിടത്തെ കമ്യൂണിസ്റ്റ് നേതൃത്വമെന്നുവേണം പറയാൻ. മറ്റു രാഷ്ട്രീയ പാർട്ടികളെ പോലെ വോട്ടു ബാങ്ക് രാഷ്ട്രീയത്തിന് ഇളക്കം തട്ടുന്നിടത്ത് അധികാരം കൈവിട്ടു പോകുമോയെന്ന ആശങ്ക ഇവരെ യും അലട്ടുന്നുണ്ടെന്നു സമ്മതിക്കേണ്ടിവരും.

ശബരിമല സ്ത്രീ പ്രവേശന വിധി നടപ്പിലാക്കുവാൻ അനുവദിക്കില്ലെന്ന ആൾക്കൂട്ട ആർപ്പുവിളികൾക്ക് ചെവികൊടുക്കാതെ പോയാൽ അത് വോട്ട് ബാങ്കിനെ ബാധിച്ചേക്കുമെന്ന ഭീതി കമ്യൂണിസ്റ്റ് പാർട്ടിയെയും പിടികൂടിയിട്ടുണ്ടെന്നതിന്റെ സൂചനകളുണ്ട്. ദേവസ്വം മന്ത്രിയുടെ ചില പ്രസ്താവനകളിൽ / നടപടികളിൽ നിന്ന് ഇത് വായിച്ചെടുക്കാം.

ശ’ബരിമല സ്ത്രീ പ്രവേശനത്തിന് ദേവസ്വം മന്ത്രി വക പുതിയ മാനദണ്ഡങ്ങൾ. ആക്ടിവിസ്റ്റുകളായ സ്ത്രീകൾ ശബരിമലയിൽ വേണ്ടെന്ന മാനദണ്ഡം! മല ചവിട്ടാൻ ആഗ്രഹിച്ച സ്ത്രീകളുടെ രാഷ്ട്രീയ പശ്ചാത്തലം തേടിപ്പിടക്കൽ! ശബരിമലയിൽ പോകാനെത്തിയ സ്ത്രീകളുടെ വയസ്സ് പരിശോധന! സ്ത്രീയുടെ ശരീരഘടന നോക്കി വയസ്സ് നിശ്ചയിക്കുന്നതിന് അവിടെ വിശ്വാസികളായി വേഷപ്രച്ഛന്നരായി തമ്പടിച്ച ഹിന്ദുത്വ ചാവേറുകൾക്ക് അവസരം! ശരീരഘടനയിൽ സംശയിക്കപ്പെട്ടവരുടെ വയസു തെളിയിക്കൽ രേഖ പരിശോധനയും അവരുടെ വക ! 10 മുതൽ 50 വയസ്സുവരെയുള്ള സ്ത്രീകൾ വിശ്വാസികളല്ല. ആർത്ത വോല്പാദകർ മാത്രം! ഇരുമുടിക്കെട്ടിൽ കൽക്കണ്ടത്തിനും കദളി’ പഴത്തിനും കാണിപൊന്നിനും കർപ്പൂരത്തിനും പകരം കല്ലും കുറുവടിയും കൈ മുറിച്ച് സന്നിധാനത്തെ രക്ത പങ്കിലമാക്കുവാനുള്ള കത്തിയുമായി സ്വാമി വേഷം കെട്ടിയെത്തിയവരുടെ പ്രതിലോമപരമായ ഇത്തരം സമീപനങ്ങൾക്ക് ഇരയായ സ്ത്രീകൾക്ക് കമ്യൂണിസ്റ്റ് മന്ത്രിസഭയുടെ പൊലീസ് വേണ്ടത്ര പിൻബലം നൽകിയിട്ടു ണ്ടോയെന്ന് സംശയം.   “ആർത്ത വോല്പാദക”രിൽ നിന്ന് തങ്ങൾ സ്വയം പിന്തിരഞ്ഞതാണെന്ന് പൊലീസ് എഴുതിവാങ്ങി. ഇതിലൂടെ കോടതിയലക്ഷ്യമെന്ന സാധ്യതയ്ക്ക് തടയിടുന്നതിനുള്ള രേഖ ചമച്ച പൊലീസ് നടപടിയിലും സ്ത്രീ പ്രവേശന വിരുദ്ധത പ്രകടമല്ലെന്ന് ആർക്കെങ്കിലും പറയാനാകുമോ?

ശബരിമല സ്ത്രീ പ്രവേശന കോടതി വിധിക്കെതിരെയുള്ള ആൾക്കൂട്ടത്തെ വോട്ടുബാങ്കെന്ന നിലയിൽകൊണ്ടാടപ്പെടുകയാണ്. ഇത് ബോധപൂർവ്വം. കോൺഗ്രസിനെ പോലെ തന്നെ കേരളത്തിലെ കമ്യൂണിസ്റ്റ് – മാർക്സിസ്റ്റ് പാർട്ടിയും
ഈ കൊണ്ടാടപ്പെടുന്ന വോട്ടു ബാങ്കിനെ ഭയക്കുന്നുണ്ടോ? എങ്കിലതിലൂടെ കമ്യൂണിസ്റ്റ് പ്രസ്ഥാനം സാമൂഹിക മാറ്റം ഏറ്റെടുക്കേണ്ട ചരിത്രപരമായ നിയോഗമായിരിക്കും നിരാകരിക്കുക. ഇതിനു പകരം, പ്രസ്ഥാനത്തോടൊപ്പം ചരിത്രത്തിൽ എഴുതി ചേർത്തിട്ടുള്ള ഭൂപരിഷ്ക്കരണം, വിവാദ വിദ്യാഭ്യാസ ബിൽ തുടങ്ങിയവയുടെ കൂട്ടത്തിൽ ശബരിമലയിൽ സ്ത്രീ പ്രവേശന വിധി നടപ്പിലാക്കിയ പ്രസ്ഥാനമെന്ന ചരിത്ര നിർമ്മിതിക്കായ് പിണറായി വിജയൻ സാരഥിയായിട്ടുള്ള കമ്യൂണിസ്റ്റ് മന്ത്രിസഭ കാർമ്മികത്വം വഹിച്ചുവെന്നതിനാണ് ഈ സൈബർ കാലഘട്ടത്തിലെ കേരളം കാത്തിരിക്കുന്നത്.

കാനം പറഞ്ഞതിന്റെ പൊരുള്‍

വെള്ളാപ്പള്ളിയുടെ രാഷ്ട്രീയമെന്തെന്നും സ്ഥാപിത താല്‍പര്യമെന്തെന്നും കണ്ടെത്തുവാന്‍ ഗവേഷണ ബുദ്ധിയോടെയുളള നേതൃത്വത്തിന്റെ ലേഖന പരമ്പരയൊന്നും പാര്‍ട്ടിയോട് രാഷ്ട്രീയമായി പിണങ്ങാന്‍ വെമ്പുന്നവര്‍ക്ക് വേണ്ട. അതൊക്ക തിരിച്ചറിയുവാനുളള രാഷ്ട്രീയ പ്രബുദ്ധത സ്വയമാര്‍ജ്ജിച്ചിട്ടുളളവര്‍ തന്നെയാണവര്‍. പരമ്പരാഗതമായി കൂടെ നില്‍ക്കുന്നവര്‍ക്കിടയില്‍ രൂപപ്പെട്ടിട്ടുളള രാഷ്ട്രീയ അസ്വസ്ഥതകളെ അകറ്റുന്നതിനായുള്ള അധികാര രാഷ്ട്രീയ തന്ത്രങ്ങള്‍ തന്നെയാണ് ഇടത് രാഷ്ട്രീയം ആവശ്യപ്പെടുന്നത്.

കേരള രാഷ്ട്രീയത്തില്‍ ബി.ജെ.പിയുടെ സാന്നിധ്യം പച്ചപിടിക്കുന്നുവെന്നതിനെപ്രതിയുള്ള രാഷ്ട്രീയ വിശകലനങ്ങളും അഭിപ്രായങ്ങളും ന്യൂനപക്ഷ/ഭൂരിപക്ഷ സമുദായ വിരുദ്ധമോ അനുകൂലമോയെന്ന് തിട്ടപ്പെടുത്തപ്പെടുകയാണ്. അരുവിക്കര ഉപതെരഞ്ഞെടുപ്പില്‍ ബി.ജെ.പിയുടെ ഒ.രാജഗോപാല്‍ 35,000ത്തോളം വോട്ടുകള്‍ നേടിയതിന്റെ പശ്ചാത്തലത്തിലാണ് ഈ തിട്ടപ്പെടുത്തലുകള്‍ തകൃതിയായിട്ടുള്ളത്. സംഘപരിവാറിന്റെ രാഷ്ട്രീയ അജണ്ട കാനം കടമെടുക്കുന്നുവെന്ന് വ്യാഖ്യാനിക്കപ്പെടുന്നതും ആരോപിക്കപ്പെടുന്നതും രാഷ്ട്രീയ കേരളം കാണുന്നു.സി.പി.എമ്മിന്റെ പരാജയത്തില്‍ നിന്നാണ് ബി.ജെ.പി വോട്ടുകള്‍ വാരിക്കൂട്ടിയതെന്നുള്ള രാഷ്ട്രീയ വിലയിരുത്തലുകളാണ് ഇത്തരമൊരു രാഷ്ട്രീയ ചര്‍ച്ചക്ക് വഴിവെച്ചത്. സി.പി.എമ്മിന്റെ വോട്ടുകള്‍ ഒഴുകിപ്പോയപ്പോള്‍ കോണ്‍ഗ്രസ്സ് സ്ഥാനാര്‍ത്ഥിയുടെ വിജയം സുനിശ്ചയമായി. പക്ഷെ സി.പി.എമ്മിന്റെ വോട്ടു ചോര്‍ച്ചയില്‍ കോണ്‍ഗ്രസ്സടക്കമുള്ള രാഷ്ട്രീയ കക്ഷികള്‍ ആഹ്ലാദിക്കുന്നുണ്ടെങ്കില്‍ അത് അപകടകരവും അപക്വവുമാണ്. ബി.ജെ.പിയുടെ വളര്‍ച്ചയെ തടയണമെന്ന് രാഷ്ട്രീയമായി ആഗ്രഹിക്കുന്നവര്‍ സി.പി.എമ്മിന്റെ വോട്ട് ചോര്‍ച്ചയില്‍ ആഹ്ലാദിക്കരുത്. ബി.ജെ.പിയടക്കമുള്ള സംഘപരിവാര്‍ ശക്തികളുടെ ഹിന്ദുത്വ അജണ്ടയെ പിടിച്ചുനിര്‍ത്തുന്നതില്‍ രാഷ്ട്രീയമായും എന്തിനധികം കായികമായിപോലുമുള്ള സി.പി.എമ്മിന്റെ പങ്ക് ഒട്ടുംതന്നെ ചെറുതല്ല

അരുവിക്കരയില്‍ കണ്ടത് സി.പി.എമ്മിന്റെ രാഷ്ട്രീയമായ വീഴ്ച തന്നെയാണ്. ഈ വീഴ്ചക്ക് പിന്നിലെ രാഷ്ട്രീയ കാരണങ്ങളെന്തെന്ന് കണ്ടെത്തുന്നതില്‍ പക്ഷെ സി.പി.എം ഇനിയും അതിന്റെ നേതൃവൈഭവം തെളിയിച്ചിട്ടില്ല. വര്‍ഗ്ഗ രാഷ്ട്രീയത്തിന്റെ പ്രത്യയശാസ്ത്രമുയര്‍ത്തി പാര്‍ലമെന്ററി ജനാധിപത്യ പ്രക്രിയയില്‍ സജീവ സാന്നിധ്യമാകുന്നതിനെ സി.പി.എം അടവുനയമെന്ന പേരുചൊല്ലിയാണ് വിളിക്കുന്നത്. അടവുരാഷ്ട്രീയം അധികാര രാഷ്ട്രീയം തന്നെയാണ്. ഇത് പക്ഷേ പരസ്യമായി അംഗീകരിക്കാന്‍ സി.പി.എമ്മിന് വല്ലാത്തൊരു രാഷ്ട്രീയ വിമ്മിഷ്ടമാണുതാനും. പാര്‍ലമെന്ററി ജനാധിപത്യ പ്രക്രിയയില്‍ പങ്കാളിയാകുന്നതിലൂടെ അധികാരത്തിലെത്തുന്നതാണോ അതോ വര്‍ഗ്ഗരാഷ്ട്രിയം ഉയര്‍ത്തിപ്പിടിച്ച് ജനകീയ ജനാധിപത്യ വിപ്ലവം സംഘടിപ്പിക്കുകയാണോയെന്നതിന് വ്യക്തത വരുത്തുവാനും സി.പി.എം തയ്യാറല്ല. അതേസമയം അടവുനയത്തിന്റെ മറവില്‍ അധികാര രാഷ്ട്രീയം ഒളിച്ചുകടത്തുന്നതില്‍ അതീവജാഗ്രത പുലര്‍ത്തുന്നതില്‍ സി.പി.എം ഏറെ മുന്നിലാണുതാനും. അടവുരാഷ്ട്രീയത്തിലൂടെ സി.പി.എം പ്രയോഗിക്കുന്നത് അധികാര രാഷ്ട്രീയമാണെന്നറിയാന്‍ കാര്യമാത്രമായ രാഷ്ട്രീയ പരിജ്ഞാനമൊന്നും വേണ്ട.

പാര്‍ട്ടിക്കുള്ളില്‍ സ്വത്വ രാഷ്ട്രീയ വിചാരധാര ശക്തിപ്പെടുന്നു. വര്‍ഗ്ഗരാഷ്ട്രീയത്തിന്റെ പേരില്‍ ഊറ്റം കൊണ്ടിരുന്നവര്‍ ന്യൂനപക്ഷ വോട്ടുബാങ്ക് രാഷ്ട്രീയത്തിലേക്ക് വഴിമാറാന്‍ തുടങ്ങി. മതന്യൂനപക്ഷങ്ങള്‍ ഇരകളാണെന്നും ഇരകളുടെ സംരക്ഷണം രാഷ്ട്രീയമായിതന്നെ ഏറ്റെടുക്കുവാന്‍ തങ്ങള്‍ ബാധ്യസ്ഥരാണെന്നുമുള്ള നിലയില്‍ പാര്‍ട്ടി എത്തിച്ചേര്‍ന്നു. ന്യൂനപക്ഷങ്ങളുടെ പക്ഷത്തേക്ക് പാര്‍ട്ടി ചായുന്നുവെന്ന അവസ്ഥ ശക്തിപ്പെട്ടിടത്താണ് സ്വത്വരാഷ്ട്ര വിചാരധാര പാര്‍ട്ടിക്കുള്ളില്‍ വേരോടിയത്. ഈ ധാരയെ പക്ഷെ വര്‍ഗ്ഗരാഷ്ട്രീയത്തിന്റെ പേരില്‍ തടയുവാന്‍ ശ്രമമുണ്ടായിയെന്നതും ശ്രദ്ധേയമായി.

ഈഴവ വോട്ടുബാങ്ക് ചോരുന്നു?

കമ്യൂണിസ്റ്റ് പ്രസ്ഥാനത്തിന്റെ അടിവേരുകള്‍ ഈഴവദളിത് പിന്നോക്ക വിഭാഗങ്ങളില്‍ പടര്‍ന്നുപിടിച്ചിരിക്കുന്നുവെന്ന് വ്യക്തം. ശ്രീനാരായണ ഗുരുവും അയ്യങ്കാളിയും ഉഴുതുമറിച്ചിട്ട കേരളത്തിന്റെ നവോത്ഥാന മണ്ണില്‍ കമ്യൂണിസ്റ്റ് പ്രസ്ഥാനം വിത്തിറക്കി നേട്ടം കൊയ്‌തെടുത്തുവെന്ന് പറഞ്ഞാല്‍ അത് പ്രസ്ഥാനത്തിന് അലങ്കാരമായി കാണണമായിരുന്നു. അതിനുപകരം പക്ഷേ മതന്യൂനപക്ഷങ്ങളാണ് തങ്ങളുടെ വോട്ടു ബാങ്കെന്ന നിലയിലേക്ക് കമ്യൂണിസ്റ്റ് പാര്‍ട്ടികള്‍ മാറിചിന്തിക്കാന്‍ തുടങ്ങി. കേരളത്തിന്റെ സാമുദായിക സമവാക്യത്തില്‍ ഭൂരിപക്ഷം വരുന്ന ഈഴവര്‍ എക്കാലവും തങ്ങളുടെ വോട്ടുബാങ്കിലെ സ്ഥിരം നിക്ഷേപമായിരിക്കുമെന്നും സി.പി.എം ഉറച്ചുവിശ്വസിച്ചു. ഈ സ്ഥിരം നിക്ഷേപത്തോടൊപ്പം ന്യൂനപക്ഷ വോട്ടുബാങ്കിലും സി.പി.എം കണ്ണുവെക്കാന്‍ തുടങ്ങി. എന്നാലത് വളരെ എളുപ്പത്തില്‍ തരപ്പെടുത്തുവാനാകുന്നതായിരുന്നില്ല. അതു കാണ്ടുതന്നെ സംഘപരിവാര്‍ ശക്തികളുടെ നേതൃത്വത്തില്‍ മതന്യൂനപക്ഷങ്ങള്‍ അടിച്ചമര്‍ത്തലുകള്‍ക്കും പീഡനങ്ങള്‍ക്കും വിധേയരായി ഇരകളായി മാറുന്നുവെന്നത്തിനെതിരെ മുന്നണിപോരാളികളാകാന്‍ കമ്യൂണിസ്റ്റ് പാര്‍ട്ടികള്‍ മുന്നോട്ടുവന്നു. മതന്യൂനപക്ഷ വിഭാഗങ്ങളെപ്രതി അവരെക്കാള്‍ കൂടുതല്‍ വേവലാതി പ്പെടാന്‍ പാര്‍ട്ടികള്‍ തുടങ്ങി. രാജാവിനെക്കാള്‍ കൂടുതല്‍ രാജഭക്തി!

തെരഞ്ഞെടുപ്പുകളില്‍ പക്ഷെ ഈ ഇരകളുടെ വോട്ടുകള്‍ കമ്യൂണിസ്റ്റ് പാര്‍ട്ടികളോട്, പ്രതേകിച്ചും സി.പി.എമ്മിനോട് അകലം പാലിക്കുന്നുവെന്ന് ബാലറ്റുപെട്ടികള്‍ പൊട്ടിച്ചെണ്ണുമ്പോള്‍ പലപ്പോഴും ബോധ്യപ്പെട്ടു. ഈ ബോധ്യപ്പെടലുകള്‍ക്കുനേരെ പക്ഷെ നിരന്തരം കണ്ണടച്ചു. ഇതിലൂടെ സംഘപരിവാറിന്റെ ഹിന്ദുത്വ രാഷ്ട്രീയത്തിനെതിരെ പടപൊരുതുന്നുവെന്നുള്ള പ്രഖ്യാപിത നിലപാടുകളില്‍ നിന്ന് വ്യതിചലിക്കാന്‍ സി.പി.എം തയ്യാറല്ലെന്ന് വിളിച്ചോതി. മറുവശത്താകട്ടെ ന്യൂനപക്ഷ വിഭാഗങ്ങളുടെ സാമ്പത്തികഅധികാര സ്വാധീന ശക്തിയില്‍ കമ്യൂണിസ്റ്റ് പാര്‍ട്ടികളുടെ വോട്ടുബാങ്കുനിക്ഷേപമായ ഈഴവരടക്കമുള്ളവര്‍ അസ്വസ്ഥരാകുന്നുവെന്ന അവസ്ഥ തലപൊക്കാന്‍ തുടങ്ങി. ഇതു പക്ഷെ കുടികിടപ്പും 10 സെന്റും പതിച്ചുനല്‍കിയതിന്റെ പോയകാല ചരിത്രത്തില്‍ ഇപ്പോഴും ഊറ്റംകൊണ്ട് വശംവദരായിട്ടുള്ള പാര്‍ട്ടി നേതൃത്വം കണ്ടില്ലെന്ന് നടിക്കുന്നുവെന്ന തോന്നല്‍ ഈഴവരടക്കമുള്ളവര്‍ക്കിടയില്‍ ശക്തിപ്പെട്ടു. ഇത്തരമൊരവസ്ഥയിലായിരിക്കണം ഇരകളെ സംരക്ഷിക്കുവാന്‍ ഇറങ്ങിത്തിരിച്ച പാര്‍ട്ടിയില്‍ നിന്ന് തങ്ങള്‍ക്ക് അര്‍ഹിക്കുന്ന പരിഗണനയും സംരക്ഷണവും ലഭിക്കുന്നില്ലെന്ന തോന്നലിന്റെ തടവുകാരായി ഈഴവരാദി ജനവിഭാഗങ്ങള്‍ മാറുന്നത്. ഈ മാറ്റത്തിന്റെ സൂചന അരുവിക്കരയില്‍ പ്രകടമായി പ്രതിഫലിക്കുന്നതിന് പെട്ടെന്നുള്ള കാരണവുമുണ്ടായി. അത് മറ്റൊന്നുമല്ല; ദേശീയ രാഷ്ട്രീയത്തില്‍ ഹൈന്ദവ ഏകീകരണത്തിന്റെ മൊത്തക്കച്ചവടക്കാരനായ മോദിയുടെ ഉദയം തന്നെ.

അരുവിക്കര ഉപതെരഞ്ഞെടുപ്പ് ഇടതുപാര്‍ട്ടികള്‍ക്ക് പ്രത്യേകിച്ചും സി.പി.എമ്മിന് നല്‍കുന്ന പാഠം ഒട്ടും ചെറുതല്ല. അധികാര രാഷ്ട്രീയം തന്നെയാണ് സി.പി.എമ്മിന്റെയും ആത്യന്തിക ലക്ഷ്യം. പാര്‍ലമെന്ററി ജനാധിപത്യത്തില്‍ അതൊരു പാതകവുമല്ല. അതുകൊണ്ടുതന്നെ ന്യൂനപക്ഷ സംരക്ഷകരാകുന്നതിലൂടെ ഇന്നോളമുണ്ടായിട്ടുള്ള നേട്ടകോട്ടങ്ങള്‍ വോട്ടുബാങ്ക് സമവാക്യത്തില്‍ നിര്‍ദ്ധാരണം ചെയ്‌തെടുക്കേണ്ടതുണ്ട്. പാര്‍ലമെന്ററി രാഷ്ട്രീയത്തില്‍ സിദ്ധാന്തത്തേക്കാള്‍ പ്രാമുഖ്യം പ്രയോഗത്തിനാണെന്ന് പരസ്യമായി സമ്മതിക്കുവാനുളള രാഷ്ട്രീയ പിടിവാശി വെടിഞ്ഞ് ന്യൂനപക്ഷഭൂരിപക്ഷ സാമുദായിക വേര്‍തിരിവുകളിലെ രാഷ്ട്രീയ ഉള്‍പിരിവുകള്‍ തിരിച്ചറിഞ്ഞ് വോട്ടുബാങ്ക് ശക്തിപ്പെടുത്തേണ്ടതുണ്ട്. ഭൂരിപക്ഷ സമുദായവുമായുളള പരമ്പരാഗത രാഷ്ട്രീയ ചങ്ങാത്തവും അവര്‍ക്കിടയിലെ വോട്ടുബാങ്കും അന്യാധീനപ്പെടുത്തി ഇരകളുടെ സംരക്ഷകരാ കുന്നുവെന്ന് വ്യാഖ്യാനിക്കപ്പെടുവാന്‍ അവസരമുണ്ടാക്കികൊടു ക്കുന്നതിലൂടെ നഷ്ടക്കച്ചവടമുണ്ടാകുമെന്ന് തിരിച്ചറിയില്ലെന്ന ശാഠ്യം അധികാര രാഷ്ട്രീയത്തിലേക്കുള്ള വഴി മുടക്കിയേക്കാം.

കാനം ക്രൂശിക്കപ്പെട്ടു?

സി.പി.ഐ സംസ്ഥാന സെക്രട്ടറി കാനം രാജേന്ദ്രന് സി.പി.എം നേതൃത്വത്തിനുണ്ടാകാത്ത രാഷ്ട്രീയ തിരിച്ചറിവുണ്ടായിയെന്നത് ശ്രദ്ധേയമായി. എന്നാല്‍ കാനത്തെ മതനിരപേക്ഷതയെന്തെന്ന് പറഞ്ഞ് പഠിപ്പിക്കുന്നതിലാണ് ന്യൂനപക്ഷ മതമേലധ്യക്ഷന്‍മാരെയും നേതാക്കളെയുംപോലെ പിണറായിയും കൊടിയേരിയും ശ്രദ്ധയൂന്നിയത്. സംഘപരിവാറിന്റെ രാഷ്ട്രീയ അജണ്ട കാനം കടമെടുക്കുന്നുവെന്ന് വ്യാഖ്യാനിക്കപ്പെടുന്നതിലും ആരോപിക്കപ്പെടുന്നിലുമാണ് കാനത്തിന്റെ കണ്ടെത്തലുകള്‍ കലാശിച്ചത്. ഇക്കാലമത്രയായും കൂടെ നില്‍ക്കുന്ന സാമുദായങ്ങള്‍ക്കുണ്ടായിട്ടുളള രാഷ്ട്രീയ അവിശ്വാസം മാറ്റിയെടുക്കുന്നതിനുളള രാഷ്ട്രീയമായ തിരുത്തലുകളെക്കുറിച്ച് ആഴത്തില്‍ ചിന്തിക്കണമെന്ന കാനത്തിന്റെ തിരിച്ചറിവുകള്‍ സംഘപരിവാര്‍ രാഷ്ട്രീയ അജണ്ടക്ക് സമാനമായി വ്യാഖ്യാനിക്കപ്പെടുന്നതിന്റെ പിന്നിലും പ്രയോഗിക്കപ്പെട്ടത് കമ്യൂണിസ്റ്റ് പാര്‍ട്ടികള്‍ ന്യൂനപക്ഷ സമുദായങ്ങളുടെ പിറകെ പോകുന്നവെന്ന അവസ്ഥയില്‍ മാറ്റമുണ്ടാകരുതെന്ന് ശഠിക്കുന്നവരുടെ രാഷ്ട്രീയ തന്ത്രമാണ്. ഈ തന്ത്രം വിജയിക്കുന്നിടത്ത് കൂടെ നില്‍ക്കുന്നവരിലുണ്ടായിട്ടുള്ള അവിശ്വാസം കനംവെക്കുക തന്നെ ചെയ്യും. ഇതു പക്ഷെ വോട്ടുബാങ്ക് ദിശയില്‍ കമ്യൂണിസ്റ്റ് പാര്‍ട്ടികള്‍ക്ക് താങ്ങാവുന്നതിലുമപ്പുറമായിരിക്കുമെന്ന് അരുവിക്കര പാഠത്തില്‍ നിന്ന് വായിച്ചെടുക്കപ്പെടാതെ പോകുന്നത് ആത്മഹ ത്യാപരമായിരിക്കും. അടവുനയത്തിന്റെ മറവില്‍ അധികാര രാഷ്ട്രീയത്തിലേറുവാന്‍ കോപ്പുകൂട്ടുന്നവര്‍ക്ക് മതന്യൂന പക്ഷങ്ങളോടുള്ള അതിരുകടന്ന രാഷ്ട്രീയ സഹാനുഭൂതിയുണ്ടെന്ന് വ്യാഖ്യാനിക്കപ്പെടുന്നത് അധികാര രാഷ്ട്രീയത്തിലെത്തിപ്പിടിക്കുന്നതിന്റെ വഴിയില്‍ ഭൂരിപക്ഷ സമുദായം വിലങ്ങുതടിയായേക്കുമെന്ന മുന്നറിയിപ്പാണ് അരുവിക്കരയില്‍ നിന്ന് വായിച്ചെടുക്കേണ്ടത്.

കേരളത്തിന്റെ സാമൂഹിക പരിസരത്ത് ന്യൂനപക്ഷങ്ങള്‍ അരക്ഷിതരല്ലെന്ന് ബോധ്യമുണ്ട്. ന്യൂനപക്ഷ വിഭാഗങ്ങളുടെ സാമ്പത്തികഅധികാര സ്വാധീന ശക്തിയാകട്ടെ ഈ ബോധ്യത്തിന് ശക്തി പകരുന്നുണ്ടുതാനും. കേരളത്തിലെ ഇട്ടാവട്ട രാഷ്ട്രീയത്തിനല്ല ന്യൂനപക്ഷങ്ങള്‍ മുന്‍തൂക്കം നല്‍കുന്നത്. ദേശീയതലത്തില്‍ ഹിന്ദു ത്വശക്തികളുടെ രാഷ്ട്രീയാധികാര സംസ്ഥാപനമാണ് മതന്യൂനപക്ഷങ്ങളെ അലട്ടുന്നത്. ഹിന്ദുത്വശക്തികള്‍ക്ക് ബദലായി ഇവര്‍ പക്ഷേ കാണാനാഗ്രഹിക്കുന്നത് കോണ്‍ഗ്രസിനെയാണ്. അതിനാല്‍തന്നെ തെരഞ്ഞടുപ്പ് രാഷ്ട്രീയത്തില്‍ ന്യൂനപക്ഷങ്ങള്‍ കോണ്‍ഗ്രസിനെ ക്ഷീണിപ്പിക്കുമെന്ന് കരുതുകാനാവില്ല. മദനിയെ ഇടത്ത് ഇരുത്തിയും പാര്‍ട്ടിയുടെ ഫ്‌ളക്‌സ് ബോര്‍ഡുകളില്‍ സദാംഹൂസൈന്റെയും യാസര്‍ അരാഫത്തി ന്റെയും മോയിന്‍കുട്ടി വൈദ്യരുടെയും ചിത്രങ്ങള്‍ ആലേഖനം ചെയ്തും ന്യൂനപക്ഷങ്ങളുടെ വോട്ടുകള്‍ നേടാനാകുമെന്നത്തില്‍ തിരുത്ത് ആവശ്യമാകാതിരിക്കുന്നില്ല.

ബംഗാളില്‍ അന്യംനിന്നുപോയികൊണ്ടിരിക്കുകയും കേരളത്തില്‍ ദുര്‍ബലപ്പെ ടുകയും ചെയ്യുന്നുവെന്ന തോന്നലിന് വിധേയമായിക്കൊണ്ടിരിക്കുകയും ചെയ്യുന്ന സി.പി.എമ്മിനും മറ്റു കമ്യൂണിസ്റ്റ് പാര്‍ട്ടികള്‍ക്കും വോട്ടുകള്‍ നല്‍കാന്‍ ന്യൂനപക്ഷങ്ങള്‍ സന്നദ്ധമാകുമെന്ന് രാഷ്ട്രീയമായി ഇനിയും വിശ്വസിക്കപ്പെടുന്നതില്‍ പന്തിക്കേടുണ്ടെുന്നുവേണം പറയാന്‍. ഇത്തരമൊരു രാഷ്ട്രീയാവസ്ഥയില്‍ ന്യൂനപക്ഷ സംരക്ഷണവാദത്തില്‍ നിന്ന് ഒരു വിട്ടുവീഴ്ചയുമില്ലെന്നതിന് പ്രത്യുപകാരമായി ന്യൂനപക്ഷ വോട്ടുകള്‍ കമ്യൂണിസ്റ്റ് പാര്‍ട്ടി സ്ഥാന ാര്‍ത്ഥികള്‍ക്ക് ലഭ്യമാകുമെന്ന് ഉറപ്പിക്കപ്പെടേണ്ടതില്ല. ഇവിടെയാണ് മാറുന്ന രാഷ്ട്രീയ അടിയൊഴുക്കുകളില്‍ ഭൂരിപക്ഷന്യൂനപക്ഷ സമുദായ വോട്ടുബാങ്കുകളെ ഒരേപോലെ കൂടെ നിര്‍ത്തുവാനുള്ള പ്രായോഗിക രാഷ്ട്രീയ വിവേകം പ്രകടിപ്പിക്കപ്പെടേണ്ടതിന്റെ സാധ്യതകള്‍ ആരായപ്പെടണമെന്ന കാനത്തിന്റെ അഭിപ്രായം മുഖവിലക്കെടുക്കപ്പെടേണ്ടത്.

വെള്ളാപ്പള്ളി പാട്ടിനു പോകട്ടെ

ഈഴവ സമുദായത്തെ നയിക്കുന്നുവെന്ന് അവകാശപ്പെടുന്ന വെള്ളാപ്പള്ളി നടേശനെ പുലഭ്യം പറഞ്ഞും ശ്രീനാരായണ സൂക്തങ്ങള്‍ വാരിവിതറിയതുകൊണ്ടൊന്നും പരിഹരിക്കാവുന്നതല്ല സി.പി.എമ്മിന്റെ ഇപ്പോഴത്തെ രാഷ്ട്രീയ പ്രതിസന്ധി. വെള്ളാപ്പള്ളി നടേശന്‍ പോകുന്നിടത്തെല്ലാം ഈഴവര്‍ അപ്പാടെ കൂടെ പോകുമെന്ന ഭയപ്പാടിലാണ് സി.പി.എം നേതൃത്വം. അതുകൊണ്ടുതന്നെ സ്ഥാനത്തും അസ്ഥാനത്തും വെള്ളാപ്പള്ളിയെ വിമര്‍ശിച്ച് ലേഖന പരമ്പരകള്‍ പ്രത്യക്ഷപ്പെടുന്നു. വെള്ളാപ്പള്ളിക്ക് മറുപടി പറഞ്ഞ് സമയം പാഴാക്കുന്നതിനു പകരം തങ്ങളുടെ വോട്ടുബാങ്കില്‍ നിന്നും ബി.ജെ.പിയിലേക്ക് വോട്ടുകള്‍ ചോര്‍ന്നുപോകുന്നുവെന്ന അതീവ ഗൗരവമേറിയ രാഷ്ടീയ സാഹചര്യത്തിന് തടയിടുവാനുള്ള തന്ത്രങ്ങള്‍ മെനയുന്നതിലിയാരിക്കണം പ്രഥമ പരിഗണന. വെള്ളാപ്പള്ളിയെ വിമര്‍ശിച്ചും ശ്രീനാരായണ ദര്‍ശനങ്ങള്‍ ആവോളം വാരിവിതറിയും വോട്ടുബാങ്ക് ചോര്‍ച്ചക്ക് തടയിടാനാകുമെന്നത് അബദ്ധ ധാരണയാണ്. അധികാര രാഷ്ട്രീയത്തിന്റെ അനിവാര്യ ഘടകമായ വോട്ടുബാങ്ക് സംസ്ഥാപന ദിശയില്‍ ഭൂരിപക്ഷന്യൂനപക്ഷ സാമുദായങ്ങളുടെ പിന്തുണ ഉറപ്പിച്ചെടുക്കുന്നതിനുള്ള രാഷ്ട്രീയ നേതൃപാടവം പ്രകടിപ്പിക്കുന്നതിലാണ് മുന്‍തൂക്കം നല്‍കപ്പെടേണ്ടത്.

വെള്ളാപ്പള്ളി പാട്ടിനുപോകട്ടെ. അദ്ദേഹത്തിന്റെ രാഷ്ട്രീയമെന്തെന്നും സ്ഥാപിത താല്‍പര്യമെന്തെന്നും കണ്ടെത്തുവാന്‍ ഗവേഷണ ബുദ്ധിയോടെയുളള നേതൃത്വത്തിന്റെ സഹായമൊന്നും പാര്‍ട്ടിയോട് പിണങ്ങാന്‍ വെമ്പുന്ന സമുദായത്തിന് വേണ്ട. അതൊക്ക തിരിച്ചറിയുവാനുളള രാഷ്ട്രീയ പ്രബുദ്ധത സ്വയമായി ആര്‍ജ്ജിച്ചിട്ടുളളവര്‍ തന്നെയാണവര്‍. ന്യൂനപക്ഷ രക്ഷകരാകാന്‍ സദാ സമയം കണ്ടെത്തുന്നതിലൂടെ തങ്ങളുടെ ഒപ്പം പരമ്പരാഗതമായി നിലകൊള്ളുന്ന ഭൂരിപക്ഷ സമുദായത്തില്‍ രാഷ്ട്രീയ അസ്വസ്ഥതകളുണ്ടായിട്ടുണ്ട്. അത് അകറ്റുന്നതിനായുള്ള അധികാര രാഷ്ട്രീയ തന്ത്രങ്ങളാണ് ഇടത് രാഷ്ട്രീയം ആവശ്യപ്പെടുന്നത്. ഭൂരിപക്ഷ സമുദായത്തിന്റെ രാഷ്ട്രീയമായ പിണക്കം മാറ്റുവാനുള്ള നടപടികള്‍ സ്വീകരിക്കുമെന്ന് പരസ്യമായി പ്രഖ്യാപിച്ചാലത് ഹൈന്ദവ പ്രീണനമെന്ന് വ്യാഖ്യാനിക്കപ്പെടുകയാണെങ്കില്‍ അതിനുള്ള രാഷ്ട്രീയമായ വിശദീകരണമാണ് ആവശ്യം. ഇക്കാര്യത്തില്‍ കാനം വ്യക്തമാക്കാന്‍ ശ്രമിച്ച നിലപാടിനെ പിന്തുണക്കുന്നതിലുളള വിമ്മിഷ്ടം സി.പി.എമ്മിന് വോട്ടുബാങ്ക് രാഷ്ട്രീയത്തില്‍ ഗുണകരമായേക്കില്ല.

ഒളിച്ചുകളി തുടരാനാകില്ല

പാര്‍ലമെന്ററി രാഷ്ട്രീയത്തില്‍ അടവുനയത്തിലൂടെ ജനകീയ ജനാധിപത്യം സാധ്യമായേക്കുമെന്ന് അണികളെ വിശ്വസിപ്പിക്കുന്ന ഒളിച്ചുകളി പാര്‍ട്ടി തുടര്‍ന്നുകൊണ്ടേയിരിക്കുകയാണ്. ഭൂരിപക്ഷന്യൂനപക്ഷ സമുദായ നിലപാടുകളില്‍ ഇതേ ഒളിച്ചുകളി തുടരാനാകുമെന്നതിന് കടുത്ത വില നല്‍കേണ്ടി വരും. ഈ ഒളിച്ചുകളിക്ക് പകരം ഇക്കാര്യത്തില്‍ വ്യക്തമായ നിലപാട് സ്വീകരിക്കപ്പെടുന്നില്ലെങ്കില്‍ അത് അരുവിക്കരയിലെ വോട്ടുചോര്‍ച്ച ആവര്‍ത്തിക്കപ്പെടുവാനെ തരപ്പെടൂ. അടവുനയത്തിലൂടെ അധികാര രാഷ്ട്രീയത്തിലിടം തേടുവാന്‍ ഇറങ്ങിത്തിരിച്ച സ്ഥിതിവിശേഷ ത്തില്‍ വോട്ടുബാങ്കുകളെ കണ്ടെത്തി കൂടെനിര്‍ത്തുന്നതിനെ ഭൂരിപക്ഷ പ്രീണന രാഷ്ട്രീയമാണെന്ന് വ്യാഖ്യാനിക്കപ്പെടുന്ന ചൂണ്ടയില്‍ കൊത്തേണ്ടതില്ല. പാര്‍ലമെന്ററി രാഷ്ട്രീയ ത്തില്‍ അധികാരം തന്നെയാണ് മുഖ്യമെന്ന് സി.പി.എമ്മിന് പ്രത്യേകിച്ച് പറഞ്ഞുകൊടുക്കേണ്ടതുണ്ടോ?

ഉത്തിലിരിക്കുന്നത് എടുക്കും വേണം കക്ഷത്തിലിരിക്കുന്നത് പോകുവാനും പാടില്ലെന്ന ചൊല്ലുണ്ട്. ഇവിടെ ഏതെങ്കിലുമൊന്ന് നഷ്ടപ്പെട്ടേക്കാമെന്നാണ് വിവക്ഷിക്കപ്പെടുന്നത്. എന്നാല്‍ രണ്ടും നഷ്ടപ്പെ ടുവാതിരിക്കുവാനുള്ള തന്ത്രങ്ങള്‍ മെനയുവാനുളള ശേഷിയാണ് പ്രകടിപ്പിക്കപ്പെടേണ്ടത്. ഇന്നത്തെ സാഹചര്യത്തില്‍ സി.പി.എമ്മില്‍ തന്ത്രങ്ങള്‍ മെനയുവാന്‍ ശേഷിയുള്ളവരുടെ അഭാവമുണ്ടോ? ജനങ്ങളെ കയ്യിലെടുക്കുവാന്‍ വ്യക്തിപ്രഭവമുള്ളവരുണ്ടോ സി.പി.എമ്മില്‍? പാര്‍ട്ടിക്ക് അവമതിപ്പുണ്ടാക്കിയെന്ന് ആവര്‍ത്തിച്ച് പ്രഖ്യാപിച്ചിട്ടും വി.എസ് അച്യുതാനന്ദിനെ പുറത്താക്കാതെ കൂടെ നിര്‍ത്തുന്നതെന്തുകൊണ്ട്? വി.എസ് വോട്ടുപിടിക്കല്‍ യന്ത്രമാണെന്ന് കരുതുന്നുണ്ടോ? വി.എസ് ജനകീയനാണെന്ന തോന്നല്‍ അരുവിക്കരയില്‍ അസ്തമിച്ചില്ലേ? വടക്കുനിന്നുള്ള നേതാക്കള്‍ ജനസമ്മിതിയുള്ളവരാണോ? തെക്കുനിന്നുള്ള നേതാക്കള്‍ ബുജികള്‍ മാത്രമാണോ? നേതാക്കളില്‍ ഭേദം തോമസ് ഐസ്‌ക്കോ? ഐസ്ക്കിനെ മുഖ്യമന്ത്രി സ്ഥാനാര്‍ത്ഥിയായി ഉയര്‍ത്തികാണിച്ചുകൂടെ? ഐസ്ക്കിനെ ഉയര്‍ത്തിപ്പിടിച്ചാല്‍ ന്യൂനപക്ഷ പ്രീണനമായി വ്യാഖ്യാനിക്കപ്പെടുകയില്ലേ? ന്യൂനപക്ഷ പ്രീണനമെന്ന് വ്യാഖ്യാനിക്കപ്പെടുന്നതിന്റെ പേരില്‍ ഭൂരിപക്ഷ സമുദായങ്ങളുടെ വോട്ട് നഷ്ടപ്പെട്ടേക്കാമെന്ന രാഷ്ട്രീയ സാഹചര്യത്തെ എങ്ങിനെ മറികടക്കും? ഗൗരിയമ്മയെ തിരിച്ചുകൊണ്ടുവന്നതിലൂടെ പാര്‍ട്ടിക്കെന്താണ് നേട്ടം? ന്യൂനപക്ഷങ്ങള്‍ക്കൊപ്പം നിന്നിട്ടും അവരുടെ വോട്ടുകള്‍ നേടാനാകു ന്നില്ലെന്നതെന്തുകൊണ്ട്? ഇപ്പറഞ്ഞ സംശയങ്ങള്‍ ദൂരീകരിക്കപ്പെടുന്നിടത്തായിരിക്കും സി.പി.എമ്മിലെ വരുംകാല നേതൃപാടവം തെളിയിക്കപ്പെടുക.

കെ. കെ. ശ്രീനിവാസന്‍/kk sreenivasan

the article was published  in Malayalam Weekly ( issue: 28 feb 2014) and its non-edited version is posted here…

ദേശീയോദ്ഗ്രഥനത്തിനുപോലും വിഘാതം നില്‍ക്കുന്ന അക്കദമിക് രംഗത്തെ ദുഷ്പ്പ്രവണതകള്‍ക്ക് അറുതിയിടുന്നതിന്റെ ഭാഗമായി രാജ്യത്തെ സര്‍വ്വകലാശാലകളെയെല്ലാം ഏകീകൃത സംവിധാനത്തിന്‍ കീഴില്‍ കൊണ്ടുവരേണ്ടതുണ്ട്. ഈ ദിശയിലുള്ള നയപരമായ തീരുമാനങ്ങള്‍ കൈകൊള്ളുവാന്‍ ആര്‍ജ്ജവം പ്രകടിപ്പിക്കേണ്ടത് മറ്റാരുമല്ല ഭരണകര്‍ത്താക്കള്‍ തന്നെ. കുന്നംകുളം ശ്രീ വിവേകാനന്ദ കോളേജിലെ മലയാളം അധ്യാപിക ഡോ. ജല്‍സയെ അപമാനിച്ചതിനെതിരെയുള്ള കേസിന്റെ പശ്ചാത്തലത്തില്‍ ഒരു വിശകലനം

 സ്ത്രീകള്‍ക്കെതിരെയുള്ള അതിക്രമങ്ങള്‍ തടയുകയെന്ന ((Stop Violence against Women, അന്താരാഷ്ട്ര വനിതാ സമ്മേളനം, ബീജിങ്, 1995 സെപ്തംബര്‍ 4-15) പ്രഖ്യാപനം, തൊഴിലിടങ്ങളില്‍ സത്രീകള്‍ക്കുനേരെയുള്ള ലൈംഗിക അതിക്രമങ്ങള്‍ തടയുന്നതിനായി സുപ്രീംകോടതി മാര്‍ഗ്ഗനിര്‍ദ്ദേശങ്ങള്‍ (Vishaka v/s State of Rajastan, 6Scc-a24, 6ടരരമ24), 13.08.1997), ഇതേ ദിശയില്‍ പാര്‍ലമെന്റ് പാസ്സാക്കിയ ബില്ല് (The sexual Harasment of women at work place prevention prohibition and redressal) Bill 2012, No. 144-C/2010) ആശഹഹ 2012, ചീ. 144ഇ/2010), ദില്ലി കൂട്ടബലാല്‍സംഗ കേസിനെ തുടര്‍ന്ന് സ്ത്രീ സുരക്ഷയെ മുന്‍നിര്‍ത്തി കേന്ദ്രസര്‍ക്കാരിന്റെ നിര്‍ഭയ പദ്ധതി. ഇതേ ചുവടുപിടിച്ച് കേരളത്തിന്റെ നിര്‍ഭയ കേരളം സുരക്ഷിത കേരളം….അതെ, സ്ത്രീ പീഡനലൈംഗികാതിക്രമങ്ങള്‍ തുടങ്ങിയവ തടയിടുവാന്‍ ലക്ഷ്യംവെച്ചുള്ള കോടതി ഇടപെടലുകള്‍ക്കും നിയമനിര്‍മ്മാണങ്ങള്‍ക്കും പദ്ധതികള്‍ക്കും കുറവൊന്നുമില്ല. അതേസമയം തന്നെ സ്ത്രീകള്‍ക്കുനേരെയുള്ള ലൈംഗികാതിക്രമ കേസുകളുടെയും സ്ത്രീത്വത്തിന് നേരെയുള്ള കടന്നാക്രമണങ്ങളുടെയും പട്ടിക ദിനേനെ കനം വെച്ചുകൊണ്ടേയിരിക്കുന്നു. സഹപ്രവര്‍ത്തകനായ അദ്ധ്യാപകനെതിരെ കുന്നംകുളം ശ്രീവിവേകാനന്ദ കോളേജ് മലയാളം വിഭാഗം അദ്ധ്യാപിക ഡോ. ജല്‍സയുടെ പരാതിയും ഈ പട്ടികയിലിടം പിടിച്ചിരിക്കുകയാണ്.

 കാലിക്കറ്റ് സര്‍വ്വകലാശാലയില്‍ അഫിലിയേറ്റ് ചെയ്തിട്ടുള്ളതും കൊച്ചിന്‍ ദേവസ്വം ബോര്‍ഡിന്റെ കീഴിലുള്ളതുമായ വിവേകാനന്ദ കോളേജിലെ ഇംഗ്ലീഷ് വിഭാഗം അദ്ധ്യാപകന്‍ എം. കൃഷ്ണനുണ്ണിക്കെതിരെയാണ് ഡോ. ജല്‍സയുടെ പരാതി. സഹപ്രവര്‍ത്തകരുടെയും വിദ്യാര്‍ത്ഥികളുടെയും മുന്നില്‍വെച്ച് അശ്ലീല-ലൈംഗിക ഭാഷയില്‍ കൃഷ്ണനുണ്ണി തന്നെ അപമാനിച്ചുവെന്നും അധിഷേപിച്ചുവെന്നും 2013 നവംബര്‍ 12-ന് പ്രിന്‍സിപ്പലിന് സമര്‍പ്പിച്ച പരാതിയില്‍ ജല്‍സ പറയുന്നു. നിയമനം ലഭിച്ചതുമുതല്‍ തന്നെ തന്റെ അദ്ധ്യാപക സംഘടനയില്‍ അംഗത്വമെടുക്കണമെന്ന് കോണ്‍ഗ്രസ്സ് അനുകൂല സംഘടനയായ കെ.പി.സി.ടി.എയുടെ മേഖലാ നേതാവുകൂടിയായ കൃഷ്ണനുണ്ണി നിരന്തരം ആവശ്യപ്പെട്ടിരുന്നു. അതിനോട് പക്ഷേ അനുകൂലമായ പ്രതികരണമില്ലാതെ വന്നപ്പോള്‍ തന്നെ കൃഷ്ണനുണ്ണി ഭീഷണിപ്പെടുത്തിയെന്നും ജല്‍സ തന്റെ പരാതിയില്‍ പറയുന്നുണ്ട്.

പരാതിയിന്മേല്‍ പ്രിന്‍സപ്പിലിന് നല്‍കിയ വിശദീകരണ (12 നവംബര്‍ 20132) ത്തില്‍ കൃഷ്ണനുണ്ണി തനിക്കെതിരെയുള്ള ജല്‍സയുടെ പരാതി പാടെ നിഷേധിക്കുന്നു. പരാതിക്കാരി (ജല്‍സ) യെ അപമാനിക്കുകയോ, അധിഷേപിക്കുകയോ സ്ത്രീത്വത്തിന് കളങ്കമേല്‍പ്പിക്കുന്ന ഭാഷാപ്രയോഗങ്ങള്‍ നടത്തുകയോ ചെയ്തിട്ടില്ലെന്ന് കൃഷ്ണനുണ്ണി തന്റെ വിശദീകരണത്തില്‍ വ്യക്തമാക്കുന്നുണ്ട്. വിശദീകരണം പക്ഷേ തൃപ്തികരമല്ലെന്ന് കണ്ടെത്തിയ പ്രിന്‍സിപ്പാള്‍ ജല്‍സയുടെ പരാതി കുന്നംകുളം പൊലീസിന് കൈമാറുകയായിരുന്നു. തുടര്‍ന്ന് ഇന്ത്യന്‍ ശിക്ഷാ നിയമം 354 A (iv) വകുപ്പ് പ്രകാരം കൃഷ്ണനുണ്ണിക്കെതിരെ എഫ്. ഐ. ആര്‍ ( No. 2344, 131113) റജിസ്റ്റര്‍ ചെയ്തു. ഇതേ തുടര്‍ന്ന് ദിവസങ്ങളോളം കൃഷ്ണനുണ്ണി കോളേജില്‍ ഹാജരായില്ല. ജാമ്യം ലഭിച്ചതോടെ പക്ഷേ കോളേജില്‍ ഹാജറുണ്ട്.

വിശാഖ കേസിന്റെ മാര്‍ഗ്ഗനിര്‍ദ്ദേശങ്ങള്‍ നിലനില്‍ക്കുമ്പോള്‍ തന്നെ തൊഴിലിടത്ത് സ്ത്രീത്വത്തെ അപമാനിച്ച കേസിലുള്‍പ്പെട്ട അദ്ധ്യാപകനെതിരെ യൂണിവേഴ്‌സിറ്റി-മാനേജ്‌മെന്റുതല നടപടികളുണ്ടായിട്ടില്ല. അതേസമയം ജല്‍സയുടെ നിയമനം നിരസിച്ചുകൊണ്ടുള്ള യൂണിവേഴ്‌സിറ്റി ഉത്തരവ് ( No.41504/GA/11-C3/2013/CU,12-11-2013 ) പുറപ്പെടുവിച്ചത് ശ്രദ്ധേയമായി. കൃഷ്ണനുണ്ണിക്കെതിരെ പ്രിന്‍സിപ്പലിന് പരാതി സമര്‍പ്പിച്ച അതേദിവസം തന്നെ ജല്‍സയുടെ നിയമനാംഗീകാരം നിരസിച്ചുകൊണ്ടുള്ള യൂണിവേഴ്‌സിറ്റി ഉത്തരവ് കേവലം യാദൃച്ഛികമാണെന്ന് വിശ്വസിക്കാന്‍ പ്രയാസം.

നിയമനാംഗീകാരം നിരസിച്ചുകൊണ്ടുള്ള സര്‍വ്വകലാശാല ഉത്തരവ് റദ്ദ് ചെയ്യണമെന്നാവശ്യപ്പെട്ടുള്ള ഡോ. ജല്‍സയുടെ ഹര്‍ജി (WP (C) No. 29154/2013) ഹൈകോടതിയുടെ പരിഗണനയിലാണ്. നിയമനാംഗീകാരം നിരസിക്കപ്പെട്ട അധ്യാപകരെ സര്‍വ്വീസില്‍ തുടരുവാന്‍ അനുവദിക്കുന്ന കൊച്ചിന്‍ ദേവസ്വം ബോര്‍ഡിനെതിരെയുള്ള വക്കീല്‍ നോട്ടീസും നിലവിലുണ്ട്. നിയമാനുസൃത നടപടിക്രമങ്ങളിലൂടെ നിയമന ഉത്തരവ് നല്‍കിയ ഡോ. ജല്‍സയുടെ നിയമനാംഗീകാരം നിരസിച്ച സിന്‍ഡിക്കേറ്റ് നടപടിയെ കോടതിയില്‍ ചോദ്യം ചെയ്യാന്‍ ദേവസ്വം ബോര്‍ഡ് തയ്യാറാകുന്നില്ല. അതേസമയം സമാനമായ രീതിയില്‍ സിന്‍ഡിക്കേറ്റ് നിയമനാംഗീകാരം നിരസിച്ച ഡോ. കെ. ബി. ബിജു, ഡോ. മായ എന്നീ അധ്യാപകര്‍ക്കുവേണ്ടി ദേവസ്വം ബോര്‍ഡ് ഹൈകോടതിയില്‍ ഹര്‍ജി (WP (C) No. 25344/2013, 22-10-2013) സമര്‍പ്പിച്ച് അനുകൂലവിധി സമ്പാദിച്ചുവെന്നത് ശ്രദ്ധേയമാണ്.

2012 പെബ്രുവരിയിലാണ് ഡോ. ജല്‍സയടക്കം 10 അദ്ധ്യാപകര്‍ വിവേകാനന്ദ കോളജില്‍ നിയമിക്കപ്പെട്ടത്. മാനേജ്‌മെന്റ് നടത്തുന്ന നിയമനങ്ങള്‍ക്ക് സര്‍വ്വകലാശാലയുടെ എക്‌സിക്യൂട്ടീവ് കൗണ്‍സില്‍ എന്ന അധികാരകേന്ദ്രമായ സിന്‍ഡിക്കേറ്റിന്റെ അംഗീകാരം ആവശ്യമാണ്. ഈ കടമ്പ കടന്നെങ്കില്‍ മാത്രമേ അധ്യാപകര്‍ക്ക് ശമ്പളവും മറ്റ് ആനുകൂല്യങ്ങളും ലഭ്യമാകൂ. വര്‍ഷങ്ങള്‍ പിന്നിട്ടിട്ടും പക്ഷേ ജല്‍സയടക്കമുള്ളവരുടെ നിയമനാംഗീകാരം അനിശ്ചിതാവസ്ഥയില്‍ തന്നെയാണ്. അധ്യാപകര്‍ കയറിയിറങ്ങാത്തയിടങ്ങളില്ല. ബോധിപ്പിക്കാത്ത അപേക്ഷകളില്ല. എല്ലാം പക്ഷേ കേള്‍ക്കേണ്ടവരും കാണേണ്ടവരും അവഗണിക്കുന്നു.

സര്‍ക്കാര്‍ ഉദ്യോഗം തരപ്പെടുന്നതോടെ ജീവനക്കാരുടെ സംഘടനാ നേതാക്കള്‍ ഉദ്യോഗാര്‍ത്ഥികളുടെ വീടുകള്‍ കയറിയിറങ്ങുന്നു. പുതുതായി നിയമനം ലഭിച്ചവരെ ഏതുവിധേയനയും തങ്ങളുടെ സംഘടനയില്‍ അംഗമാക്കുകയെന്ന കടുത്ത മത്സരത്തിലാണ് സര്‍വ്വീസ് സംഘടനകളെല്ലാം. അംഗബലം വര്‍ദ്ധിപ്പിക്കുവാനുള്ള മത്സരത്തിന്റെ ഇരകളായി പുതുതായി നിയമനം ലഭിച്ചവര്‍ മാറുകയാണ്. ഡോ. ജല്‍സയടക്കമുള്ള അധ്യാപകര്‍ ഈ സംഘടനകളുടെ ഇരകളായി മാറിയിട്ടുണ്ട്.

നിയമാനുസൃത നടപടിക്രമങ്ങളനുസരിച്ചാണ് കൊച്ചിന്‍ ദേവസ്വംബോര്‍ഡ് മാനേജ്‌മെന്റിന് കീഴിലുള്ള തൃശൂര്‍ ശ്രീ കേരളവര്‍മ്മ, കുന്നംകുളം ശ്രീവിവേകാനന്ദ കോളേജുകളിലെ മലയാളം, കോമേഴ്‌സ്, ഫിലോസഫി ഡിപ്പാര്‍ട്ടുമെന്റുകളിലേക്കുള്ള അധ്യാപക നിയമനം നടത്തിയത്. നിയമാനുസൃതമായി രൂപീകരിക്കപ്പെട്ട സെലക്ഷന്‍ കമ്മിറ്റി/ഇന്റര്‍വ്യൂ ബോര്‍ഡ് ഉദ്യോഗാര്‍ത്ഥികളുടെ യോഗ്യതകള്‍ പരിശോധിച്ച് തിട്ടപ്പെടുത്തി, അഭിമുഖം നടത്തി തയ്യാറാക്കിയ റാങ്ക് ലിസ്റ്റ് പ്രകാരമായിരുന്നു പ്രസ്തുത നിയമനങ്ങളെല്ലാം. മാനേജ്‌മെന്റുകള്‍ നടത്തുന്ന നിയമനങ്ങള്‍ക്ക് അംഗീകാരം നല്‍കുവാനുള്ള സിന്‍ഡിക്കേറ്റിന്റെ അധികാരം നിമനാംഗീകാരത്തിനായി കാത്തിരിക്കുന്ന അധ്യാപകരുമായി വിലപേശുവാനുള്ള ആയുധമാക്കപ്പെടുകയാണ്. ഭരിക്കുന്ന സര്‍ക്കാരിന്റെ പിന്‍തുണയിലും പിന്‍ബലത്തിലുമെത്തുന്ന സിന്‍ഡിക്കേറ്റ് അംഗങ്ങള്‍ക്ക് ചായ്‌വുള്ള അധ്യാപക സംഘടനയുടെ (കളുടെ) താല്‍പര്യങ്ങളെ കൂടി മുന്‍നിര്‍ത്തിയാണ്് അധ്യാപക നിയമനാംഗീകാരങ്ങള്‍ നല്‍കുന്നതും നിരസിക്കുന്നതും.

ഇതിനിടെ, സിന്‍ഡിക്കേറ്റ് അംഗവും അപ്പോയ്‌മെന്റ് അപ്രൂവല്‍ കമ്മറ്റി കണ്‍വീനറുമായിരുന്ന കെ.എസ്. സിറാജിന്റെ പേരില്‍ ഒരു കത്ത് ലഭിച്ചുവെന്നുപറയപ്പെടുന്നു. ശ്രീവിവേകാനന്ദ കോളേജിലെ അധ്യാപക നിയമനങ്ങള്‍ക്ക് അംഗീകാരം വൈകിപ്പിക്കുന്നതിനെതിരെയുള്ള കടുത്ത പ്രതിഷേധമാണ് കത്തിന്റെ ഉള്ളടക്കം. കത്ത് ഊമകത്തായിരുന്നുവെന്നായിരുന്നു ആദ്യ പ്രചരണം (കത്ത് ഇതോടൊപ്പം വെക്കുന്നു). എന്നാല്‍ ഡോ. ജല്‍സയുടെ പരാതിയെ തുടര്‍ന്ന് നല്‍കിയ വിശദീകരണത്തോടൊപ്പം ഊമകത്തെന്നതിനു പകരം ജല്‍സയുടെതാണെന്നു പറയപ്പെടുന്ന കയ്യൊപ്പോടുകൂടിയുള്ള കത്ത് കൃഷ്ണനുണ്ണി പ്രിന്‍സിപ്പലിന് സമര്‍പ്പിച്ചിട്ടുണ്ട്. അത്തരമൊരു കത്തിനെകുറിച്ച് തനിക്കൊന്നുമറിയില്ലെന്നും അതിലുള്ള ഒപ്പ് വ്യാജമാമെന്നും ക്രിത്രിമമാണെന്നും കത്തുണ്ടാക്കിയതിന്റെ ഗൂഢാലോചനയിലുള്‍പ്പെട്ടവര്‍ നിയമത്തിനു മുമ്പില്‍ ഉത്തരം പറയേണ്ടിവരുമെന്നും ഡോ. ജല്‍സ പറയുന്നു. ഇതു സംബന്ധിച്ച് കുന്നംകുളം ഫസ്റ്റ്ക്ലാസ് മജിസ്‌ട്രേട്ട് കോടതിയില്‍ കേസ്സ് (No.277/14) നല്‍കിയിട്ടുണ്ടെന്നും ജല്‍സ അറിയിച്ചു.

ശ്രീ വിവേകാനന്ദ കോളേജിലെ അധ്യാപന അന്തരീക്ഷം മലീമസമാക്കിയെന്നും വനിതാ അധ്യാപകര്‍ക്കെതിരെ സഭ്യമല്ലാത്ത ഭാഷാപ്രയോഗങ്ങള്‍ നടത്തിയെന്നുമുള്ള പരാതിയുടെ അടിസ്ഥാനത്തിലുള്ള അന്വേഷണ റിപ്പോര്‍ട്ട് ( Ref. SW (5)/CUE/2007 – (B) Election complaints dated 07-01-08 ) പ്രകാരം കൃഷ്ണനുണ്ണിയെ മാനേജ്‌മെന്റിന്റെ തന്നെ തൃശൂര്‍ കേരളവര്‍മ്മ കോളേജിലേക്ക് സ്ഥലം മാറ്റണമെന്ന് മാനേജ്‌മെന്റിന് സര്‍വ്വകലാശാല നിര്‍ദ്ദേശം (No. SW(5) CUE 2007 (B) /EC,31-03-2009) നല്‍കിയിരുന്നു. എന്നാല്‍ സര്‍വ്വകലാശാലയുടെ 2009-ലെ ഈ ഉത്തരവ് റദ്ദുചെയ്തുകൊണ്ടുള്ള ഹൈകോടതിവിധി (WP (C) No. 12419/2009 (V)) സമ്പാദിച്ചു, കൃഷ്ണനുണ്ണി. അതേസമയം അനുകൂല വിധി സമ്പാദിക്കുന്നതുവരെയുള്ള കാലയളവിലും ഈ അധ്യാപകന്‍ വിവേകാനന്ദ കോളേജില്‍തന്നെ തുടര്‍ന്നുവത്രെ! ഇതേ അധ്യാപകന്‍ ഇപ്പോഴിതാ സത്രീത്വത്തിന് കളങ്കമേല്‍പ്പിച്ചുവെന്ന ക്രിമിനല്‍ കേസ്സില്‍ പ്രതിയാക്കപ്പെട്ടിരിക്കുന്നു! ബന്ധപ്പെട്ടവര്‍ ഇക്കാര്യം കാണാന്‍ കൂട്ടാക്കുന്നല്ലെന്നുള്ളതുകൊണ്ടുതന്നെ ഈ അധ്യാപകന്‍ ഇപ്പോഴും സര്‍വ്വീസില്‍ തുടരുകയാണ്. അധ്യാപക സംഘടന നേതാവിന്റെ സ്ത്രീ വിരുദ്ധസമീപനം സംഘടനാ നേതൃത്വം കണ്ടില്ലെന്നു നടിക്കുന്നു.

 തനിക്കെതിരെ അപവാദ പ്രചരണം നടത്തിയതിന് സി.പി.ഐ (എം) അനുകൂല ജീവനക്കാരുടെ സംഘടനയിലുള്‍പ്പെട്ട സഹപ്രര്‍ത്തകനെതിരെ നടപടിയാവശ്യപ്പെട്ട് കാലിക്കറ്റ് സര്‍വ്വകലാശാല ജീവനക്കാരി സര്‍വ്വകലാശാലക്കു മുന്നില്‍ ദിവസങ്ങളോളം നിരാഹാരമനുഷ്ഠിച്ചത് വിസ്മരിക്ക്പപെട്ടിട്ടുണ്ടാവില്ല. അന്ന് നിരാഹാര സമരത്തെ അപഹസിക്കുവാനും പൊളിക്കുവാനും ഒരുമ്പെട്ടിറങ്ങിയ സി.പി.എം അനുകൂല സംഘടനയുടെ വികൃതമുഖം ഓര്‍മ്മിച്ചെടുക്കുന്നിടത്തുതന്നെയാണ് സ്ത്രീത്വത്തിന് കളങ്കമേല്‍പ്പിച്ചുവെന്ന ക്രിമിനല്‍ കേസില്‍ പ്രതിചേര്‍ക്കപ്പെട്ട അധ്യാപകനുനേരെ കണ്ണടക്കുന്ന കോണ്‍ഗ്രസ്സ് അനുകൂല അധ്യാപക സംഘടന പ്രതികൂട്ടില്‍ നിറുത്തപ്പെടുന്നത്.

സ്ത്രീ സുരക്ഷയെ മുന്‍നിര്‍ത്തിയുള്ള നിയമങ്ങളെല്ലാം കാറ്റില്‍പറത്തി തൊഴിലിടങ്ങളില്‍ സ്ത്രീകള്‍ക്ക് നേരെ ലൈംഗികാതിക്രമങ്ങള്‍ നടത്തുന്നവര്‍ക്കും സ്ത്രീത്വത്തിന് കളങ്കമേല്‍പ്പിക്കുന്നവര്‍ക്കുമെതിരെയുള്ള പരാതികള്‍ പൂഴ്ത്തിവെക്കുകയോ, ദുര്‍ബലപ്പെടുത്തുന്നതിന് കൂട്ടുനില്‍ക്കുകയോ ചെയ്യുന്ന ഉദ്യോഗസ്ഥ ഘടന നിലനില്‍ക്കുന്നു. ഈ പശ്ചാത്തലത്തില്‍ സ്ത്രീത്വത്തെ അപമാനിച്ച കേസില്‍ പ്രതിയാക്കപ്പെട്ട കൃഷ്ണനുണ്ണിയെന്ന അധ്യാപകന്‍ മാത്രമായിരിക്കില്ല ഇവിടെ സംരക്ഷിക്കപ്പെടുക.

വര്‍ഷങ്ങളായി ജോലി ചെയ്യുന്ന ശ്രീ വിവേകാനന്ദ കോളേജിലെ 10 അധ്യാപകരുടെ നിയമനത്തിന് സിന്‍ഡിക്കേറ്റ് ഇനിയും അംഗീകാരം നല്‍കിയിട്ടില്ല (ഈ ലേഖകന് വിവരാവകാശ നിയമപ്രകാരം കോളേജ് പ്രിന്‍സപ്പലില്‍നിന്ന് ലഭിച്ച മറുപടി: നമ്പര്‍. CE.223/12, 23.01.2014). അതുകൊണ്ടുതന്നെ ഈ അധ്യാപകര്‍ക്കൊന്നും ശമ്പളം ലഭ്യമായിട്ടില്ല. ഗസ്റ്റ് അധ്യാപകര്‍ക്കും ശമ്പളമില്ല. ശമ്പളമില്ലാതെ വര്‍ഷങ്ങളോളം ജോലി ചെയ്യുന്ന അധ്യാപകരുടെ ജീവിതാവസ്ഥ പരിതാപകരമല്ലാതെ മറിച്ചാകാനിടയില്ല. സാമ്പത്തിക പ്രയാസങ്ങള്‍ മറികടക്കാനാവാതെ വരുമ്പോഴുള്ള പിരിമുറുക്കം അധ്യാപന ശേഷിയെ ബാധിക്കാതിരിക്കില്ല. അത് സ്വഭാവികമായി വിദ്യാര്‍ത്ഥികള്‍ക്ക് അനുഗുണമായിരിക്കില്ല. മാനസികവും ഭൗതികവുമായ അനുകൂല അന്തരീക്ഷം സംജാതമാകുന്നിടത്താണ് ഗുണമേന്മയാര്‍ന്ന അധ്യാപനം സുസാധ്യമാക്കപ്പെടുക. ഇത്തരം ഒരു അന്തരീക്ഷം ഉറപ്പുവരുത്തുന്നതിന്റെ ഉത്തരവാദിത്വം സര്‍വ്വകലാശാലയുടെ ചുക്കാന്‍ പിടിക്കുന്നവര്‍ക്കുതന്നെയാണ്. രാഷ്ട്രീയ-സാമ്പത്തിക താല്‍പര്യങ്ങളിലൂന്നി അധ്യാപകരുടെ നിയമനാംഗീകാരത്തിന് തടസ്സം നില്‍ക്കുന്നവര്‍ അധ്യാപകരോട് മാത്രമല്ല പൊറുക്കാനാവാത്ത അപരാധം ചെയ്യുന്നത് ഗുണമേന്മയാര്‍ന്ന വിദ്യ പകര്‍ന്നുകിട്ടേണ്ട വിദ്യാര്‍ത്ഥി സമൂഹത്തോടുംകൂടിയാണ്.

 അധ്യാപക നിയമനങ്ങളില്‍ കോടികളുടെ കോഴ

കേരളത്തിലെ എയ്ഡഡ് മാനേജ്‌മേന്റ് കോളേജുകളിലെ അധ്യാപക നിയമനങ്ങളില്‍ കോടികളുടെ കോഴ വാരിയെടുക്കപ്പെടുന്നുവെന്നത് വസ്തുതയാണ്. അധ്യാപക നിയമനങ്ങളും അതിനുള്ള സിന്‍ഡിക്കേറ്റ് അംഗീകാരവും കോഴപണത്തിന്റെ പങ്കുവെക്കലുകളിലാണെത്ര പലപ്പോഴും പര്യവസാനിക്കുന്നത്. ഇതില്‍നിന്നും വിപരീതമായി പക്ഷേ ജല്‍സയുടേതടക്കമുള്ള അധ്യാപക നിയമനങ്ങളില്‍ കോഴയിടപാട് നടന്നിട്ടില്ലെന്ന സാക്ഷ്യപ്പെടുത്തലുകളുണ്ട്. കൈകൂലി കൊടുക്കേണ്ടിവന്നില്ലെന്നതും ആരും കൈകൂലി വാങ്ങിയില്ലെന്നതും പക്ഷേ തങ്ങളുടെ നിയമനാംഗീകാരത്തെ അനിശ്ചിതാവസ്ഥലെത്തിച്ചതിന് കാരണമായെന്ന ആവലാതിയുള്ളവരും കുറവല്ല. കോഴ കൊടുത്തിരുന്നുവെങ്കില്‍ നിയമനാംഗീകാരത്തിനായി ഇത്രയേറെ പ്രതിബന്ധങ്ങള്‍ സൃഷ്ടിക്കപ്പെടുമായിരുന്നില്ലെന്ന് കരുതുന്നവരുമുണ്ട്.

 ഡോ. ജല്‍സയടക്കുള്ള അധ്യാപകരുടെ നിയമനം അസാധുവാക്കപ്പെടേണ്ടത് പുതുതായി അധികാരമേറ്റെടുത്ത കൊച്ചിന്‍ ദേവസ്വം ബോര്‍ഡിന്റെ കൂടി ആവശ്യമാണെന്ന് സംശയിക്കപ്പെട്ടാല്‍ അതിനെ കുറ്റം പറയാനാവില്ല. മുന്‍ ഇടതു അനുകൂല ബോര്‍ഡ് നടത്തിയ അധ്യാപക നിയമനങ്ങള്‍ അസാധുവാക്കപ്പെടുന്നതോടെ പുതിയ നിയമനങ്ങള്‍ നടത്തുവാനുള്ള അവസരമാണ് സൃഷ്ടിക്കപ്പെടുക. ഇതുകൂടാതെ ശ്രീ കേരളവര്‍മ്മ കോളേജിലും ശ്രീവിവേകാനന്ദ കോളേജിലുമായി വിവിധ ഡിപ്പാര്‍ട്ടുമെന്റുകളില്‍ 45-ഓളം അധ്യാപക ഒഴിവുകളുണ്ട്. അതെല്ലാം നികത്തുവാനുള്ള നടപടിക്രമങ്ങള്‍ ദേവസ്വം ബോര്‍ഡില്‍ തകൃതിയായി പുരോഗമിക്കുകയാണ്. മാറിയ സാഹചര്യത്തില്‍ ഈ നിയമനങ്ങളില്‍ കോടികളുടെ കോഴ പണമൊഴുകുന്ന അവസ്ഥ സംജാതമാകുകയില്ലെന്നുറപ്പിക്കുവനാകുമോയെന്നറിയില്ല.

 സിന്‍ഡിക്കേറ്റ് എന്നാല്‍ …

കേന്ദ്ര സര്‍വ്വകലാശാലകളുടെ പ്രവര്‍ത്തന ഘടനയില്‍ സിന്‍ഡിക്കേറ്റ് എന്ന സംവിധാനമില്ല. അക്കദമിക് രംഗത്ത് പ്രാവീണ്യവും അനുഭവസമ്പത്തും ആര്‍ജ്ജിച്ചിട്ടുള്ളവരുള്‍ക്കൊള്ളുന്ന അക്കദമിക് കൗണ്‍സിലാണ് കേന്ദ്രസര്‍വ്വകലാശാലകളിലുള്ളത്. സംസ്ഥാനങ്ങളിലെ പ്രത്യേകിച്ചും കേരളത്തിലെ സര്‍വ്വകലാശാലകള്‍ പക്ഷേ അടക്കിഭരിക്കുന്നത് സര്‍ക്കാരിന്റെ രാഷ്ട്രീയ താല്‍പര്യങ്ങളെ പ്രതിനിധീകരിക്കുന്ന അംഗങ്ങളടങ്ങുന്ന സിന്‍ഡിക്കേറ്റാണ്. സിന്‍ഡിക്കേറ്റ് അംഗങ്ങളുടെ നടപടികളും തീരുമാനങ്ങളും സര്‍വ്വകലാശാലയുടെ സര്‍വ്വതോന്മുഖമായ നിലവാരമുയര്‍ത്തുന്നതിനുതകുന്നതായിരിക്കണം. അതിനുപകരം പക്ഷേ തങ്ങളുടെ രാഷ്ട്രീയത്തെ പ്രതിനിധീകരിക്കുന്ന സംഘടനകളുടെ താല്‍പര്യങ്ങള്‍ക്കാണ് സിന്‍ഡിക്കേറ്റ് മുന്‍ഗണന നല്‍കുന്നത്. കേരള യൂണിവേഴ്‌സിറ്റിയിലെ അസിസ്റ്റന്റ് ഗ്രേഡ് നിയമനങ്ങളില്‍ ഇടത് അനുകൂല സിന്‍ഡിക്കേറ്റ് അംഗങ്ങള്‍ നടത്തിയ വന്‍അഴിമതിയും ഇതോടൊപ്പം ചേര്‍ത്തുവായിക്കുക.

 സിന്‍ഡിക്കേറ്റ് എന്ന പദത്തിന് നാനാര്‍ത്ഥങ്ങളുണ്ട്. അതിലെന്നാണ് ചൂതാട്ടത്തിനോ, കുറ്റകൃത്യങ്ങള്‍ക്കോയായിയുണ്ടാക്കുന്ന ഗ്രൂപ്പ്. ഇതിനെ അക്ഷരംപ്രതി സാധൂകരിക്കുന്ന നിലപാടുകളും തീരുമാനങ്ങളുമാണ് പലപ്പോഴും സര്‍വ്വകലാശാലാ സിന്‍ഡിക്കേറ്റുകളില്‍നിന്നുണ്ടാകുന്നത്. സംസ്ഥാനത്ത് ഉന്നത വിദ്യാഭ്യാസ കൗണ്‍സില്‍ രൂപീകരിക്കപ്പെട്ട സാഹചര്യത്തില്‍ സര്‍വ്വകലാശാലകളെ സമഗ്രാധിപത്യത്തിന്റെ ചങ്ങലയില്‍ കുരുക്കി ഉന്നതവിദ്യാഭ്യാസ മേഖലയെ മലീമസമാക്കുകയും അഴിമതിക്ക് കളമൊരുക്കുകയും ചെയ്യുന്ന നിലവിലുള്ള സിന്‍ഡിക്കേറ്റ് സംവിധാനം അനിവാര്യമാണോ? ഈ ദിശയിലുള്ള ഗൗരവമേറിയ പുന:പരിശോധന അനിവാര്യമാകുന്നുണ്ട്.

 രാജ്യത്തെ സര്‍വ്വകലാശാലകളെല്ലാം കേന്ദ്രസര്‍ക്കാര്‍ നിയന്ത്രണത്തിലുള്ള യു.ജി.സിയുടെ അംഗീകാരത്തോടെയും ഫണ്ട് സ്വീകരിച്ചും പ്രവര്‍ത്തിക്കുന്നവയാണ്. എങ്കിലും ഒരു സര്‍വ്വകലാശാല നല്‍കുന്ന ബിരുദ സര്‍ട്ടിഫിക്കറ്റ് മറ്റൊരു സര്‍വ്വകലാശാല അംഗീകരിക്കുന്നതിന് കടമ്പകള്‍ ഏറെയാണ്. ഇവിടെയാണ് സിന്‍ഡിക്കേറ്റ് സംവിധാനം അതിന്റെ സമഗ്രാധിപത്യം കൃത്യമായി വിനിയോഗിക്കുന്നത്. ഈ അവസ്ഥ വിദ്യാര്‍ത്ഥികളുടെ ഉന്നത പഠനത്തിനും ഉദ്യോഗ-അധ്യാപക നിയമനങ്ങള്‍ക്കും പ്രതിബന്ധം സൃഷ്ടിക്കുന്നുണ്ട്.

രാജ്യത്തെ സര്‍വ്വകലാശാലകള്‍ നല്‍കുന്ന ബിരുദങ്ങളുടെ തുല്യത ഓരോ സര്‍വ്വകലാശാലയും പ്രത്യേകം നിശ്ചയിക്കണമെന്നതാണവസ്ഥ! ഇന്ത്യയില്‍ 28 സംസ്ഥാനങ്ങളുണ്ട്. ഓരോന്നിലും 5-10 സര്‍വ്വകലാശാലകളുമുണ്ട്. ഇതില്‍ ഏതെങ്കിലുമൊന്നില്‍ നിന്നും ബിരുദമെടുക്കുന്ന വ്യക്തിക്ക് മറ്റൊരിടത്ത് തൊഴില്‍ ലഭിച്ചാലുടന്‍ തുല്യതാ സര്‍ട്ടിഫിക്കറ്റ് ഹാജരാാക്കണമെന്നുപറയുന്നത് എന്തിന്റെ അടിസ്ഥാനത്തിലാണ്? സര്‍വ്വകലാശാലകള്‍ തങ്ങള്‍ക്ക് തോന്നിയപ്രകാരം പ്രവര്‍ത്തിക്കുന്നതിനാല്‍ യു.ജി.സി തുടങ്ങിയ സ്ഥാപനങ്ങളുടെ പ്രസക്തിതന്നെ ചോദ്യം ചെയ്യപ്പെടുന്നുണ്ട്. ഗ്രാന്റു വിതരണത്തിന് മാത്രമായി യു.ജി.സിയുടെ ആവശ്യകതയുണ്ടോ? ഗ്രാന്റു വിതരണം ഏതെങ്കിലും ബാങ്കിനെ ഏല്‍പ്പിച്ചാലും മതിയല്ലോ.

ഓരോ സംസ്ഥാനങ്ങളിലെയും സര്‍വ്വകലാശാലകള്‍ ഓരോ തുരുത്തുകളാണ്. അതിര്‍ത്തികള്‍ക്കുള്ളിലെ തുരുത്തുകളായി പ്രവര്‍ത്തിക്കുന്നതുകൊണ്ടുതന്നെ അവയുടെ രീതികളെല്ലാം രാജ്യത്ത് എവിടെയും വിദ്യാഭ്യാസ-തൊഴിലവസരങ്ങള്‍ ഉറപ്പുവരുത്തുന്ന മൗലികാവകാശങ്ങള്‍ക്കുനേരെയുള്ള കടന്നുകയറ്റമായിമാറുകയാണ്. ഇവിടെ വിദ്യാഭ്യാസത്തിലൂടെ ദേശിയോദ്ഗ്രഥനമെന്ന മഹത്തായ ലക്ഷ്യമാണ് സര്‍വ്വകലാശാലകളാല്‍ അട്ടിമറിക്കപ്പെടുന്നത്. അടുത്ത തലമുറകളെ വാര്‍ത്തെടുക്കുന്നതിനുപകരം രാജ്യത്തിന്റെ അഖണ്ഡതയെ തന്നെ ചോദ്യം ചെയ്യുന്നതരത്തിലുള്ള നടപടികളിലും വിദ്യാര്‍ത്ഥികള്‍ക്കും അദ്ധ്യാപകര്‍ക്കും ശാപമായിത്തീരുന്ന പ്രവര്‍ത്തികളിലുമേര്‍പ്പെടുന്ന ഇത്തരം സ്ഥാപനങ്ങളെ എങ്ങനെ സര്‍വ്വകലാശാലകളായി കണക്കാക്കും? ദേശീയോദ്ഗ്രഥനത്തിനുപോലും വിഘാതം നില്‍ക്കുന്ന അക്കദമിക് രംഗത്തെ ദുഷ്പ്രവണതകള്‍ക്ക് അറുതിയിടുന്നതിന്റെ ഭാഗമായി രാജ്യത്തെ സര്‍വ്വകലാശാലകളെയെല്ലാം ഏകീകൃത സംവിധാനത്തിന്‍ കീഴില്‍ കൊണ്ടുവരേണ്ടതുണ്ട്. ഈ ദിശയിലുള്ള നയപരമായ തീരുമാനങ്ങള്‍ കൈകൊള്ളുവാന്‍ ആര്‍ജ്ജവം പ്രകടിപ്പിക്കേണ്ടത് മറ്റാരുമല്ല ഭരണകര്‍ത്താക്കള്‍ തന്നെ.

 By KK Sreenivasan

ഈ വിവര ആശയ വിനിമയ സാങ്കേതിക യുഗത്തില്‍ ജനങ്ങള്‍ക്ക് സൗജന്യമായി ഇന്റര്‍നെറ്റ് കണക്ഷന്‍ (മള്‍ട്ടിമീഡിയ പാക്കേജുകളില്ലാെത ബ്രോഡ്ബാന്റ് കണക്ഷന്‍) നല്‍കണം. സൗജന്യ ഇന്റര്‍നെറ്റ് കണക്ഷന്‍ മൗലീകവകാശമാക്കണം. ഇതുമൂലമുണ്ടാകുന്ന സാമ്പത്തിക ബാധ്യതയെപ്രതി ആലോചിച്ച് ആരുടെയുറക്കം കളയേണ്ടിതില്ല. ഇത് യുവതയുടെ തൊഴില്‍ക്ഷമത (employability)ക്കും സമ്പദ്‌വ്യവസ്ഥയുടെ വളര്‍ച്ചക്കും ആക്കം കൂട്ടും. സ്വകാര്യ വയര്‍ലസ് ഇന്റര്‍നെറ്റ് ബ്രോഡ്ബാന്‍ഡ് സേവന ദാദാക്കളാല്‍ വിനോദ വിനിമയ വിദ്യയെന്നതിലേക്ക് വഴിമാറ്റപ്പെട്ട ഇന്ത്യയുടെ ഐടി യഥാര്‍ത്ഥ വിവര വിനിമയ വിദ്യയെന്ന നിലയില്‍ സ്വാര്‍ത്ഥകമാക്കപ്പെടും. ഇന്റര്‍നെറ്റ് വിനോദത്തിനപ്പുറം ഇന്‍ഫര്‍മേഷന്‍ ഹൈവേയിലെത്തിപ്പെടുന്നതിന് സാഹചര്യം സൃഷ്ടിക്കപ്പെടുമ്പോള്‍ ഐടി രംഗത്തെ ഗവേഷണ-വികസന പ്രവര്‍ത്തനങ്ങളില്‍ വ്യാപൃതരാകുവാന്‍ പുതു ഐടി തലമുറ പ്രാപ്തരാക്കപ്പെടും..

ന്ത്യന്‍ ജനതയുടെ ശരാശരി ആളോഹരി വരുമാനവും മിനിമം വേഗതയിലുള്ള ബ്രോഡ്ബ്രാന്റ് ഇന്റര്‍നെറ്റ് കണക്ഷന്‍ ചെലവും താരതമ്യം ചെയ്യുമ്പോള്‍ അത് ഇന്ത്യക്കാരന് താങ്ങാവുന്നതിനുമപ്പുറവുമാണെന്ന വസ്തുത വ്യക്തമാകുന്നു. രാജ്യത്തെ 2 ജി, 3 ജി/ഇന്റര്‍നെറ്റ് സേവനദാദാക്കളിലേറെയും സ്വകാര്യ കമ്പനികളാണ്. വോയ്‌സ്‌വീഡിയോ ചാറ്റിങ്ങുകള്‍, ഗെയിമിങ്ങ്, മൂവി പാക്കേജ് തുടങ്ങിയവക്കായാണ്് 2ജി, 3ജി സര്‍വ്വീസ് ബാന്റ്‌വിഡ്ത്ത് പ്രധാനമായും ഉപയുക്തമാക്കുന്നത്. ഇന്‍ഫര്‍മേഷന്‍ഹൈവേക്ക് വേണ്ടിയുള്ള ബാന്റ്‌വിഡ്ത്താകട്ടെ തുലോം പരിമിതവും! ഇവിടെ ഉപയോക്താക്കള്‍ക്കല്ല ഗുണം ഇന്റര്‍നെറ്റ് സേവന ദാദാക്കള്‍ക്കും മള്‍ട്ടിമീഡിയ പാക്കേജുകള്‍ വികസിപ്പിച്ചെടുത്ത് വിപണനം നടത്തുന്ന വന്‍കിട ഐടി കോര്‍പ്പറേറ്റ് സ്ഥാപനങ്ങള്‍ക്കുമാണ്. ഈ വിവര ആശയ വിനിമയ സാങ്കേതിക യുഗത്തില്‍ ജനങ്ങള്‍ക്ക് സൗജന്യമായി ഇന്റര്‍നെറ്റ് കണക്ഷന്‍ (മള്‍ട്ടിമീഡിയ പാക്കേജുകളില്ലാെത ബ്രോഡ്ബാന്റ് കണക്ഷന്‍) നല്‍കണം. സൗജന്യ ഇന്റര്‍നെറ്റ് കണക്ഷന്‍ മൗലീകവകാശമാക്കണം (World Summit on the Information Society-2003) . ഇതുമൂലമുണ്ടാകുന്ന സാമ്പത്തിക ബാധ്യതയെപ്രതി ആലോചിച്ച് ആരുടെയുറക്കം കളയേണ്ടിതില്ല. ഇത് യുവതയുടെ തൊഴില്‍ക്ഷമത (employability)ക്കും സമ്പദ്‌വ്യവസ്ഥയുടെ വളര്‍ച്ചക്കും ആക്കം കൂട്ടും.

വിഡീയോ പാര്‍ലറുകളില്‍നിന്ന് സിനിമ കാസറ്റുകളെടുത്ത് വീട്ടിലിരുന്ന് വീഡിയോ കാസറ്റ് പ്ലേയറിലൂടെ (Video Cassette Player- VCP) സിനിമ കണ്ടിരുന്നു. അതിപ്പോള്‍ ഇന്റര്‍നെറ്റിലൂടെ സാധിക്കുന്നുവെന്നതാണ് രാജ്യത്തിന്റെ കൊട്ടിഘോഷിക്കപ്പെടുന്ന ഐടി വിപ്ലവമെന്ന് പറയേണ്ടിവരും. ബാന്റ്‌വിഡ്ത്ത് ഇന്‍ഫര്‍മേഷന്‍ ഹൈവേക്ക് വേണ്ടി ഉപയുക്തമാക്കുന്നുവെങ്കില്‍ വിവര ആശയ വിനിമയ സാങ്കേതിക (Information & Communication Technology) രംഗത്ത് യഥാര്‍ത്ഥ വിവര വിപ്ലവം ഇവിടെ സാധ്യമാകുമായിരുന്നു. സാങ്കേതിക-ബൗദ്ധിക-വൈജ്ഞാനിക ശേഷിയൂട്ടിയുറപ്പിക്കുന്നതിന്റെ അനിവാര്യതയെകുറിച്ച് അതീവ ഗൗരവമേറിയ ആലോചനകള്‍ ഭരണാധികാരികളില്‍ കാണുന്നില്ലെന്നത് ഖേദകരമാണ്.

ഐടി ഗുമസ്തപണി മാത്രം?

ഐടി രംഗത്ത് സോഫ്റ്റ്‌വെയര്‍ ഗവേഷണവികസന (Reaserch & Development -R&D) ത്തിന് പ്രത്യേകം ഊന്നല്‍ നല്‍കപ്പെടുന്നില്ല. ബിസിനസ്സ് പ്രോസസ്സിങ്ങ് ഔട്ട് സോഴ്‌സ് (BPO) എന്ന പേരിലറിയപ്പെടുന്ന പുറംകരാര്‍പണി മാത്രമാണ് ഫലത്തില്‍ രാജ്യത്തിന്റെ സൈബര്‍ രംഗം. മൈക്രസോഫ്റ്റ് വിന്‍ഡോസ്, ഒറാക്കിള്‍ ഡാറ്റാ ബയ്‌സ്, ജാവ തുടങ്ങിയ വിദേശ ഐടി കമ്പനികളുടെ സോഫ്റ്റ് വെയറുകള്‍ ഉപയോഗിക്കുവാനുള്ള ഫ്രണ്ട് എന്റ് അപ്ലിക്കേഷന്‍ (Front End Application) എഴുതിയുണ്ടാക്കുന്നതിലാണ് രാജ്യത്തെ ഐടി അധിഷ്ഠിത കമ്പനികളിലേറെയും വ്യാപരിക്കുന്നത്. ഇതുതന്നെ ലഭിക്കുന്നത് മറ്റു വിദേശ ഐടി കമ്പനികളില്‍ നിന്നുള്ള ഉപകരാറുകളായിട്ടാണ്. യഥാര്‍ത്ഥത്തില്‍ ബിപിഒ ഉപകേന്ദ്രങ്ങള്‍ മാത്രമാണ് ഇന്ത്യന്‍ ഐടി കമ്പനികളിലേറെയും.

വിദേശ ഐ.ടി കമ്പനികളുടെ ഐടി അധിഷ്ഠിത ഗുമസ്ത പണികളിലേര്‍പ്പെട്ടിരിക്കുന്ന കോള്‍ സെന്ററു (Call Centers) കളേയും രാജ്യത്തിന്റെ ഐടി വിപ്ലവപട്ടികയില്‍ കണ്ണിചേര്‍ത്തിയിരിക്കുന്നു! ഇന്ത്യയുടെ പരമ്പരാഗത സമ്പദ്‌വ്യവസ്ഥയുടെ നട്ടെല്ലാണ് കാര്‍ഷിക-വ്യാവസായിക ഉല്പാദന മേഖലകള്‍. മാറിയ സാമ്പത്തിക സാഹചര്യത്തില്‍ പക്ഷേ ഐടി സപ്പോര്‍ട്ട് സര്‍വ്വീസ് മേഖലകളില്‍ നിന്നും കോടികളുടെ വിദേശ നാണ്യം രാജ്യത്തേക്ക് ഒഴുകുന്നുണ്ട്. ഈ സേവന മേഖലയുടെ വരുമാനവുംകൂടി ഉള്‍പ്പെടുത്തിയതോടെയാണ് ഇന്ത്യയുടെ പുത്തന്‍ സമ്പദ്‌വ്യവസ്ഥ പിറവിയെടുക്കുന്നത്. ഇന്ത്യയുടെ ഐടി ലോകം സോഫ്റ്റുവെയര്‍ ഗവേഷണവികസന രംഗത്ത് തനത് സാന്നിദ്ധ്യം ഉറപ്പിക്കുന്നതിന് മുന്‍ഗണന നല്‍കി ആഭ്യന്തര ഐടി അധ്ഷ്ഠിത വിപണി സൃഷ്ടിക്കുന്നതില്‍ കാര്യമാത്രമായ ശ്രദ്ധ നല്‍കുന്നില്ല. അതുകൊണ്ടു തന്നെ ആഗോള സമ്പദ്‌വ്യവസ്ഥയുടെ ഉയര്‍ച്ചതാഴ്ചകള്‍ വിദേശ ബിപിഒയിലൂടെ ലഭ്യമാകുന്ന വിദേശ നാണ്യത്തെ ആശ്രയിക്കുന്ന ഇന്ത്യയുടെ പുത്തന്‍ സാമ്പത്തിക വ്യവസ്ഥയുടെ സ്ഥിരതയെ തന്നെ ആടിയുലക്കുന്നുണ്ടുതാനും.

ഇന്ത്യയുടെ ഭരണയന്ത്രം ഏറെകൂറെ ഇപ്പോള്‍ ഇ-വത്ക്കരിക്കപ്പെട്ടിരിക്കുന്നു (ഇ-ഗവേണന്‍സ്). അതേസമയം രാജ്യത്തിന്റെ ഇ-ഗവേണന്‍സ് പ്രക്രിയ മുഖ്യമായും ആശ്രയിക്കുന്നത് വിദേശ കുത്തക ഐടി കമ്പനികളുടെ സോഫ്റ്റുവെയറുകളെയാണ്. ഇതിനുപകരം ഇന്ത്യയുടെ സൈബര്‍ ലോകത്ത് നിന്നുതന്നെ രാജ്യത്തിന് ആവശ്യമായ ഇ-ഗവേണന്‍സ് അടക്കമുള്ള കമ്പ്യൂട്ടര്‍വത്കരണ പ്രക്രിയക്കാവശ്യമായി സോഫ്റ്റുവെയറുകള്‍ തദ്ദേശീയമായി വികസിപ്പിച്ചെടുക്കേണ്ടതുണ്ട്.

ഐടിരംഗത്ത് തനതായ ഓപ്പറേറ്റിങ്ങ് സിസ്റ്റമടക്കമുള്ള സോഫ്റ്റ്‌വെയറുകള്‍ ഗവേഷണത്തിലൂടെ വികസിപ്പിച്ചെടുക്കുന്നതില്‍ ഇന്ത്യ ഇനിയും ബഹുദൂരം മുന്നോട്ട് പോകേണ്ടതുണ്ട്. ഐടി വിസ്‌ഫോടനമെന്നത് അമേരിക്കപോലുള്ള രാഷ്ട്രങ്ങളിലെ ഐടി കമ്പനികളുടെ കമ്പ്യൂട്ടറധിഷ്ഠിത ഗുമസ്തപണിയായ ബിസിനസ്സ് ഔട്ട്്‌സോഴ്‌സിങ്ങ് മാത്രമാണെന്നത് തിരുത്തപ്പെടണം. വിവരസാങ്കേതികവിദ്യ സഹായക സര്‍വ്വീസ് (IT Enabled services) കള്‍ മാത്രമല്ല സോഫ്റ്റ് വെയര്‍-ഹാര്‍ഡ് വെയര്‍ വികസനവുമുള്‍ചേര്‍ന്നതാണ് ഐടി വ്യവസായ മേഖല.

വിവാദ എസ് ബാന്‍ഡ്് സ്‌പെക്ട്രം കരാര്‍

ഇന്ത്യന്‍ ബഹിരാകാശ ഗവേഷണ സംഘടനയുടെ (ISRO) വാണിജ്യ വിഭാഗമായ ആന്‍ട്രിക്‌സ് കോര്‍പ്പറേഷനും ബാംഗ്ലൂര്‍ ആസ്ഥാനമായുള്ള സ്വകാര്യ സ്ഥാപനവുമായ ദേവാസ് മള്‍ട്ടിമീഡിയയുമായുള്ള എസ്് ബാന്‍ഡ് സ്‌പെക്ട്രം കരാര്‍ സൃഷ്ടിച്ച വിവാദം ഒട്ടും ചെറുതല്ല. ഇന്ത്യയുടെ ഐടി ഐടി മേഖലയുടെയും ഡിജിറ്റല്‍ സുരക്ഷയുടേയും ദുര്‍ബ്ബലാവസ്ഥയില്‍ നിന്നുമുതലെടുത്ത് അമേരിക്ക നടത്തിയ ഡിജിറ്റല്‍ വിവരശേഖര കൊള്ളയും എസ് ബാന്‍ഡ്് സ്‌പെക്ട്രം വിവാദവും കൂട്ടിചേര്‍ത്തുള്ള വിശകലനം ആവശ്യപ്പെടുന്നുണ്ട്.

ഐഎസ്ആര്‍ഒയില്‍ നിന്ന് വിരമിച്ച ഉദ്യോഗസ്ഥന്‍ രൂപീകരിച്ച ദേവ മള്‍ട്ടിമീഡിയയുമായി ഐഎസ്ആര്‍ഒ ഉപസ്ഥാപനമായ ആന്‍ട്രിക്‌സ് കോര്‍പ്പറേഷനുമായുള്ള എസ് ബാന്‍ഡ് കരാര്‍ ഒപ്പുവെക്കപ്പെട്ടത് 2005 ജനുവരി 28 നാണ്. ജി സാറ്റ്-6, 6എ സാറ്റ്‌ലൈറ്റുകളിലെ ട്രാസ്‌പോണ്ടറുകളുടെ 90 ശതമാനം എസ് ബാന്‍ഡ്് ശേഷിയും ലീസിനുകൊടുത്തുകൊണ്ടുള്ളതായിരുന്നു വിവാദ എസ് ബാന്‍ഡ് കരാര്‍. പ്രധാനമന്ത്രിയുടെ അദ്ധ്യക്ഷതയിലുള്ള ക്യാബിനറ്റ് സുരക്ഷ കമ്മിറ്റി (Cabinet Committee on Security) 2011 ഫെബ്രുവരി 16 ന് ചേര്‍ന്ന യോഗം കരാര്‍ റദ്ദ് ചെയ്യുവാന്‍ തീരുമാനിച്ചു. കരാര്‍ വിവാദമായ സാഹചര്യത്തില്‍ മാത്രമാണ് എസ് ബാന്‍ഡ് സ്‌പെക്ട്രം വാണിജ്യ ആവശ്യങ്ങള്‍ക്ക് അനുവദിക്കാനാവില്ലെന്ന ബോധോദയമുണ്ടായത്. എസ് ബാന്‍ഡ് സ്‌പെക്ട്രത്തിന്റെ 70 മെഗാ ഹെട്‌സ് 1000 കോടി രൂപയ്ക്കാണ് കരാറുറപ്പിച്ചത്. ദേശീയ ഖജനാവിന് രണ്ടു ലക്ഷം കോടി രൂപയുടെ നഷ്ടം വരുത്തിവെക്കുമായിരുന്നുവെത്രേ ആന്‍ട്രിക്‌സ്-ദേവാസ് മള്‍ട്ടിമീഡിയ കരാര്‍.

വയര്‍ലസ് ഇന്റര്‍നെറ്റ് ബ്രോഡ്ബാന്‍ഡ് സേവന ദാദാക്കള്‍ക്ക് 2ജിയും അതിനുമുകളിലുമുള്ള ഇന്റര്‍നെറ്റ് വേഗത ഉറപ്പുവരുത്തുന്നതിന് എസ് ബാന്‍ഡ് സ്‌പെക്ട്രം ഉപയോഗിക്കാം. സ്വകാര്യ ഇന്റര്‍നെറ്റ് സര്‍വ്വീസ് ദാദാക്കള്‍ എസ് ബാന്‍ഡ് സ്‌പെക്ട്രത്തില്‍ കണ്ണുവെച്ചിരുന്നുപോല്‍. എസ് ബാന്‍ഡ് സ്‌പെക്ട്രം സ്വകാര്യ ഇന്റര്‍നെറ്റ് ദാദാക്കള്‍ക്ക് മറിച്ചുവില്‍ക്കുവാനായിരുന്നുവത്രെ ഇന്റര്‍നെറ്റ് സേവന ദാദാവല്ലാത്ത ദേവാസ് മള്‍ട്ടിമീഡിയയുടെ നീക്കം. ഈ സാഹചര്യത്തിലാണ് പൊതുഖജനാവിലെത്തേണ്ടിയിരുന്ന രണ്ടു ലക്ഷം കോടി രൂപ ദേവാസ് മള്‍ട്ടിമീഡിയയുടെ അക്കൗണ്ടിലെത്തിപ്പെടുമായിരുന്നുവെന്ന കണക്കുകള്‍ പ്രത്യക്ഷപ്പെട്ടത്.

ഇന്ത്യന്‍ സ്വകാര്യ വയര്‍ലസ് ബ്രോഡ്ബാന്‍ഡ് ഇന്റര്‍നെറ്റ് സര്‍വ്വീസ് ദാദാക്കളെയാണ് രാജ്യത്തെ ഇന്റര്‍നെറ്റ് ഉപയോക്താക്കള്‍ മുഖ്യമായും ആശ്രയിക്കുന്നത്. മിനിമം വേഗതയുള്ള ഇന്റര്‍നെറ്റ് കണക്ഷനുപോലും ആളോഹരി വരുമാനത്തിന് താങ്ങാവുന്നതിനപ്പുറമുള്ള ചാര്‍ജ്ജാണ് ഇവര്‍ വസൂലാക്കുന്നത്. മിനിമം ഇന്റര്‍നെറ്റ് വേഗം പ്രദാനം ചെയ്ത് പരമാവധി പൈസ വസൂലാക്കുകയാണ് ഇന്റര്‍നെറ്റ് സേവന ദാദാക്കള്‍. ഇവരുടെ പരസ്യങ്ങളില്‍ പറയുന്ന വേഗം ലഭ്യമേയല്ല. കേന്ദ്ര സര്‍ക്കാരോ ടെലികോം റെഗുലേറ്ററി അഥോറിറ്റിയോ ഇക്കാര്യങ്ങളിലൊന്നും പക്ഷേ ഫലപ്രദമായ ഇടപെടല്‍ നടത്തുന്നില്ല.

ചുളുവിലയ്ക്ക് എസ് ബാന്‍ഡ് സ്‌പെക്ട്രം ദേവാസ് മള്‍ട്ടിമീഡിയയില്‍ നിന്ന് തരപ്പെടുത്തുന്നതിനുള്ള അസുലഭ അവസരം കൂടി ഇവര്‍ക്ക് ലഭ്യമാക്കപ്പെടുമായിരുന്നുവെങ്കില്‍ ഇന്റര്‍നെറ്റ് ചാര്‍ജ്ജിനത്തില്‍ ഇപ്പോഴുള്ളതിനേക്കാള്‍ അമിതഭാരം ഉപയോക്താവിന് താങ്ങേണ്ടിവരുമായിരുന്നു. മാത്രമല്ല ഈ എസ് ബാന്‍ഡ് കരാറിലൂടെ രണ്ടുലക്ഷം കോടി രൂപ പൊതുഖജനാവിന് നഷ്ടപ്പെടുകയും ചെയ്‌തേനേ. ഇപ്പോള്‍ 2ജി സ്‌പെക്ട്രം ഇടപാടുകള്‍ റദ്ദ് ചെയ്യപ്പെട്ടെങ്കിലും ഈ ഇടപാടിലും ഏറെക്കുറെ ഇതുതന്നെയല്ലേ രാജ്യം കണ്ടത്.

ഉപയുക്തമാക്കപ്പെടേണ്ട എസ് ബാന്‍ഡ് സ്‌പെക്ട്രം

എസ് ബാന്‍ഡ് സ്‌പെക്ട്രം തുച്ഛമായ വിലയ്ക്ക് വിറ്റു തുലക്കേണ്ടതില്‍ നിന്ന് പിന്മാറേണ്ടിവന്ന കേന്ദ്ര സര്‍ക്കാര്‍ അത് നികുതിദായകരായുള്ള 2ജി, 3ജി വയര്‍ലസ് ഇന്റര്‍നെറ്റ് ഉപയോക്താക്കള്‍ക്ക് വേഗതയാര്‍ന്ന ഇന്റര്‍നെറ്റ് സൗകര്യം ഉറപ്പിക്കുന്നതിനായാണ് ഉപയുക്തമാക്കേണ്ടത്. ഇതിലൂടെ സ്വകാര്യ വയര്‍ലസ് ഇന്റര്‍നെറ്റ് ബ്രോഡ്ബാന്‍ഡ്് സേവന ദാദാക്കളാല്‍ വിനോദ വിനിമയ വിദ്യയെന്നതിലേക്ക് വഴിമാറ്റപ്പെട്ട ഇന്ത്യയുടെ ഐടി യഥാര്‍ത്ഥ വിവര വിനിമയ വിദ്യയെന്ന നിലയില്‍ സ്വാര്‍ത്ഥകമാക്കപ്പെടും. ഇന്റര്‍നെറ്റ് വിനോദത്തിനപ്പുറം ഇന്‍ഫര്‍മേഷന്‍ ഹൈവേയിലെത്തിപ്പെടുന്നതിന് സാഹചര്യം സൃഷ്ടിക്കപ്പെടുമ്പോള്‍ ഐടി രംഗത്തെ ഗവേഷണ-വികസന പ്രവര്‍ത്തനങ്ങളില്‍ വ്യാപൃതരാകുവാന്‍ പുതു ഐടി തലമുറ പ്രാപ്തരാക്കപ്പെടും. രാജ്യത്തിന്റെ ഡിജിറ്റല്‍ സുരക്ഷയെയും സ്വകാര്യതയെയും വെല്ലുവിളിച്ചുള്ള അമേരിക്കയടക്കമുള്ള ബാഹ്യശക്തികളുടെ സൈബര്‍ ആക്രമണങ്ങളെ പ്രതിരോധിക്കുവാനുള്ള വൈദഗ്ദ്ധ്യമാര്‍ന്ന ഐടിയധിഷ്ഠിത മാനവ വിഭവശേഷി വാര്‍ത്തെടുക്കുന്നതിലായിരിക്കണം ഭരണാധികാരികള്‍ ഊന്നല്‍ നല്‍കേണ്ടത്.

ഇന്‍ഫര്‍മേഷന്‍ ഹൈവയിലെത്തിപ്പെടുമ്പോള്‍ ആര്‍ജ്ജിക്കുന്ന യഥാര്‍ത്ഥ ഐടി അധിഷ്ഠിത വൈദഗ്ദ്ധ്യം കേവലം വിദേശ ഐടി കമ്പനികള്‍ക്കായുള്ള ബിപിഒ കേന്ദ്രങ്ങളിലായിരിക്കില്ല വിനിയോഗിക്കപ്പെടുക. മറിച്ച് ബാക്ക് എന്റ് (Back End) ഐടി സൊല്യൂഷനുകള്‍ക്കായുള്ള ഗവേഷണ-വികസനത്തിനുമായിരിക്കും. ഇത്തരം അനുകൂല സാഹചര്യം സൃഷ്ടിക്കപ്പെടുന്നിടത്തായിരിക്കും കൊട്ടിഘോഷിക്കപ്പെടുന്ന ഐടി വിപ്ലവത്തിന് പകരം യഥാര്‍ത്ഥ ഐടി വിപ്ലവം രാജ്യത്ത് സുസാധ്യമാക്കപ്പെടുക. ഇവിടെയാണ് സൗജന്യ ഇന്റര്‍നെറ്റ് കണക്ഷന്‍ മൗലീകവകാശമാക്കണെമന്നതിന്റെ അനി വാര്യത ശക്തിപ്പെടുന്നത്.

ഈയിടെ കേരളത്തില്‍ കാലിക്കറ്റ് സര്‍വ്വകലാശാലയുടെ ഒന്നാം വര്‍ഷ ഡിഗ്രി ഏകജാലക ഓണ്‍ലൈന്‍ പ്രവേശന പ്രക്രിയയും സംസ്ഥാനത്തെ പ്രഫഷണല്‍ ഡിഗ്രി കോഴ്‌സിലേക്കുള്ള രണ്ടാംഘട്ട അലോട്ട്‌മെന്റും സെര്‍വര്‍ ദുര്‍ബ്ബലാവസ്ഥയില്‍ അനിശ്ചിതത്വത്തിലായി. കേരളത്തിലെ തന്നെ അക്ഷയ കേന്ദ്രങ്ങള്‍ ഇ-ഗവേണന്‍സ് പ്രക്രിയയുടെ ഭാഗമാണ്. സെര്‍വറുകളുടെ ദുര്‍ബ്ബലാവസ്ഥ ഈ കേന്ദ്രങ്ങളുടെ പ്രവര്‍ത്തനങ്ങളെ സാരമായി ബാധിക്കുന്നു. ഇത്തരം സ്ഥിതിവിശേഷത്തില്‍ 2 ജി, 3 ജി ഇന്റര്‍നെറ്റ് (മൊബൈല്‍ ഫോണ്‍/വയര്‍ലസ് ഇന്റര്‍നെറ്റ് മോഡം) ഉപയോക്താക്കള്‍ക്ക് വേഗതയാര്‍ന്ന ഇന്റര്‍നെറ്റ് സൗകര്യം ഉറപ്പിക്കുന്നതിനായാണ് എസ് ബാന്‍ഡ് സ്‌പെക്ട്രം ഉപയുക്തമാക്കേണ്ടത്. രാജ്യത്തിന്റെ പൊതു ഐടി അധിഷ്ഠിത ആവശ്യത്തിനായി എസ് ബാന്‍ഡ് സ്‌പെക്ട്രം ഉപയോഗപ്പെടുത്തുവാനുള്ള നടപടികളില്ലാത്തത് നികുതിദായകരോടുള്ള കടുത്തവെല്ലുവിളിയാണ്.

 

ലഘു വായ്പാപദ്ധതി: പണം കായ്ക്കുന്ന മരം

കെ.കെ. ശ്രീനിവാസന്‍/KK Sreenivasan

This research paper on Working of Micro Finance Insituitions (MFIs) was published as a report in Samakalika Malayalm Weekly  (Issue  28 Jan 2011) and posted on 07 August 2011 at 12:47 AM on this news portal and now the same is posted once again…..

posted by  on 07 August 2011 at 12:47 AM

3 out of 5 stars
Rate this article
1 2 3 4 5

Micro finanace paper pg 1 in Malyalam varika 28 Jan 2011ദരിദ്രര്‍ എക്കാലവും വായ്പാ സ്വീകര്‍ത്താക്കളായി നിലനിറുത്തപ്പെടേണ്ടവരെല്ലെന്നുള്ള ബോദ്ധ്യപ്പെടല്‍ മുഖ്യമാണ്. വായ്പാ ദാതാക്കളുടേയും സ്വീകര്‍ത്താക്കളുടെയും തോത് ഈ കൊടുക്കല്‍ വാങ്ങലുകളിലൂടെ നേര്‍ത്തുവരേണ്ടതുണ്ട്. അതായത്, ആശ്രയത്വത്തില്‍ നിന്ന് സ്വാശ്രയത്വത്തിലേയ്ക്കുള്ള ദരിദ്ര ജനവിഭാഗങ്ങളുടെ വളര്‍ച്ച ഉറപ്പിക്കപ്പെടണം. എങ്കില്‍ മാത്രമെ ദാരിദ്ര നിര്‍മ്മാര്‍ജ്ജനമെന്ന ലക്ഷ്യത്തിലെത്തിചേരാന്‍ ലഘുവായ്പ പദ്ധതിയ്ക്കാവൂ

ണം മരത്തില്‍ കായ്ക്കില്ല. പണം പക്ഷേ മരത്തില്‍ കായ്ക്കുന്നുവെന്ന പ്രതീതി സൃഷ്ടിക്കപ്പെട്ടാലോ? ആഗോളതലത്തില്‍ തന്നെ ഏറെ ശ്രദ്ധാകേന്ദ്രമാണ് മൈക്രോ ക്രെഡിറ്റ് അഥവാ ലഘുവായ്പാ പദ്ധതി. വികസ്വര രാഷ്ട്രങ്ങളിലെ ദരിദ്ര ജന വിഭാഗങ്ങളുടെ സാമൂഹികസാമ്പത്തിക അവസ്ഥയെ ഉദ്ധരിക്കുകയെന്നതാണ് ഈ പദ്ധതിയുടെ ആത്യന്തിക ലക്ഷ്യം. ഈ ലക്ഷ്യ സാധൂകരണ ചുമതല മുഖ്യമായും ഏല്‍പ്പിച്ചിട്ടുള്ളത് മൈക്രോ ഫിനാന്‍സ് സ്ഥാപനങ്ങളെയാണ്. ഇവയുടെ സമ്പാദ്യം അനന്തമായി കുമിഞ്ഞുകൂടുന്നു. ഇവിടെയാണ് പണം മരത്തില്‍ കായ്ക്കുന്നുണ്ടോയെന്ന് സംശയിയ്ക്കാന്‍ പ്രേരിപ്പിക്കപ്പെടുന്നത്.

ലഘുവായ്പ പദ്ധതിയുടെ പിതാവ് എന്ന വിശേഷണത്തിന് ഉടമയാണ് പ്രൊഫ. മുഹമ്മദ് യൂനസ്. ബംഗ്ലാദേശ് ഗ്രാമീണ ജനതയെ കൊടിയ ദാരിദ്രത്തില്‍ നിന്ന് കരകയറ്റുകയെന്ന സാമൂഹികസാമ്പത്തിക ദൗത്യ സഫലീകരണ ദിശയിലാണ് പ്രൊഫ.യൂനസ് ലഘുവായ്പാ പദ്ധതിക്ക് രൂപം നല്‍കുന്നത്. 1976 ല്‍ ഗ്രാമീണ ബാങ്ക് സ്ഥാപിച്ചുകൊണ്ടാണ് ഈ നൂതന പദ്ധതിയെ പ്രയോഗതലത്തിലെത്തിക്കുന്നത്.

1995 സെപ്തംബറില്‍ ബീജിങില്‍ നടന്ന അന്താരാഷ്ട്ര വനിതാ സമ്മേളനമാണ് ബംഗ്ലാദേശ് മോഡല്‍ ലഘുവായ്പാ പദ്ധതിയിലേക്ക് ആഗോള ശ്രദ്ധ ക്ഷണിക്കുന്നത്. 100 കോടിയിലധികം ജനങ്ങള്‍, പ്രത്യേകിച്ചും വനിതകള്‍, ആഗോളതലത്തില്‍ തന്നെ ദാരിദ്രത്തിന്റെയും വിശപ്പിന്റേയും പിടിയിലാണ്. ഈയവസ്ഥക്ക് ഒരു പരിഹാര മാര്‍ഗ്ഗമായിട്ടാണ് ആഗോള വനിതാ സമ്മേളന പ്രഖ്യാപനത്തില്‍ ലഘുവായ്പാ പദ്ധതി ഇടം തേടുന്നത്.

വികസ്വര രാഷ്ട്രങ്ങളിലെ 16 മില്യന്‍ ദരിദ്രര്‍ക്ക് സാമ്പത്തിക സേവന ദാതാക്കളായി 7000 മൈക്രോ ഫിനാന്‍സ് സ്ഥാപനങ്ങള്‍ 2.5 ബില്യണ്‍ യു.എസ് ഡോളറിന്റെ സാമ്പത്തിക ഇടപാടുകളിലേര്‍പ്പെടുന്നുവെന്ന് ലോക ബാങ്ക് കണക്കുകള്‍ വ്യക്തമാക്കുന്നു. 1.3 ബില്യണ്‍ ദരിദ്രര്‍, 7 ബില്യണ്‍ യു.എസ്. ഡോളര്‍ വായ്പ സ്വീകരിച്ചിട്ടുണ്ടെന്നും ലോക ബാങ്ക് പറയുന്നു.

ലഘു വായ്പാപദ്ധതി ഇന്ത്യില്‍

1980 കളുടെ ആരംഭത്തിലാണ് ഇന്ത്യയില്‍ ലഘുവായ്പാ പദ്ധതി പിറവിയെടുക്കുന്നത്. അയല്‍ക്കൂട്ടങ്ങള്‍ക്ക് ബാങ്ക് ലിങ്കേജ് സൗകര്യങ്ങള്‍ അനുവദിച്ച് ദേശീയ കാര്‍ഷിക ഗ്രാമീണ വികസന ബാങ്കും (നബാര്‍ഡ്) മൈക്രോ ഫിനാന്‍സ് പദ്ധതികള്‍ക്കായി സര്‍ക്കാരേതര സംഘടന (എന്‍ജിഒ) കള്‍ക്ക് വായ്പ നല്‍കി രാഷ്ട്രീയ മഹിളാ കോശും മൈക്രോ ഫിനാന്‍സ് സ്ഥാപനങ്ങള്‍ക്ക് വായ്പകള്‍ അനുവദിച്ച് ചെറുകിട വ്യവസായ വികസന ബാങ്കുമാണ് ഇന്ത്യയില്‍ ലഘു വായ്പാ പദ്ധതിക്ക് കളമൊരുക്കിയത്. ഇതിനകം മൂന്നു പതിറ്റാണ്ടു പിന്നിട്ട ഇന്ത്യയിലെ ലഘുവായ്പാ പദ്ധതിക്ക് ഇപ്പോള്‍ മുഖ്യ കാര്‍മ്മികത്വം വഹിക്കുന്നത് പൊതു/സ്വകാര്യ മേഖലാ ബാങ്കുകള്‍, ഫിനാന്‍സ് കോര്‍പ്പറേഷനുകള്‍, റിസര്‍വ്വ് ബാങ്ക് നിയന്ത്രണത്തിലുള്ള നോണ്‍ ബാങ്കിങ്ങ് ധനകാര്യ സ്ഥാപനങ്ങള്‍, നോണ്‍ ബാങ്കിങ്ങ് കോര്‍പ്പറേറ്റ് സ്ഥാപനങ്ങള്‍ തുടങ്ങിയവയാണ്.

രാജ്യത്തെ 6,00,000 ഗ്രാമങ്ങളിലെ കേവലം അഞ്ചു ശതമാനത്തില്‍ മാത്രമാണ് ബാങ്കിങ്ങ് സേവനമുറപ്പിക്കപ്പെട്ടിട്ടുള്ളത്. ബാങ്ക് അക്കൗണ്ടുള്ളവര്‍ 40 ശതമാനം മാത്രം. 10.7 കോടി ഗ്രാമീണ കുടുംബങ്ങള്‍ക്ക് ബാങ്കിങ്ങ് സേവനം ലഭ്യമാക്കപ്പെട്ടിട്ടില്ലെന്നു മൈക്രോ ഫിനാന്‍സ് നെറ്റ്‌വര്‍ക്ക് സംഘടനയായ സാധന്‍ റിപ്പോര്‍ട്ട് ചെയ്യുന്നു(1).

റിസര്‍വ്വ് ബാങ്കിന്റെ സര്‍വ്വരേയും ഉള്‍ക്കൊണ്ടുള്ള സാമ്പത്തിക പദ്ധതി (Financial Inclusive Plan)യുടെ ഭാഗമായി ഗ്രാമീണ മേഖലയില്‍ അടിസ്ഥാന ബാങ്കിങ്ങ് സേവനങ്ങള്‍ ഉറപ്പുവരുത്തുകയാണ്. ഇതനുസരിച്ച് ഇനിയും ബാങ്കിങ്ങ് സേവനമെത്തിപ്പെടാത്ത ഗ്രാമങ്ങളില്‍ സേവനമെത്തിക്കാന്‍ ബിസിനസ് കറസ്‌പോണ്ടന്റുമാരെ നിയോഗിക്കുവാന്‍ റിസര്‍വ്വ് ബാങ്ക്, വാണിജ്യ ബാങ്കുകള്‍ക്ക് അനുമതി നല്‍കിയിട്ടുണ്ട്. ഇതിലൂടെ, 2008-09 ല്‍, രാജ്യത്ത് 3.3 കോടി പുതിയ ബാങ്ക് അക്കൗണ്ടുകള്‍ തുറക്കപ്പെട്ടിട്ടുണ്ട്. മൂന്നു കോടിയിലധികം അക്കൗണ്ടുകള്‍ തുറന്ന് ആന്ധ്രാ പ്രദേശാണ് ഒന്നാം സ്ഥാനത്ത്(2).

ബാങ്കിങ്ങ് സേവനം പരമാവധി ഇടപാടുകാരുടെ, പ്രത്യേകിച്ചും ഗ്രാമീണ മേഖലയിലെ, വീട്ടുപടിക്കലെത്തിക്കുകയെന്നത് അനിവാര്യമാകുന്നുണ്ട്. ഇത് പക്ഷേ വിപുലപ്പെടുത്തുവാന്‍ വര്‍ത്തമാന വ്യവസ്ഥാപിത ബാങ്കിങ്ങ് മേഖല സ്വന്തം നിലയില്‍ പ്രാപ്തമല്ല. ഇത്തരമൊരു പശ്ചാത്തലത്തിലാണ് ബിസ്‌നസ് കറസ്‌പോണ്ടന്റുമാരെന്ന നിലയില്‍ മൈക്രോ ഫിനാന്‍സ് സ്ഥാപനങ്ങളേറെ പ്രോത്സാഹിപ്പിക്കപ്പെടുന്നത്.

വികസ്വര രാഷ്ട്രങ്ങളിലെ സാമൂഹികസാമ്പത്തിക സ്ഥിതി ഉയര്‍ത്തുകയെന്ന ലക്ഷ്യത്തിലൂന്നി ഐക്യരാഷ്ട്ര സംഘടനയുടെ മില്യേന്യം വികസന ലക്ഷ്യങ്ങള്‍ -2000 (Millienium Development Goals-2000) മുന്നോട്ടുവയ്ക്കപ്പെട്ടു. 100 രാജ്യങ്ങളില്‍ നിന്നുള്ള 1000 ത്തോളം എന്‍.ജി.ഒകളും സിവില്‍ സൊസൈറ്റി സംഘടനകളും പങ്കെടുത്ത മില്യേന്യം ഫോറത്തിലാണ്, 2000 മേയില്‍, ഈ ലക്ഷ്യം മുന്നോട്ടുവയ്ക്കപ്പെട്ടത്. 2000 സെപ്തംബറിലെ യു.എന്‍ മില്യേന്യം പ്രഖ്യാപന പ്രകാരം 2015 ഓടെ പൂര്‍ത്തീകരിക്കുവാനുദ്ദേശിച്ചുള്ള എട്ട് ലക്ഷ്യങ്ങളില്‍ ദാരിദ്ര/ വിശപ്പ് നിര്‍മ്മാര്‍ജനത്തിനാണ് പ്രഥമ പരിഗണന. ഇന്ത്യയടക്കമുള്ള വികസ്വര രാഷ്ട്രങ്ങളില്‍ ദാരിദ്ര നിര്‍മ്മാര്‍ജന പദ്ധതിയെന്ന നിലയില്‍ ലഘുവായ്പാ പദ്ധതിക്ക് പ്രാധാന്യമേറുന്നത് ഈ പശ്ചാത്തലത്തിലാണ്.

വളര്‍ച്ചാ ഗ്രാഫ്

2010 മാര്‍ച്ച് 31 വരെയുള്ള നബാര്‍ഡ് കണക്ക് പ്രകാരം, 53.10 ലക്ഷം വനിതാസ്വയം സഹായ സംഘങ്ങളുടേതടക്കം 69.55 ലക്ഷം സംഘങ്ങളുടെ നിക്ഷേപങ്ങള്‍ വിവിധ ബാങ്കുകളിലുണ്ട്. 38.98 വനിതാസംഘങ്ങള്‍ ഉള്‍പ്പെടെ 48.51 ലക്ഷം സംഘങ്ങള്‍ വായ്പ തിരിച്ചടക്കുവാനുള്ളവരാണ്. സ്വയംസഹായ സംഘങ്ങളുടെ മൊത്തം നിക്ഷേപം 6,198.77കോടി രൂപ. ഇതില്‍ 4,498.68 കോടി വനിതാ സംഘങ്ങളുടേതാണ്. 14,453.30 കോടിയുടെ ബാങ്ക് വായ്പകള്‍ അനുവദിക്കപ്പെട്ടിട്ടുണ്ട്. ഇതില്‍ സിംഹഭാഗവും, 12,429.37 കോടി രൂപ, അനിവദിക്കപ്പെട്ടിട്ടുള്ളത് വനിതാസംഘങ്ങള്‍ക്ക്. വനിതാ സംഘങ്ങളുടെ 23,030. 36 കോടിയടക്കം മൊത്തം 28,038.28 കോടി വായ്പ തിരിച്ചടക്കപ്പെടേണ്ടതുണ്ട്. ഓരോ സംഘത്തിന്റേയും ശരാശരി തിരിച്ചടവ് സംഖ്യ 57,795 രൂപ. ഓരോ അംഗത്തിന്റെയാകട്ടെ, 4,128 രൂപ. മൊത്തം 9.7 കോടി കുടുംബങ്ങള്‍ ഗുണഭോക്താക്കള്‍.(3) ഇക്കഴിഞ്ഞ 5 വര്‍ഷ (2005-09) ത്തിനുള്ളില്‍ മാത്രമായി ലഘുവായ്പാ പദ്ധതിയില്‍ 83 ശതമാനം വളര്‍ച്ച രേഖപ്പെടുത്തിയിട്ടുണ്ട്.(4) മറ്റൊരു റിപ്പോര്‍ട്ടു പറയുന്നത് ഇതേ കാലയളവില്‍ തന്നെ 252 മില്യണ്‍ യു.എസ്. ഡോളറില്‍ നിന്ന് 2.5 ബില്യണിലേക്കുള്ള വളര്‍ച്ചയാണ്.(5)

ഇന്ത്യയില്‍ 446 മൈക്രോ ഫിനാന്‍സ് സ്ഥാപനങ്ങള്‍ പ്രവര്‍ത്തിക്കുന്നു(6). ഇതില്‍ 50 സ്ഥാപനങ്ങള്‍ ക്രെഡിറ്റ് റേറ്റിങ്ങ് ഇന്ത്യ സര്‍വ്വീസസ് ലിമിറ്റഡി (CRISIL) ന്റെ റേറ്റിങ്ങ് ലിസ്റ്റിലുള്‍പ്പെട്ടിട്ടുണ്ട്. കേരളത്തിലെ ആലപ്പുഴ എസ്.എല്‍ പുരം, ഗാന്ധി സ്മാരക സേവാ കേന്ദ്രം ഈ ലിസ്റ്റില്‍ 46-ാം സ്ഥാനത്താണെന്നത് ശ്രദ്ധേയം. ആദ്യ സ്ഥാനം ആന്ധ്രാപ്രദേശ് കേന്ദ്രീകരിച്ച് പ്രവര്‍ത്തിക്കുന്ന സ്വയം കൃഷി സംഘം (SKS) എന്ന മൈക്രോ ഫിനാന്‍സ് സ്ഥാപനമാണെന്ന് ഇന്ത്യന്‍ മൈക്രോ ഫിനാന്‍സ് ബിസ്‌നസ് ന്യൂസ് ( 2010 ജൂലായ് 29) (7) റിപ്പോര്‍ട്ട് ചെയ്യുന്നു. ദ്രുതഗതിയില്‍ കുതിക്കുന്ന ഈ വളര്‍ച്ചാ ഗ്രാഫിനൊപ്പം തന്നെ മൈക്രോഫിനാന്‍സ് സ്ഥാപനങ്ങള്‍ തങ്ങള്‍ അനുവദിക്കുന്ന ലഘു വായ്പക്ക് അന്യായ പലിശ ചുമത്തിക്കൊണ്ട് കൊള്ളലാഭ സമ്പാദനത്തിനായി കോടാനുകോടി ദരിദ്രരെ ഉപകരണമാക്കി മാറ്റുന്നു എന്ന ഞെട്ടിക്കുന്ന റിപ്പോര്‍ട്ടുകളും വെളിച്ചത്ത് വന്നുകൊണ്ടിരിക്കുകയാണ്.

ലാഭത്തില്‍ നിന്ന് കൊള്ള ലാഭത്തിലേക്ക്

മെക്‌സിക്കന്‍ ഓഹരി വിപണിയില്‍ ലിസ്റ്റ് ചെയ്യപ്പെട്ട ലോകത്തിലെ ആദ്യ മൈക്രോ ഫിനാന്‍സ് സ്ഥാപനം ബാന്‍കോ കോംപാര്‍ട്ടമസ് അനുവദിക്കുന്ന ലഘു വായ്പക്ക് 86 ശതമാനം വാര്‍ഷിക പലിശ ഈടാക്കുന്നു(8). അന്യായ പലിശ ചുമത്തുന്നതില്‍ ഇന്ത്യയിലെ മൈക്രോ ഫിനാന്‍സ് സ്ഥാപനങ്ങളും ഒട്ടും പിറകിലല്ല. കമ്മീഷന്‍ഡോക്യുമെന്റേഷന്‍ ചാര്‍ജുകള്‍ കൂടാതെ, വായ്പാ തുക കുറയുന്നതിനനുസരിച്ച30 മുതല്‍ 70 ശതമാനം വരെ പലിശ ചുമത്തുന്നുണ്ടെന്ന് ഏഷ്യന്‍ വികസന ബാങ്കിന്റെ (.ഡി.ബി) ഈസ്റ്റേഷ്യന്‍ ഡിപ്പാര്‍ട്ട്‌മെന്റ് റിപ്പോര്‍ട്ട്-2006 പറയുന്നു(9).

ദരിദ്ര ജനവിഭാഗങ്ങളില്‍ നിന്ന് അന്യായ പലിശ ഈടാക്കി ഇന്ത്യന്‍ മൈക്രോ ഫിനാന്‍സ് സ്ഥാപനങ്ങള്‍ വാണിജ്യവല്‍ക്കരിക്കപ്പെട്ടു എന്ന ആശങ്ക ശക്തിപ്പെടുന്നത് എസ്.കെ.എസ് ഇന്ത്യന്‍ ഓഹരി വിപണിയില്‍ ലിസ്റ്റ് ചെയ്യപ്പെട്ടതിന്റെ പശ്ചാത്തലത്തിലാണ്. 2010 ജൂലായ് മുംബൈദേശീയ ഓഹരി വിപണികളില്‍ ഐ.പി.(Initial Public Offering) യിലൂടെ എസ്.കെ.എസ് വാരിക്കൂട്ടിയത് 1653 കോടി രൂപ. എസ്.കെ.എസിനിപ്പോള്‍ 2407 ശാഖകളിലായി 78 ലക്ഷം അംഗങ്ങള്‍. 2010 സെപ്തംബര്‍ 30 വരെയുള്ള കണക്ക് പ്രകാരം അനുവദിക്കപ്പെട്ട വായ്പ 19,841 കോടി രൂപ (10). വിക്രം അഖുല ചെയര്‍മാനായുള്ള ഈസ്ഥാപനം പ്രവര്‍ത്തനമാരംഭിക്കുന്നത് 1977 ല്‍ മാത്രമാണെന്നറിയുമ്പോഴാണ് ഇതിന്റെ വളര്‍ച്ച അഭൂതപൂര്‍വ്വമാണെന്ന് വ്യക്തമാകുന്നത്.

sks2006 ല്‍ ടൈം മാഗസിന്‍ ലോകത്തെ ഏറ്റവും സ്വാധീനമുള്ള 100 വ്യക്തികളെ തെരഞ്ഞെടുത്തതില്‍ എസ്.കെ.എസ്. ചെയര്‍മാന്‍ അഖുല സ്ഥാനം പിടിച്ചു. അഖുലക്ക് ലോക സ്വാധീന വ്യക്തിപട്ടികയിലിടം ലഭിയ്ക്കാന്‍ പാതയൊരിക്കിയത് ദരിദ്രര്‍ക്ക് കടം കൊടുത്ത് അന്യായ പലിശ ചുമത്തി കൊള്ളലാഭമുണ്ടാക്കി കെട്ടിപ്പൊക്കിയ എസ്.കെ.എസിന്റെ അഭൂതപൂര്‍വ്വമായ വളര്‍ച്ചാ ഗ്രാഫ് തന്നെയാണ്.

രാജ്യത്തെ ദരിദ്ര ഗ്രാമീണ ജനതക്ക് സാമ്പത്തിക സേവനമെത്തിച്ച് വനിതകളെ ശാക്തീകരിക്കാന്‍ നിയോഗിക്കപ്പെട്ടവയാണ് എസ്.കെ.എസ് അടക്കമുള്ള മൈക്രോ ഫിനാന്‍സ് സ്ഥാപനങ്ങളെന്ന് ഓര്‍ക്കുക. ഈ സ്ഥാപനങ്ങള്‍ക്ക് നേതൃത്വം നല്‍കുന്നവര്‍ കൈപ്പറ്റുന്നത് ശമ്പളമടക്കം കോടികളുടെ വാര്‍ഷിക ആനുകൂല്യങ്ങള്‍. എസ്.കെ.എസിന്റെ ചീഫ് എക്‌സിക്യൂട്ടീവ് ഓഫീസര്‍ സുരേഷ് ഗുരുമണി (പിന്നീട് ഇദ്ദേഹം പുറത്താക്കപ്പട്ടു) 2009-10 ല്‍ മാത്രം മറ്റാനുകൂല്യങ്ങള്‍ക്ക് പുറമെ കൈപ്പറ്റിയ ശമ്പളം 2.45 കോടി രൂപയെന്ന് Daily News Analaysis (2010 Nov.26) റിപ്പോര്‍ട്ട് ചെയ്യുന്നു. ഇന്ത്യയിലെ ഏറ്റവും വലിയ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്.ബി.) യുടെ ചെയര്‍മാന്റെ വാര്‍ഷിക ശമ്പളം 26.5 ലക്ഷം മാത്രം. ഇന്ത്യന്‍ റിസര്‍വ്വ് ബാങ്ക് ഗവര്‍ണറുടേതാകട്ടെ 15 ലക്ഷം രൂപ. ഗുരുമണി കൈപ്പറ്റിയ ശമ്പളം എസ്ബിഐ ചെയര്‍മാന്റേതിനേക്കാള്‍ 9 പ്രാവശ്യം കൂടുതല്‍ !

ഗുരുമണിയുടെ പ്രതിഫല കണക്ക് ഇനിയും അവസാനിക്കുന്നില്ല…… 2009-10 ല്‍ പെര്‍ഫോര്‍മന്റ്‌സ് ബോണസ്സായി കൈപ്പറ്റിയത് 15 ലക്ഷം രൂപ. ഒറ്റത്തവണ ബോണസ് ഒരു കോടി. ഇന്‍ഷൂറന്‍സ് 4 കോടി രൂപ. ഇതിനെല്ലാം ഉപരി ഓഹരി ഓപ്ഷന്‍ പ്രകാരം 300 കോടി രൂപ മൂല്യമുള്ള 1.25 ലക്ഷം ഓഹരികള്‍.

ഓഹരി ഓപ്ഷനിലൂടെ എസ്.കെ.എസ്.ചെയര്‍മാന്‍ അഖുലയുടെ കയ്യിലെത്തിയത് 49.79 രൂപ മൂല്യമുള്ള 9.45 ലക്ഷം ഓഹരികള്‍. ഈ ഓഹരികള്‍ വെറും 2 മാസത്തിനു ശേഷം സിങ്കപ്പൂര്‍ ആസ്ഥാനമായുള്ള Tree Lion Asia Master Fund എന്ന സ്ഥാപനത്തിന് ഒരു ഓഹരിക്ക് 13.67 ഡോളര്‍ പ്രകാരം വിറ്റു. ഇതിലൂടെ അഖുലയുടെ സമ്പാദ്യപ്പെട്ടിയിലെത്തിയത് 53 കോടി രൂപ. കഴിഞ്ഞ സാമ്പത്തിക വര്‍ഷത്തില്‍ നികുതി ഒടുക്കിയതിനു ശേഷം 173.95 കോടി രൂപയാണ് എസ്.കെ.എസിന്റെ ലാഭ(11) മെന്നറിയുക.

ഒരു സംരംഭത്തിന്റെ നിലനില്‍പും പുരോഗതിയും നിര്‍ണ്ണയിക്കപ്പെടുന്നത് പ്രധാനമായും അതിന്റെ ലാഭത്തെ ആധാരമാക്കിയാണെന്നത് അംഗീകരിക്കപ്പെട്ട വാണിജ്യതത്വം. ലാഭം (Profit) പക്ഷേ കൊള്ളലാഭ (Profiteering) ത്തിലേക്ക് വഴിമാറുമ്പോള്‍ സൃഷ്ടിക്കപ്പെടുന്ന പ്രത്യാഘാതം ഏറെ ഗുരുതരമായിരിക്കും. ഇന്ത്യന്‍ എക്‌സ്പ്രസ് ഡെവലപ്പ്‌മെന്റ് എഡിറ്ററായിരുന്ന, ഇപ്പോള്‍ വികസന വിഷയങ്ങളില്‍ ഗവേഷകനായ ദേവീന്ദര്‍ ശര്‍മ തന്റെ ബ്ലോഗില്‍ മൈക്രോ ഫിനാന്‍സ് സ്ഥാപനങ്ങളുടെ ലാഭത്തിന്റെ കുത്തനെയുള്ള ഗ്രാഫ് വ്യക്തമാക്കുന്നുണ്ട്.

                                     2007-08           2009-10
 
സംരംഭങ്ങള്‍           

എസ്.കെ.എസ്                          170.1 കോടി                 958.72 കോടി

ബന്ധന്‍                                    6.56                      222.11

ബി.എസ്.എസ്.                            7.03                     155.38

ഷെയര്‍ മൈക്രോ ഫിനാന്‍സ്            113.08                      475.28

ഗ്രാമീണ്‍ മൈക്രോ ഫിനാന്‍സ്            82.65                    327.35

സമാധന്‍ സഫറുദ്ദീന്‍                     127.45                    724.09

വിജിവാന്‍                                  36.37                   327.89 * (12)

ആന്ധ്രാ അനുഭവം

ഗ്രാമീണ മേഖലയില്‍ ഒരു ഡോളറിന് താഴെമാത്രം വരുമാനമുള്ളവര്‍ക്ക് ഒദ്യോഗിക ബാങ്കിങ്ങ് സേവന മുറപ്പിക്കാന്‍(13) ഉത്തരവാദിത്വം ഏല്‍പ്പിക്കപ്പെട്ട എസ്‌കെഎസ് അടക്കമുള്ളവര്‍ കൊള്ളലാഭക്കാരയപ്പോള്‍, അതിന്റെ പ്രത്യാഘാതങ്ങളേറെ മുഖ്യമായും ഏറ്റുവാങ്ങികൊണ്ടിരിക്കുന്ന സംസ്ഥാനമാണ് ആന്ധ്രപ്രദേശ്.

ബംഗ്ലാദേശ് ഗ്രാമീണ മോഡല്‍ എന്ന വിശേഷണം നല്‍കിയാണ് ആന്ധ്രയില്‍ ലഘുവായ്പാ പദ്ധതി വ്യാപകമാക്കപ്പെടുന്നത്. എന്നാല്‍, ഇതിന്റെ നിര്‍ദ്ദിഷ്ട ലക്ഷ്യം തെറ്റുന്നുവെന്നുള്ളതാണ് ആന്ധ്യയില്‍ പ്രകടമാകുന്നത്. ഇന്ത്യയിലെ 75 ശതമാനത്തോളം മൈക്രോഫിനാന്‍സ് സ്ഥാപനങ്ങള്‍ ശ്രദ്ധ കേന്ദ്രീകരിച്ചിരിക്കുന്നത് ആന്ധ്രയിലാണ് . ഗ്രാമീണ സ്വയം സഹായസംഘങ്ങള്‍ക്ക് വായ്പ അനുവദിക്കുന്നതില്‍ 273 ശതമാനം വര്‍ദ്ധനയാണ് രേഖപ്പെടുത്തിയിട്ടുള്ളത്. വായ്പ തിരിച്ചടയ്ക്കാനാവാതെ ഇതിനകം 54 പേര്‍ ആന്ധ്രയില്‍ ആത്മഹത്യ ചെയ്തു.(14) 2010 ല്‍ മാത്രമായി 30 പേര്‍ ആത്മഹത്യ ചെയ്തുവെന്നും അതില്‍ 17 പേര്‍ എസ്‌കെഎസില്‍ നിന്ന് വായ്പയെടുത്തവരുമാണെന്നാണ് ഫ്രന്റ് ലൈന്‍ (15) റിപ്പോര്‍ട്ട്. 2010 മാര്‍ച്ച് 31 വരെ സംസ്ഥാനത്ത് 60 ലക്ഷം ജനങ്ങള്‍ക്ക് 9000 കോടി രൂപ ലഘു വായ്പ അനുവദിച്ചിട്ടുണ്ട്. ആന്ധ്രയില്‍ എസ്.കെ.എസ്, സ്പന്ദന തുടങ്ങിയ മൈക്രോഫിനാന്‍സ് സ്ഥാപനങ്ങള്‍ 28 മുതല്‍ 33 ശതമാനം വരെ പലിശ ചുമത്തുന്നു(16).

2005 ഓടുകൂടിയാണ് എസ്.കെ.എസ് അടക്കമുള്ള ആന്ധ്രയിലെ മൈക്രോ ഫിനാന്‍സ് സ്ഥാപനങ്ങള്‍ വാണിജ്യ വല്‍ക്കരണ പാതയിലേറുന്നത്. ആന്ധ്രയിലെ ദാരിദ്ര ഗ്രാമീണ മേഖല കൊള്ള ലാഭത്തിന്റെ വിത്തിറക്കാന്‍ പറ്റിയ മണ്ണാണെന്നു കൃത്യമായി തിരിച്ചറിഞ്ഞിടത്തായിരുന്നു ഈ നീക്കം. 2003 ല്‍, കര്‍ഷക കുടുംബങ്ങളുടെ കടബാദ്ധ്യത ദേശീയ ശരാശരി 49 ശതമാനമാണെന്നിരിക്കെ ആന്ധ്രയിലേത് 82 ശതമാനമായിരുന്നുവെന്നും സാമ്പത്തിക വിദ്ഗ്ദ്ധനും എഴുത്തുകാരനുമായ മില്‍ഫോര്‍ഡ് ബാറ്റ്‌മെന്‍ പറയുന്നു.(17) ആന്ധ്രയിലെ മൈക്രോ ഫിനാന്‍സ് സ്ഥാപനങ്ങളുടെ കൊള്ള പലിശയും ഇതിന്റെ പരിണിതിയായുണ്ടാകുന്ന ആത്മഹത്യകളും സാമൂഹിക സാമ്പത്തികമാനവ ദുരന്തമാവുകയാണെന്നും ബാറ്റ്‌മെന്‍ പറയുന്നു.

ആന്ധ്രയിലേതുപോലെത്തന്നെ ഒറീസയിലെ ഗ്രാമീണ മേഖലയും മൈക്രോ ഫിനാന്‍സ് സ്ഥാപനങ്ങളുടെ അന്യായ പലിശയില്‍ ശ്വാസം മുട്ടുകയാണെന്നുള്ള റിപ്പോര്‍ട്ടുകളുണ്ട്.(18) 2010 നവംബറില്‍ കേന്ദ്രപ്പാറ ജില്ലയിലെ രത്‌നാകര്‍ ജന എന്ന ഭൂരഹിത കര്‍ഷകന്‍ ആത്മഹത്യ ചെയ്തു. പാട്ടത്തിനെടുത്ത ഭൂമിയില്‍ കൃഷിയിറക്കാന്‍ ഒരു മൈക്രോ ഫിനാന്‍സ് സ്ഥാപനത്തില്‍ നിന്ന് ഇദ്ദേഹം ലഘുവായ്പയെടുത്തിരുന്നു. അതു പക്ഷേ നിശ്ചിത സമയത്തിനുള്ളില്‍ തിരിച്ചടക്കാനായില്ല. ഇതേ തുടര്‍ന്നായിരുന്നു ആത്മഹത്യ. ഇത്തരത്തിലുള്ള ആത്മഹത്യ ഒറീസയില്‍ ഒറ്റപ്പെട്ടതല്ലെന്നും റിപ്പോര്‍ട്ടില്‍ പറയുന്നു.

തുച്ഛവരുമാന ഗ്രാമീണര്‍

ദേശീയ ഗ്രാമീണ തൊഴിലുറപ്പു പദ്ധതി പ്രകാരമുള്ള 100 തൊഴില്‍ ദിനങ്ങളില്‍ നിന്നു ലഭ്യമാകുന്ന തുച്ഛമായ കൂലിയാണ് ഇന്ത്യയിലെ ഗ്രാമീണരുടെ മുഖ്യവരുമാനം. ഇതിലൂടെയാണ് അവര്‍ ജീവിതത്തിന്റെ രണ്ടറ്റവും കൂട്ടിമുട്ടിക്കുന്നത്. ഈ തുച്ഛവരുമാനത്തിന്റെ തന്നെ പിന്‍ബലത്തിലാണ് തങ്ങളെ ശാക്തീകരിക്കുവാന്‍ വന്നവരെന്ന് കരുതി മൈക്രോ ഫിനാന്‍സ് സ്ഥാപനങ്ങളില്‍ നിന്ന് വായ്പയെടുക്കുന്നത്. വായ്പകളൊന്നും പക്ഷേ പുതിയ വരുമാന സ്രോതസ്സ് തുറക്കുന്നതിനായല്ല മുഖ്യമായും വിനിയോഗിക്കപ്പെടുന്നത്. മറിച്ച്, ഒരു നേരത്തെയെങ്കിലും നല്ല ആഹാരം, നല്ല വസ്ത്രം, വിവാഹം, ഉത്സവ ആഘോഷങ്ങള്‍ തുടങ്ങിയ പ്രാഥമികവും ഉല്പാദനരഹിതവുമായ ആവശ്യങ്ങള്‍ക്കാണ്. അതേസമയം ഈ വായ്പക്ക് പിന്നില്‍ പതുങ്ങിയിരിക്കുന്ന അന്യായ പലിശയെക്കുറിച്ച് ഈ ഗ്രാമീണര്‍ അജ്ഞരാണ്. ലഭ്യമാകുന്ന തുച്ഛവരുമാനം നിത്യവൃത്തിക്ക് പോലും തികയാതെ വരുമ്പോള്‍ വായ്പ തിരിച്ചടയ്ക്കാനാവാത്ത അവസ്ഥ ഗ്രാമീണരെ കടുത്ത മാനസിക സമ്മര്‍ദ്ദത്തിലാഴ്ത്തുന്നു. ഇതോടൊപ്പം കടംകൊടുത്ത മുതലും പലിശയും തിരിച്ചുപിടിയ്ക്കാനുള്ള മൈക്രോ ഫിനാന്‍സ് സ്ഥാപനങ്ങളുടെ ബലപ്രയോഗവും കൂടിയാകുമ്പോള്‍ ദാരിദ്ര ഗ്രാമീണ ജനതയ്ക്ക് മുന്നില്‍ ആത്മഹത്യയല്ലാതെ മറ്റൊന്നുമല്ല വഴിതുറക്കുന്നത്. മൈക്രോ ഫിനാന്‍സ് സ്ഥാപനങ്ങള്‍ ഷേക്‌സ്പിയറിന്റെ വെനീസിലെ കച്ചവടക്കാരായി ഇന്ത്യന്‍ ഗ്രാമങ്ങളെ വളഞ്ഞിരിക്കുന്നുവെന്ന അവസ്ഥയില്‍ നിന്നുള്ള ശക്തമായ തിരുത്ത് അനിവാര്യമാകുന്നുണ്ടെന്ന് തന്നെയാണ് സമകാലിക അനുഭവങ്ങള്‍ പറയുന്നത്.

ആന്ധ്രയില്‍ ഓര്‍ഡിനസ്

ലഘുവായ്പ പദ്ധതിയിലൂടെ ദാരിദ്ര നിര്‍മ്മാര്‍ജ്ജനവും സ്ത്രീശാക്തീകരണവും സാധ്യമാക്കപ്പെടുമെന്നുള്ള കണക്കുക്കൂട്ടലിനേറ്റ തിരിച്ചടിയായിട്ടു വേണം ആന്ധ്രയില്‍ റിപ്പോര്‍ട്ട് ചെയ്യപ്പെട്ട ആത്മഹത്യകളെ കാണാന്‍. നിയന്ത്രണങ്ങളേതുമില്ലാതെയുള്ള മൈക്രോ ഫിനാന്‍സ് സ്ഥാപനങ്ങളുടെ പ്രവര്‍ത്തനങ്ങളാണ് ലഘുവായ്പ പദ്ധതിയുടെ ഉദ്ദേശ്യലക്ഷ്യങ്ങള്‍ക്ക് വിനയായത്. ഈ തിരിച്ചറിവിന്റെ പാശ്ചാത്തലത്തിലായിരിക്കണം മൈക്രോ ഫിനാന്‍സ് സ്ഥാപനങ്ങളുടെ പ്രവര്‍ത്തനങ്ങളില്‍ സര്‍ക്കാര്‍ ഇടപെടലുകള്‍ ഉറപ്പുവരുത്തുന്നതിനായുള്ള ആന്ധ്രപ്രദേശ് സര്‍ക്കാര്‍ ഓര്‍ഡിനന്‍സ്. 2010 ഒക്‌ടോബര്‍ നാലിന് പുറപ്പെടുവിച്ച ഓര്‍ഡിനന്‍സ് പ്രകാരം മൈക്രോ ഫിനാന്‍സ് സ്ഥാപനങ്ങള്‍ ജില്ല റൂറല്‍ വികസന അഥോറിറ്റിയില്‍ രജിസ്റ്റര്‍ ചെയ്യണം. സ്ഥാപനങ്ങള്‍ സര്‍വ്വ വിവരങ്ങളും രേഖപ്പെടുത്തുന്ന രജിസ്റ്റര്‍ സൂക്ഷിക്കണം. ഒരാള്‍ക്ക് ഒന്നില്‍ കൂടുതല്‍ സംഘങ്ങളില്‍ അംഗങ്ങളാകാന്‍ പാടില്ല. സ്ഥാപനങ്ങള്‍ വായ്പയ്ക്കായി സെക്യൂരിറ്റി ആവശ്യപ്പെടരുത്. പലിശ നിരക്ക് പരസ്യപ്പെടുത്തണം. സ്ഥാപനങ്ങള്‍ ബന്ധപ്പെട്ട അധികാരിക്ക് മുമ്പാകെ പ്രതിമാസ സ്റ്റേറ്റ്‌മെന്റ് സമര്‍പ്പിക്കണം. ബലപ്രയോഗത്തിലൂടെ വായ്പ തിരിച്ചടപ്പിക്കുന്നത് കുറ്റകരമാണ്.(19) മുഖ്യമായും പലിശ നിരക്ക് നിയന്ത്രിക്കാനുദ്ദേശിച്ചുള്ള ഇപ്പറഞ്ഞ വ്യവസ്ഥകളടങ്ങിയ ഓര്‍ഡിനന്‍സിനെതിരെ മൈക്രോ ഫിനാന്‍സ് സ്ഥാപനങ്ങള്‍ ആന്ധ്ര ഹൈക്കോടതിയെ സമീപിച്ചുവെങ്കിലും അത് ഫലം കണ്ടില്ല. ഇതിനിടെ, സംസ്ഥാനത്തെ ഒന്നാംനിര സ്ഥാപനങ്ങളായ എസ്.കെ.എസും സ്പന്ദനയും യഥാക്രമം രണ്ടു ശതമാനവും (26.69 ല്‍ നിന്ന് 24.55 ശതമാനം) മൂന്നു ശതമാനവും പലിശ കുറച്ചു. അന്യായ പലിശയില്‍ നിന്ന് പലിശയിലേക്കുള്ള മാറ്റമായിട്ടല്ല ഈ തീരുമാനമെന്ന് വ്യക്തം. ഓര്‍ഡിനന്‍സിനെ തുടര്‍ന്ന്, വായ്പാ തിരിച്ചടവ് കളക്ഷന്‍ 99 ല്‍ നിന്ന് 20 ശതമാനത്തിലേക്ക് (20) ചുരുങ്ങുവെന്നുള്ള ബോദ്ധ്യപ്പെടലാണ് ഈ തീരുമാനത്തിന് ആധാരം.

എഡിബി മുന്നറിയിപ്പ്

ഇന്ത്യയിലെ മൈക്രോ ഫിനാന്‍സ് സ്ഥാപനങ്ങളുടെ പ്രവര്‍ത്തനങ്ങളില്‍ സര്‍ക്കാര്‍ തല ഇടപെടലുകളുണ്ടായേക്കുമെന്ന് ഏഷ്യന്‍ വികസന ബാങ്ക് (എഡിബി) 2006 ല്‍ തന്നെ മുന്നറിയിപ്പ് നല്‍കുന്നുണ്ട്. ബാങ്കിന്റെ കിഴക്കനേഷ്യന്‍ ഡിപ്പാര്‍ട്ട്‌മെന്റ് 2006 ല്‍ പ്രസിദ്ധീകരിച്ച റിപ്പോര്‍ട്ടിലാണ് ഈ മുന്നറിയിപ്പ്. പലിശ നിയന്ത്രിയ്ക്കാനുദ്ദേശിച്ചുള്ള സര്‍ക്കാര്‍ ഇടപെടലുകള്‍ ദാരിദ്ര നിര്‍മ്മാര്‍ജ്ജന പദ്ധതികളില്‍ നിന്ന് മൈക്രോഫിനാന്‍സ് സ്ഥാപനങ്ങളെ പിന്തിരിപ്പിക്കും. ഈ സ്ഥാപനങ്ങള്‍ പ്രവര്‍ത്തനങ്ങള്‍ വ്യാപിപ്പിയ്ക്കാന്‍ മടിക്കും. ഇവയ്ക്ക് വായ്പ അനുവദിക്കുന്നതില്‍ ബാങ്കുകള്‍ വിമൂഖരാകും. ഇത് ആത്യന്തികമായി ദാരിദ്ര നിര്‍മ്മാര്‍ജ്ജന പദ്ധതിയെ അവതാളത്തിലാക്കുംഎഡിബി മുന്നറിയിപ്പ് നല്‍കുന്നു. ലഘുവായ്പാ മേഖലയിലെ അന്യായ പലിശനിരക്ക് നിയന്ത്രിക്കാതെ തന്നെ ദാരിദ്ര നിര്‍മ്മാര്‍ജ്ജനം സാധ്യമാകുമെന്ന എഡിബി നിലപാട്, അന്യായ പലിശനിരക്ക് സൃഷ്ടിച്ചുകൊണ്ടിരിക്കുന്ന സാമൂഹികസാമ്പത്തിക ദുരന്തങ്ങള്‍ക്ക് അറുതിയിടാനുതകുന്നതല്ല. അന്യായ പലിശ വസൂലാക്കല്‍ ലഘുവായ്പാ പദ്ധതി ഒഴിച്ചുകൂടാനാവാത്തതാണെന്ന എഡിബി പരോക്ഷവാദം ദാരിദ്ര നിര്‍മ്മാര്‍ജ്ജനത്തിലേക്കുള്ള ദൂരം ഇനിയും വര്‍ദ്ധിപ്പിക്കുന്നതിനേ ഉപകരിക്കൂ.

ഇന്ത്യന്‍ വാണിജ്യ ബാങ്കുകളുടെ പലിശ നിരക്കുമായി മൈക്രോ ഫിനാന്‍സ് സ്ഥാപനങ്ങളുടെ പലിശ നിരക്കുകളെ താരതമ്യം ചെയ്യുന്നതില്‍ യുക്തിയില്ലെന്നാണ് എഡിബി വാദം. വാണിജ്യ ബാങ്കുകള്‍ വന്‍കിട വായ്പകളാണ് അനുവദിക്കുന്നത്. അവ തിരിച്ച് ലഭ്യമാകുന്നതില്‍ വീഴ്ചകളുണ്ടാകുന്നില്ല. അതേസമയം മൈക്രോ ഫിനാന്‍സ് സ്ഥാപനങ്ങള്‍ അനുവദിക്കുന്നത് ചെറുവായ്പകള്‍. ഇതിന്റെ തിരിച്ചടവില്‍ നഷ്ട സാധ്യതകളേറെയാണ്. മൈക്രോ ഫിനാന്‍സ് സ്ഥാപനങ്ങളുടെ പലിശ നിരക്ക് നിയന്ത്രണങ്ങള്‍ക്കെതിരെ ഇത്തരം ന്യായീകരണങ്ങള്‍ നിരത്തുമ്പോഴും ഇവയുടെ പ്രവര്‍ത്തന ചെലവ് ന്യായയുക്തമാക്കുന്നതിന്റെ ദിശയില്‍ മൈക്രോ ഫിനാന്‍സ് സ്ഥാപനങ്ങളുടെ സാരഥികളും ഉന്നത ഉദ്യോഗസ്ഥരും കൈപ്പറ്റേണ്ടത് ന്യായമായ ശമ്പളവും ആനുകൂല്യങ്ങളുമായിരിക്കണമെന്ന നിര്‍ദ്ദേശങ്ങളൊന്നും എഡിബിയുടെ കിഴക്കനേഷ്യന്‍ ഡിപ്പാര്‍ട്ടുമെന്റ് റിപ്പോര്‍ട്ട് മുന്നോട്ടുവയ്ക്കുന്നില്ലെന്നത് പ്രത്യേകം ശ്രദ്ധേയം. എസ്.കെ.എസിനെപോലുള്ള സ്ഥാപനങ്ങള്‍ക്ക് ചുക്കാന്‍പിടിക്കുന്നവര്‍ കൈപ്പറ്റുന്ന കോടികളുടെ വാര്‍ഷിക ശമ്പളവും ആനുകൂല്യങ്ങളും ദരിദ്രര്‍ക്ക് അവര്‍ നല്‍കിയ വായ്പയില്‍ നിന്ന് അന്യായ പലിശ വസൂലാക്കികൊണ്ടാണെന്നുള്ള യാഥാര്‍ത്ഥ്യം ഇവിടേയും ചേര്‍ത്തുവായിക്കുക.

വായ്പാ തിരിച്ചടവുകള്‍ മന്ദഗതിയില്‍

മൈക്രോ ഫിനാന്‍സ് മേഖലയില്‍ ആന്ധ്ര സര്‍ക്കാര്‍ ഓര്‍ഡിനന്‍സ് സൃഷ്ടിച്ച അനിശ്ചിതാവസ്ഥയുടെ പ്രതിഫലനമെന്നോണം, എസ്.കെ.എസ് ഉള്‍പ്പെടെ 12 സ്ഥാപനങ്ങളെ ക്രിസില്‍ നെഗറ്റീവ് ലിസ്റ്റില്‍ ഉള്‍പ്പെടുത്തി നിരീക്ഷിച്ചുകൊണ്ടിരിക്കുകയാണെന്ന് റോയിട്ടേഴ്‌സ് (2010 നവംബര്‍ 22) റിപ്പോര്‍ട്ട് ചെയ്യുന്നു.(21)2010 മാര്‍ച്ച് 31 വരെ, പൊതു/സ്വകാര്യ മേഖലാ ബാങ്കുകള്‍ 1407 മൈക്രോ ഫിനാന്‍സ് സ്ഥാപനങ്ങള്‍ക്ക് 10,095.36 കോടി രൂപയുടെ വായ്പ നല്‍കിയിട്ടുണ്ട്. ഇതുകൂടാതെ എസ്‌ഐഡിബിഐ (SIDBI) 146 സ്ഥാപനങ്ങള്‍ക്ക് അനുവദിച്ചിട്ടുള്ളത് 3808.20 കോടി രൂപ(22). ആന്ധ്ര ഓര്‍ഡിന്‍സിന് ശേഷം മൈക്രോ ഫിനാന്‍സ് സ്ഥാപനങ്ങള്‍ക്ക് ലഭ്യമാകേണ്ട വായ്പ തിരിച്ചടവ് കളക്ഷനില്‍ കുത്തനെ കുറവുണ്ടായിട്ടുണ്ടെന്ന് (99 ല്‍ നിന്ന് 20 ശതമാനത്തില്‍) റിപ്പോര്‍ട്ടുകളുണ്ട്. ഇതില്‍ ഇന്ത്യന്‍ ബാങ്കിങ്ങ് മേഖല ആശങ്കപ്പെടുകതന്നെ വേണം. മൈക്രോ ഫിനാന്‍സ് സ്ഥാപനങ്ങള്‍ക്ക് തിരിച്ചടവ് കളക്ഷന്‍ കുറയുമ്പോള്‍ അത് സ്വാഭാവികമായും മൈക്രോ ഫിനാന്‍സ് സ്ഥാപനങ്ങളില്‍ നിന്ന് ബാങ്കുകള്‍ക്ക് ലഭ്യമാകേണ്ട വായ്പാ തിരിച്ചടവിനെ ബാധിച്ചേക്കും. അത് ഇന്ത്യന്‍ സമ്പദ് വ്യവസ്ഥയുടെ താളം തെറ്റിക്കും. ഇന്ത്യന്‍ കോപ്പറേറ്റ് സ്ഥാപനങ്ങള്‍ക്ക് ഇന്ത്യന്‍ ബാങ്കുകള്‍ വായ്പ വാരികോരി കൊടുക്കുന്നതിനു പിന്നിലെ, സ്‌പെക്ട്രം ഇടപാടിലടക്കം, അവിഹിത ഇടപ്പെടലുകളും കോടികളുടെ കിക്ക്ബാക്‌സുകളും വെളിച്ചത്ത് വരികയാണ്. ഇത്തരം പിന്നാമ്പുറം കഥകള്‍ മൈക്രോ ഫിനാന്‍സ് സ്ഥാപനങ്ങള്‍ക്ക് അനുവദിച്ചിട്ടുള്ള ആയിരക്കണക്കിന് കോടികളുടെ വായ്പാ ഇടപാടുകളില്‍ നിന്നും പുറത്തുവരുമെന്നത് അതിവിദൂരത്തായിരിക്കില്ല.

ഗ്രാമീണ മേഖലയില്‍ സാമ്പത്തിക സേവനം പ്രദാനം ചെയ്യുകയെന്നതാണ് ഇന്ത്യയിലെ റീജ്യണല്‍ റൂറല്‍ ബാങ്കുകളുടെ പ്രധാന ദൗത്യം. ഇവര്‍ കുറഞ്ഞ നിരക്കില്‍ വ്യക്തികള്‍ക്കും സ്വയം സഹായ സംഘങ്ങള്‍ക്കും വായ്പ നല്‍കാന്‍ ബാദ്ധ്യസ്ഥരാണ്. ഇതിനുപകരം, പക്ഷേ, ഇക്കഴിഞ്ഞ സാമ്പത്തിക വര്‍ഷത്തില്‍ മാത്രമായി 103 മൈക്രോ ഫിനാന്‍സ് സ്ഥാപനങ്ങള്‍ക്ക് 52.22 കോടി രൂപ വായ്പ നല്‍കിയിരിക്കുന്നു. മുന്‍ഗണന മേഖലയെന്ന നിലയില്‍ ഗ്രാമീണ വികസനത്തിനും കാര്‍ഷിക വായ്പകള്‍ക്കുമായി 60 ശതമാനം ബാങ്ക് വായ്പകള്‍ അനുവദിക്കണമെന്ന് അനുശാസിക്കുന്നുണ്ട്. എന്നാല്‍, മൈക്രോ ഫിനാന്‍സ് സ്ഥാപനങ്ങള്‍ക്ക് നല്‍കുന്ന വായ്പകളെല്ലാം ഈ മുന്‍ഗണനാ വായ്പാ പട്ടികയിലാണ് റിസര്‍വ്വ് ബാങ്ക് ഉള്‍പ്പെടുത്തുന്നത്.(23) ഗ്രാമീണ ജനതയ്ക്ക് നേരിട്ട് സാമ്പത്തിക സേവനമെത്തിക്കേണ്ട ഉത്തരവാദിത്വത്തില്‍ നിന്ന് ഒഴിഞ്ഞുമാറുന്ന ഇന്ത്യന്‍ ബാങ്കിങ്ങ് മേഖല വല്ലാത്തൊരു ഊരാകുടിലാണെന്ന് പറഞ്ഞാല്‍ അത് അതിശയോക്തിയാകില്ല. വായ്പാ മുന്‍ഗണന പട്ടികയിലുള്‍പ്പെടുത്തിയും അല്ലാതെയും മൈക്രോ ഫിനാനന്‍സ് സ്ഥാപനങ്ങള്‍ക്ക് നല്‍കിയ വായ്പ തിരിച്ചു ലഭിക്കണമെങ്കില്‍ ദാരിദ്ര ഗ്രാമീണ ജനവിഭാഗങ്ങളില്‍ നിന്ന് മൈക്രോ ഫിനാനന്‍സ് സ്ഥാപനങ്ങള്‍ക്ക് അന്യായ പലിശ വസൂലാക്കുവാന്‍ കൂട്ടുനില്ക്കണമെന്ന ഊരാക്കുടുക്കിലാണ് വര്‍ത്തമാന ഇന്ത്യന്‍ ബാങ്കിങ്ങ് മേഖല.

മൈക്രോഫിനാന്‍സ് സ്ഥാപനങ്ങള്‍ക്ക് വാണിജ്യ ബാങ്കുകള്‍ വായ്പകള്‍ അനുവദിക്കുന്നത് 8 മുതല്‍ 10 ശതമാനം പലിശ നിരക്കിലാണ്. ഇത്രയും താഴ്ന്ന നിരക്കില്‍ അനുവദിക്കപ്പെടുന്ന വായ്പയാണ് മൈക്രോ ഫിനാന്‍സ് സ്ഥാപനങ്ങള്‍ അന്യായ പലിശക്ക് ലഘുവായ്പയായി ഗ്രാമീണ ദരിദ്ര ജനവിഭാഗങ്ങള്‍ക്ക് നല്‍കുന്നത്. അതുകൊണ്ടുതന്നെ, കൊള്ള ലാഭമുണ്ടാക്കുവാനുള്ള ഉപകരണമാക്കി മാറ്റുവാന്‍ ഇന്ത്യന്‍ ഗ്രാമങ്ങളിലെ ദരിദ്ര ജനതയെ വിട്ടുകൊടുക്കുന്നതിന്റെ പാപഭാരത്തില്‍ നിന്ന് ഗ്രാമീണ മേഖലക്ക് സാമ്പത്തിക സേവനമെത്തിക്കാന്‍ ഉത്തരവാദിത്വപ്പെട്ട അതേസമയം കോര്‍പ്പറേറ്റ് മേഖലക്ക് വന്‍കിട വായ്പ നല്‍കുന്നതില്‍ ഏറെ വ്യാപൃതരാകുന്ന ഇന്ത്യന്‍ ബാങ്കിങ്ങ് മേഖലക്ക് ഒഴിഞ്ഞുനില്‍ക്കാനേയാകില്ല.

മൈക്രോ ഫിനാനന്‍സ് സ്ഥാപനങ്ങളെ നിയന്ത്രിക്കുന്നതിനു പകരം, കൂടുതല്‍ സ്ഥാപനങ്ങളെ ഉള്‍പ്പെടുത്തി മേഖലയെ മത്സര ക്ഷമമാക്കണമെന്നാണ് എഡിബി പറയുന്നത്. (24) എന്നാല്‍, ജാതിമതരാഷ്ട്രീയ സംഘടനകളടക്കമുള്ളവയുടെ ഈ മേഖലയിലേക്കുള്ള കടന്നുവരവ് ദരിദ്ര ജനവിഭാഗങ്ങള്‍ക്ക് വായ്പ ലഭ്യമാകുന്നതിനുള്ള ഏറെ സാധ്യതകളാണ് തുറന്നുനല്‍കിയിരിക്കുന്നത്. അതായത്, ഒരു സ്ഥാപനത്തില്‍ നിന്ന് കടമെടുത്ത് മറ്റൊന്നിന്റെ കടം വീട്ടുകയെന്ന അവസ്ഥ. വീട്ടുമുറ്റത്തെ ലഘുവായ്പാ സൗകര്യങ്ങളിലൂടെ മാത്രം നിത്യജീവിതം മുന്നോട്ടുകൊണ്ടുപോകാമെന്നവസ്ഥയില്‍ നാളെക്ക് വേണ്ടിയുള്ള ശ്വാശത സമ്പാദ്യമെന്നതിനെപ്രതി മുന്‍കരുതലുകളുണ്ടായേക്കില്ലെന്ന വസ്തുത കാണാതെ പോയികൂട.kudumbashree

ദരിദ്രര്‍ എക്കാലവും വായ്പാ സ്വീകര്‍ത്താക്കളായി നിലനിറുത്തപ്പെടേണ്ടവരെല്ലെന്നുള്ള ബോദ്ധ്യപ്പെടല്‍ മുഖ്യമാണ്. വായ്പാ ദാതാക്കളുടേയും സ്വീകര്‍ത്താക്കളുടെയും തോത് ഈ കൊടുക്കല്‍ വാങ്ങലുകളിലൂടെ നേര്‍ത്തുവരേണ്ടതുണ്ട്. അതായത്, ആശ്രയത്വത്തില്‍ നിന്ന് സ്വാശ്രയത്വത്തിലേയ്ക്കുള്ള ദരിദ്ര ജനവിഭാഗങ്ങളുടെ വളര്‍ച്ച ഉറപ്പിക്കപ്പെടണം. എങ്കില്‍ മാത്രമെ ദാരിദ്ര നിര്‍മ്മാര്‍ജ്ജനമെന്ന ലക്ഷ്യത്തിലെത്തിചേരാന്‍ ലഘുവായ്പ പദ്ധതിയ്ക്കാവൂ.

നിര്‍ദ്ദിഷ്ട മൈക്രോ ഫിനാന്‍സ് റെഗുലേഷന്‍ ബില്‍

ലഘു വായ്പയെടുത്തവരുടെ ആത്മഹത്യകളും തുടര്‍ന്നു ആന്ധ്ര സര്‍ക്കാര്‍ പുറപ്പെടുവിച്ച ഓര്‍ഡിനന്‍സും ദേശീയതലത്തില്‍ തന്നെ മൈക്രോ ഫിനാനന്‍സ് സ്ഥാപനങ്ങളുടെ പ്രവര്‍ത്തനങ്ങള്‍ ക്രമീകരിക്കാവാന്‍ ബില്‍ ആവശ്യമാണെന്ന് കേന്ദ്ര സര്‍ക്കാരിനെ ബോദ്ധ്യപ്പെടുത്തിയിട്ടുണ്ട്. ആത്മഹത്യകളെ തുടര്‍ന്ന്, റിസര്‍വ്വ് ബാങ്കും ഈ മേഖലയെകുറിച്ച് പഠിയ്ക്കാന്‍ ബാങ്ക് എക്‌സിക്യൂട്ടീവ് ഡയറക്ടര്‍ വൈ.എച്ച്.മെല്‍ഗം നേതൃത്വം നല്‍കുന്നസബ്ബ്കമ്മിറ്റിയെ നിയോഗിച്ചു്. സബ്ബ് കമ്മിറ്റി റിപ്പോര്‍ട്ട് സമര്‍പ്പിച്ചുവെങ്കിലും ദേശീയ മൈക്രോ ഫിനാന്‍സ് റെഗുലേഷന്‍ ബില്‍-2011 അനിച്ചിതാവസ്ഥയിലാണ്.

റിസര്‍വ്വ് ബാങ്കിന്റെ ഫെയര്‍ പ്രാക്ടീസ് കോഡ് മാത്രമാണ് ദേശീയ തലത്തില്‍ ഇപ്പോള്‍ മൈക്രോ ഫിനാനന്‍സ് സ്ഥാപനങ്ങള്‍ക്ക് ബാധകമാകുന്നത്. ഈ കോഡില്‍ പക്ഷേ പലിശ നിയന്ത്രണത്തെക്കുറിച്ച് ഒന്നു പറയുന്നില്ല. അതുകൊണ്ടുതന്നെ, മൈക്രോ ഫിനാന്‍സ് സ്ഥാപനങ്ങള്‍ നല്‍കിയിട്ടുള്ള ലഘുവായ്പകള്‍ക്കുമേല്‍ യഥേഷ്ടം പലിശ ചുമത്തുന്നു. ഈ അവസ്ഥക്ക് അറുതിയിടുന്നതില്‍ മൈക്രോ ഫിനാന്‍സ് റെഗുലേഷന്‍ ബില്‍-2011 പ്രത്യേകം ഊന്നല്‍ നല്‍കുമെന്നുതന്നെ പ്രതീക്ഷിക്കാം. അതേസമയം, ഈ ബില്‍ ഇന്ത്യന്‍ ബാങ്കുകള്‍ക്ക് മൈക്രോ ഫിനാനന്‍സ് സ്ഥാപനങ്ങള്‍ തിരിച്ചുനല്‍കേണ്ട കോടാനുകോടി വായ്പകള്‍ കൃത്യമായി ഒടുക്കപ്പെടുന്നതിന് തടസ്സമായി മാറുമോയെന്നത് കാത്തിരുന്നുകാണേണ്ടതാണ്.

മൈക്രോ സ്ഥാപനങ്ങളുടെ പിന്‍മാറ്റം

1996 ല്‍ പ്രവര്‍ത്തനമാരംഭിച്ച് കേരളത്തിലെ ലഘു വായ്പമേഖലയില്‍ ഏറെ ശ്രദ്ധയാര്‍ജ്ജിച്ച ആലപ്പുഴ ഗാന്ധി സ്മാരക സേവാ കേന്ദ്രത്തിന്റെ സെക്രട്ടറി കെ.ജി. ജഗദീശന്‍ ഈ ലേഖകന് 2002 ല്‍ അനുവദിച്ച അഭിമുഖ(25)ത്തില്‍ പറഞ്ഞതിങ്ങനെ, ….ഇപ്പോള്‍ ആറ് വില്ലേജ് വികസന കേന്ദ്രങ്ങളും ഒരു അര്‍ബന്‍ വികസന കേന്ദ്രവും നിലവിലുണ്ട്. ഇതിനെ ഭാവിയില്‍ ഒരു വിമന്‍സ് ബാങ്കായി ഉയര്‍ത്തിയതിനുശേഷം ഈ പ്രക്രിയ പൂര്‍ണ്ണമായും സ്ത്രീകളെ ഏല്പിക്കുകയെന്നതാണ് ഞങ്ങളുടെ ലക്ഷ്യം. ആ ഘട്ടത്തില്‍ സന്നദ്ധസംഘടനയായ ഞങ്ങള്‍ പിന്മാറും.എന്നാല്‍ ഗാന്ധി സ്മാരക സേവാ കേന്ദ്രത്തിന്റെ പിന്മാറ്റം ഇപ്പോഴും സാധ്യമായിട്ടില്ല. ഇതെന്തുകൊണ്ടെന്നതിനുള്ള ജഗദീശന്റെ വിശദീകരണം(26) ഇങ്ങനെ: സ്വരുകൂട്ടി വയ്ക്കപ്പെടുന്ന സോഷ്യല്‍ കേപ്പിറ്റലിന്റെ പിന്‍ബലത്തില്‍ ഒരു വിമന്‍സ് ബാങ്കെന്ന ലക്ഷ്യത്തില്‍ നിന്നു ഞങ്ങള്‍ വ്യതിചലിച്ചിട്ടേയില്ല. എന്നാല്‍, ഈ മേഖലയിലെ മൈക്രോ ഫിനാന്‍സ് സ്ഥാപനങ്ങളുടെ അഭൂതപൂര്‍വ്വമായ പെരുക്കം, പ്രത്യേകിച്ചും ജാതിമതരാഷ്ട്രീയ സംഘടനകളുടെ കടന്നുവരവ്, ഞങ്ങളുടെ പ്രതീക്ഷക്ക് വിലങ്ങുതടിയായി. ഈ ആശാസ്യമല്ലാത്ത അവസ്ഥയിലും പക്ഷേ വിമന്‍സ് ബാങ്കെന്ന ലക്ഷ്യസാധൂകരണ പ്രക്രിയ പുരോഗമിക്കുകയാണ്. 2012 നുള്ളില്‍ തന്നെ ഈ ലക്ഷ്യം പൂര്‍ത്തികരിക്കപ്പെടുമെന്നുള്ള ഉറച്ച വിശ്വാസത്തിലാണ് ഞങ്ങള്‍. ബാങ്കുകളെ വായ്പക്കായി ആശ്രയിക്കാതെ തന്നെ, ഞങ്ങള്‍ കെട്ടിപ്പടുത്തുണ്ടാക്കിയ അയല്‍ക്കൂട്ടങ്ങളുടെ വൈവിദ്ധ്യമാര്‍ന്ന വികസന പ്രവര്‍ത്തനങ്ങള്‍ക്ക് ചുക്കാന്‍പിടിക്കാന്‍ പ്രാപ്തിയുള്ള വീട്ടുമുറ്റത്തെ വിമന്‍സ് ബാങ്ക് രൂപപ്പെടുക തന്നെ ചെയ്യും.

വായ്പാ, സംരഭകത്വം, സമ്പാദ്യം തുടങ്ങിയ പന്ഥാവിലൂടെ സഞ്ചരിച്ച് ആത്യന്തികമായി സ്ത്രീശാക്തീകരണത്തിന്റെ പ്രൊഫഷണല്‍ മുഖം കൂടിയായിരിക്കും വീട്ടുമുറ്റത്തെ വനിതാ ബാങ്ക് സ്ഥാപിതമാകുന്നിടത്ത് വ്യക്തമാക്കപ്പെടുക. എക്കാലവും വായ്പയുടെ ഗുണഭോക്താക്കളാക്കുക എന്നതിനുപകരം സാമൂഹികസാമ്പത്തിക രംഗത്തെ സ്വാശ്രയത്വമാണ് ഊട്ടിവളര്‍ത്തേണ്ടത്. ഇക്കാര്യത്തില്‍ രാജ്യത്തെ തന്നെ മാതൃകയാകാന്‍ മൈക്രോ ഫിനാന്‍സ് സ്ഥാപനമായ ഗാന്ധിസ്മാരക സേവാകേന്ദ്രത്തിനാകുമെന്ന് പ്രതീക്ഷിയ്ക്കാം.

* ഇന്ത്യന്‍ ചരിത്ര ഗവേഷണ കൗണ്‍സിലില്‍ റിസര്‍ച്ച് സ്‌കോളറും കമ്മ്യൂണിറ്റി ബെയ്‌സ്ഡ് ഓര്‍ഗനൈസേഷന്‍, ഗ്രീന്‍ ഹാര്‍മണിയുടെ (www.green-harmony.org) ഗവേണിങ്ങ് ബോഡി മെമ്പറുമാണ് ലേഖകന്‍

Foot Notes
1.    www.sa-dhan.net/microfinancematters-agustissue.pdf
2.    www.sa-dhan.net/microfinancematters-agustissue.pdf
3.    Nabard status report of microfinance in India 2009-10
4.    Down to Earth, Rise of MFIs, 2010 November 30
5.    www.sa-dhan.net/microfinancematters-agustissue.pdf
6.    www.nabard.org/listofmfis.pdf
7.    http://indianmicrofinance.com
8.    www.wikipedia.org/microfinanc
9.    www.adb.org/microcredit.pdf
10.    www.sksindia.com
11.    http://dnaindia.com.money/comment
12.    http://devinder-sharma-blogspot.com/2010/11/norwegian-film-caught-in-microdebit.html
13.    www.wikipedia.org/microfinance
14.    Down to Earth, Profit from Poor, 2010 November 30
15.    A Route to Disaster, Frontline 2010, Nov 20-Dec.03
16.    www.intellecap.com/pdf.2010
17.    http://indianmicrofinance.com
18.    The Indian, 2010 November 22-28, Page 22
19.    http://indianmicrofinance.com/microsave-andhara-microfinance-720727301
20.    http://stockmarket today.in/2010/11/23
21.    http://in.reuters.com/article
22.    Nabard status report of microfinance in India 2009-10
23.    www.dnaindia.com, Daily News Analysis 2010 November 26
24.    www.adb.org/microcredit.pdf
25. 
സമീക്ഷ ദൈ്വവാരിക, കവര്‍‌സ്റ്റോറി ഓണം-2002 പേജ 13

26. ഫോണ്‍ സംഭാഷണം, 2010 ഡിസംബര്‍ 03

 KK Sreenivasan/കെ. കെ. ശ്രീനിവാസന്‍  

posted on September 2011….and it is re-posted without any changes made

The age-old government procedures needed to be simplified in order to make sure the time-bound service delivery.  E-governance with strong database and   total re-engineering of existing procedures are must in this regard. Existing procedures have to be re-engineered and then infuse the E-governance process. Otherwise E-governance process would not benefit as expected or projected…. 

 ജനനമരണ സര്‍ട്ടിഫിക്കറ്റുകള്‍ ലഭ്യമാകാന്‍ മാസങ്ങളോളം കാത്തിരിക്കേണ്ടിവരുന്നുവെന്ന ഖേദകരമായ അവസ്ഥയിലേക്ക് ബഹു. പഞ്ചായത്ത് മന്ത്രി ഡോ. എം.കെ. മുനീറിന്റെ ശ്രദ്ധ ക്ഷണിക്കുന്നു.

  ധുനിക ജനാധിപത്യ ഭരണക്രമത്തില്‍ പൊതുജനാഭിലാഷങ്ങളും ആവശ്യങ്ങളും പരമാവധി വേഗതയാര്‍ന്ന രീതിയില്‍ നിവര്‍ത്തിക്കപ്പെടുക എന്നത് പരമപ്രധാനമാണ്. പൊതുഭരണ സംവിധാനം കാര്യക്ഷമവും സുതാര്യവും ലളിതവുമാക്കപ്പെടുമ്പോഴാണ് ഇത് സുസാധ്യമാകുന്നത്. ഈ ലക്ഷ്യസാധൂകരണ ദിശയില്‍ പക്ഷേ ഭരണഉദ്യോഗസ്ഥതല – നടപടിക്രമങ്ങള്‍ പുന:ക്രമീകരിച്ച് ലളിതവല്‍ക്കരിക്കപ്പെട്ടിട്ടില്ല. ജനനമരണ സര്‍ട്ടിഫിക്കറ്റുകള്‍ അനുവദിക്കപ്പെടുന്നതിനുള്ള നടപടിക്രമങ്ങളിലെ നൂലാമാലകള്‍ ഇതിനൊരു ചെറിയ ദൃഷ്ടാന്തം മാത്രം.

 ഒരുകാലത്ത്, വീടുകളില്‍ ജനനമരണങ്ങള്‍ സംഭവിക്കുക എന്നത് സര്‍വ്വസാധാരണമായിരുന്നു. അവയൊക്കെത്തന്നെ പക്ഷേ, ബന്ധപ്പെട്ട തദ്ദേശസ്വയംഭരണ സ്ഥാപനങ്ങളില്‍ റജിസ്റ്റര്‍ ചെയ്യുന്നതില്‍ വേണ്ടത്ര നിഷ്കര്‍ഷത പുലര്‍ത്തിയിരുന്നില്ല. 1969 ലെ ജനനമരണ റജിസ്റ്റ്രേഷനുമായി ബന്ധപ്പെട്ട കേന്ദ്ര സര്‍ക്കാര്‍ നിയമത്തിന് സംസ്ഥാന സര്‍ക്കാര്‍ ചട്ടങ്ങളും നടപടിക്രമങ്ങളും രൂപപ്പെടുത്തുന്നത് 1970ല്‍ മാത്രമാണ്. ജനനമരണങ്ങള്‍ തദ്ദേശസ്വയംഭരണ സ്ഥാപനങ്ങളില്‍ റജിസ്റ്റര്‍ ചെയ്യപ്പെടേണ്ടതിന്റെ നിയമപരമായ അനിവാര്യതെയകുറിച്ചുള്ള അവബോധം പൊതുജനങ്ങളില്‍ ഊട്ടിഉറപ്പിക്കപ്പെട്ടിട്ട് ഏറെ കാലമായിട്ടുണ്ടെന്നും പറയാനാകില്ല. ജനനം റജിസ്റ്റര്‍ ചെയ്യാതിരുന്നവര്‍ ഇപ്പോള്‍ റജിസ്റ്റര്‍ ചെയ്യുവാന്‍ മന്നോട്ട് വരുന്നുണ്ടെന്നത് ശ്രദ്ധേയം. അത്തരക്കാര്‍ക്ക് തദ്ദേശസ്വയംഭരണ സ്ഥാപന മേലാധികാരി നോന്‍ അവയല്ബള്‍ സര്‍ട്ടിഫിക്കറ്റ് അനുവദിക്കണം. നോന്‍ അവയല്ബള്‍ സര്‍ട്ടിഫിക്കറ്റ് അനുവദിക്കപ്പെടുന്നതിനു മുന്നോടിയായ സമര്‍പ്പിക്കുന്ന അപേക്ഷ തൊട്ടടുത്തുളള തദ്ദേശസ്വയംഭരണ സ്ഥാപനങ്ങളിലേക്ക് പഞ്ചായത്ത് അയ്ക്കുന്നു അപേക്ഷക/ന്‍ ഇവയില്‍ നിന്ന് ഇതിനുമുമ്പ് ജനന സര്‍ട്ടിഫിക്കറ്റ് കൈപ്പറ്റിയിട്ടില്ലെന്നുറുപ്പുവരുത്താന്‍. ഇതിനുളള മറുപടി ബന്ധപ്പെട്ട തദ്ദേശസ്വയംഭരണ സ്ഥാപനങ്ങളില്‍ നിന്ന് ലഭിക്കുകയെന്നത് ഒട്ടും തന്നെ എളുപ്പമല്ല. മറുപടി സമയബന്ധിതമായി ഉറുപ്പുവരുത്താന്‍ നോന്‍ അവയല്ബള്‍ സര്‍ട്ടിഫിക്കറ്റ് അനുവദിക്കേണ്ട പഞ്ചായത്തിനാകട്ടെ ഒട്ടുമേ ബാധ്യതയില്ലാത്ത അവസ്ഥ!

 നോണ്‍ അവയല്ബള്‍ സര്‍ഫിക്കറ്റ് ലഭ്യമാകാന്‍ തദ്ദേശസ്വയംഭരണ സ്ഥാപന മേലാധികാരിക്ക് സമര്‍പ്പിക്കുന്ന അപേക്ഷയോടൊപ്പമുളള സത്യവാങ്മൂലത്തില്‍ ഗസറ്റഡ് ഓഫീസറുടെ ഒപ്പും ഔദ്യോഗിക സീലും നിര്‍ബന്ധം. ഇക്കാര്യത്തിലാകട്ടെ ഗസറ്റഡ് ഓഫീസറുമാരിലേറെയും തയ്യാറല്ലതാനും. നീണ്ട കാത്തിരിപ്പിനൊടുവില്‍ നോണ്‍ അവയലബിള്‍ സര്‍ട്ടിഫിക്കറ്റ് ലഭ്യമായതിനുശേഷവും തദ്ദേശസ്വയംഭരണ സ്ഥാപനങ്ങളിലും വില്ലേജ്, തഹസില്‍ദാര്‍,ആര്‍.ഡി.ഒ ഓഫീസുകളിലും അപേക്ഷകര്‍ നിരന്തരം കയറിയിറങ്ങണം.

 അപേക്ഷകരില്‍ ഏറെയും വൃദ്ധ മാതാപിതാക്കളാണ്. തങ്ങളുടെ മക്കളുടെ ജനന സര്‍ട്ടിഫിക്കറ്റിന് വേണ്ടിയായിരിക്കും അപേക്ഷ. തദ്ദേശസ്വയംഭരണ സ്ഥാപന സെക്രട്ടറി, ഗസറ്റഡ് ഓഫീസര്‍, വില്ലേജ് ഓഫീസര്‍, തഹസില്‍ദാര്‍, ആര്‍.ഡി.ഒ തുടങ്ങിയ ഉദ്യോഗസ്ഥരുടെ മുന്നില്‍ ഈ വൃദ്ധമാതാപിതാക്കള്‍ നേരിട്ട് ഹാജരാകണമെന്നതും നിര്‍ബന്ധം. തന്റെ കുട്ടിയുടെ ജനനം ആശുപത്രയിലില്ല വസതിയില്‍ വച്ചുതന്നെയായിരുന്നുവെന്ന് ബോധ്യപ്പെടുത്തുന്നതിനായി വില്ലേജ് ഓഫീസറുടെ മുമ്പാകെ അപേക്ഷക/ന്‍ അയല്‍വാസികളായ രണ്ട് വൃദ്ധരെ സാക്ഷികളായി ഹാജരാക്കണം! ജനനസര്‍ട്ടിഫിക്കറ്റ് അനുവദിക്കപ്പെടല്‍ ഇത്തരം നടപടിക്രമങ്ങളുടെ നൂലാമാലകളിലാണെന്നത് അത്യന്തം ഖേദകരമാണ്. ഉദ്യോഗസ്ഥരുടെ അനാസ്ഥയും അലംഭാവവും കൂടിയാകുമ്പോള്‍ ജനന സര്‍ട്ടിഫിക്കറ്റ് ലഭ്യമാകാന്‍ അനന്തമായി കാത്തിരിക്കേണ്ടിവരുന്നു. നടപടിക്രമങ്ങളിലെ നൂലാമാലകള്‍ മറികടക്കുന്നിടത്ത് അഴിമതിക്കിയിടം ലഭിക്കുന്നുവെന്നത് സ്വഭാവികം!

 ആദ്യ കാലങ്ങളിലൊക്കെ സ്ക്കൂള്‍ പ്രവേശന വേളയില്‍ ജനന സര്‍ട്ടിഫിക്കറ്റ് ഹാജരാക്കണമെന്ന് നിര്‍ബന്ധമാക്കപ്പെട്ടിരുന്നില്ല. മാതപിതാക്കള്‍ പറയുംപ്രകാരമാണ് സ്ക്കൂള്‍ രേഖകളില്‍ കുട്ടിയുടെ ജനനതിയ്യതി ചേര്‍ക്കപ്പെട്ടിരുന്നത്. പിന്നീട് കുട്ടിയുടെ എസ്. എസ്. എല്‍. സി. ബുക്കിലും ഇതേ ജനനതിയ്യതിയാണ് രേഖപ്പെടുത്തുക. ഇന്ത്യന്‍ പാസ്പോര്‍ട്ട് ലഭ്യമാകുന്നതിനുള്ള അപേക്ഷയോടൊപ്പം വയസ്സ് തെളിയിക്കുന്നതിനായി സമര്‍പ്പിക്കപ്പെടുന്നത് ഇതേ എസ്. എസ്. എല്‍. സി. ബുക്കിന്റെ സാക്ഷ്യപ്പെടുത്തിയ പകര്‍പ്പ്. അതായത് പാസ്പോര്‍ട്ടിലെ ജനനതിയ്യതി എസ്. എസ്. എല്‍. സി. ബുക്കിലേതു തന്നെ. ഉന്നത വിദ്യാഭ്യാസ പ്രവേശനവേളയിലും ജനനതിയ്യതി തെളിയിക്കുന്നതിനുള്ള ഔദ്യോഗിക രേഖയായി പരിഗണിക്കപ്പെടുന്നത് എസ്. എസ്. എല്‍. സി. ബുക്ക്. എംപ്ലോയ്‍മെന്റ് ഓഫീസ് രേഖകളില്‍ ചേര്‍ക്കുന്നതും പബ്ലിക് സര്‍വ്വീസ് കമ്മീഷന്‍ ഉദ്യോഗാര്‍ത്ഥികളുടെ വയസ്സ് തിട്ടപ്പെടുത്തുന്നതും എസ്. എസ്. എല്‍. സി. ബുക്ക് പ്രകാരം. നടപടിക്രമങ്ങളുടെ നീണ്ട കടമ്പകള്‍ കടന്ന് അനുവദിക്കപ്പെടുന്ന ജനന സര്‍ട്ടിഫിക്കറ്റില്‍ രേഖപ്പെടുത്തുന്നത് എസ്. എസ്. എല്‍. സിബുക്കിലെ ജനനതിയ്യതിയാണെന്നത് പ്രത്യേകം ശ്രദ്ധേയം. യുറോപ്പ് അമേരിക്കന്‍ രാജ്യങ്ങലേക്ക് പോകാന്‍ ജനന സര്‍ട്ടിഫിക്കറ്റ് ആവശ്യമാണ്. മുഖ്യമായും നേഴസ്മാര്‍ തുടങ്ങിയവരാണ് ഇവിടങ്ങലേക്ക് പോകുന്നത്. ഇന്ത്യയിലേക്ക് , പ്രത്യേകിച്ചും കേരളത്തിലേക്ക് അയ്ക്കൂന്ന ഡോളറൂം യുറോയും സമ്പദ്വ്യവസ്ഥയെ ശക്തിപ്പെടുത്തുന്നുവെന്നത് കാണാതെ പോയ്ക്കൂട. ആദ്യ കാലങ്ങളില്‍ ജനനം റജിസ്റ്റര്‍ ചെയ്യാതിരുന്നവര്‍ ഇപ്പോള്‍ റജിസ്റ്റര്‍ ചെയ്യുവാന്‍ മന്നോട്ട് വരുന്നു. ഇവരിലേറെയും ഇങ്ങനെ അനുവദിക്കപ്പെടുന്ന ജനന സര്‍ട്ടിഫിക്കറ്റ് ഉപയോഗിച്ച് പക്ഷേ കളള പാസ്പോര്‍ട്ടെടുത്ത് തിവ്രവാദ പ്രവര്‍ത്തനത്തിലേര്‍പ്പെട്ടേക്കൂമന്നെ പൊതൂവെയുളള മൂന്‍വിധി തിരുത്തപ്പെടണം.

ആദ്യ കാലങ്ങളില്‍ ജനനമരണങ്ങള്‍ തദ്ദേശസ്വയംഭരണ സ്ഥാപനങ്ങളില്‍ റജിസ്റ്റര്‍ ചെയ്യപ്പെടേണ്ടതിന്റെ നിയമപരമായി നിഷ്കര്‍ഷത പുലര്‍ത്തിയിരുന്നില്ലെന്നതൂം അതിന്റെ അനിവാര്യതെയകുറിച്ചുള്ള അവബോധമില്ലായ്മയൂം മൂഖവിലക്കെടൂത്ത്, ജനന സര്‍ട്ടിഫിക്കറ്റ് അനുവദിക്കുന്നിലെ നടപടിക്രമങ്ങള്‍ ലളിതവല്‍ക്കരിക്കണം. ജനന റജിസ്റ്റാര്‍ക്കുള്ള ജനന സര്‍ട്ടിഫിക്കറ്റിനായുള്ള അപേക്ഷയോടൊപ്പം ബന്ധപ്പെട്ട വില്ലേജോഫീസര്‍ അനുവദിക്കുന്ന റസിഡന്‍ല്‍ സര്‍ട്ടിഫിക്കറ്റ് (അനിവാര്യമെങ്കില്‍ മാത്രം), എസ്. എസ്. എല്‍. സി. ബുക്കിന്റെ സാക്ഷ്യപ്പെടുത്തിയ പകര്‍പ്പ്, അവശ്യംവേണ്ട കോര്‍ട്ട്ഫീ സ്റ്റാമ്പ്/മുദ്രപത്രം എന്നിവ സമര്‍പ്പിക്കുന്ന അപേക്ഷകന് കാലവിളംബമില്ലാതെ ജനന സര്‍ട്ടിഫിക്കറ്റ് അനുവദിക്കപ്പെടേണ്ടതുണ്ട്. ഈ ദിശയില്‍ നടപടിക്രമങ്ങള്‍ അടിയന്തിരമായി ലളിതവല്‍ക്കരിക്കണം. ഇനി അഥവാ നോണ്‍ അവയല്ബിള്‍ സര്‍ട്ടിഫിക്കറ്റ് അനിവാര്യമെങ്കില്‍ അത് അനുവദിക്കുമ്പോള്‍, പ്രത്യേകിച്ചും 1970നു മുമ്പുളളുവര്‍ക്ക് (സര്‍ക്കാര്‍ ചട്ടങ്ങള്‍ നിലവില്‍ വരുന്നതിന് മുമ്പ് ജനിച്ചവര്‍ക്ക്), തദ്ദേശസ്വയംഭരണ മേലാധികാരികള്‍ മുഖ്യമായും പരിഗണിക്കേണ്ട രേഖ എസ്. എസ്. എല്‍. സി. ബുക്ക് തന്നെയായിരിക്കണം. തടസവാദങ്ങള്‍ നിരത്തി ബ്യൂറോക്രസിയുടെ അനാസ്ഥയ്ക്കും അലംഭാവത്തിനും അഴിമതിക്കും ഇരകളാകാന്‍ പൊതുജനങ്ങളെ വിട്ടുകൊടുക്കുകയില്ലെന്ന് നിശ്ചയദാര്‍ഢ്യം പ്രകടിപ്പിക്കുന്ന സര്‍ക്കാരാണ് ജനാധിപത്യഭരണക്രമത്തില്‍ മാതൃകാസര്‍ക്കാരെന്ന ഖ്യാതിയ്ക്ക് അര്‍ഹരാകുന്നത്.

 

കെ.കെ. ശ്രീനിവാസന്‍/ KK Sreenivasan

This research paper, full text,  discusses the impacts of Edward Snowdan’s revelation in the international politics   and the feeble state of Indian IT sector and Malayalam Weekly has published the same as cover story  in the issue of  August 07, 2013Malayalam Varika, issue 2013 aug 07

എന്‍.എസ്.എയുടെ പ്രിസം പദ്ധതിയുമായി സഹകരിക്കുന്ന മൈക്രോസോഫ്റ്റുപോലുള്ള അമേരിക്കന്‍ കമ്പനികളില്‍ നിന്ന് രാഇ്യത്തിന്റെ ഡിജിറ്റല്‍ ശേഖരങ്ങള്‍ പെന്റഗണിന്റെ കമ്പ്യൂട്ടറുകളിലെത്തിപ്പെടുകയില്ലെന്ന് ഒരുറപ്പുമില്ല

edwardമേരിക്കന്‍ സാമ്രാജ്യത്വം, വിവരസാങ്കേതിക വിദ്യാവികസനം, ജനാധിപത്യം, സുരക്ഷ, സ്വകാര്യത, ധാര്‍മ്മികത തുടങ്ങിയവയിലൂന്നിയുള്ള സംവാദങ്ങളും ചര്‍ച്ചകളും നിരീക്ഷണങ്ങളും വിലയിരുത്തലുകളും അമേരിക്കയുടെ സെന്‍ട്രല്‍ ഇന്റിലജന്‍സ് ഏജന്‍സിയുടെ (സി.ഐ.എ) മുന്‍ ജീവനക്കാരനും അമേരിക്കന്‍ പൗരനുമായ എഡ്വേര്‍ഡ് സ്‌നോഡന്റെ വെളിപ്പെടുത്തലുകളില്‍ നിന്നുയരുന്നു. സ്‌നോഡന്‍ ചോര്‍ത്തികൊടുത്ത അമേരിക്കന്‍ രഹസ്യ രേഖകളുടെ പിന്‍ബലത്തില്‍ പ്രസിദ്ധീകരിച്ച അന്വേഷണാത്മക റിപ്പോര്‍ട്ടില്‍ പ്രധാനപ്പെട്ട വസ്തുതകള്‍ വെളിപ്പെടുത്താന്‍ ഗാഡിയന്‍ ദിനപത്രം മടിക്കുന്നുണ്ടോയെന്ന സംശയവുമുയരുന്നു. ഇതിലുപരി വിവര സാങ്കേതിക വിദ്യാരംഗത്ത് വന്‍ കുതിച്ചുചാട്ടം നടത്തിയെന്ന ഇന്ത്യയുടെ അവകാശവാദത്തിന്റെ പൊള്ളത്തരംകൂടി തുറന്നുകാണിക്കുന്നുണ്ട് സ്‌നോഡന്റെ വെളിപ്പെടുത്തല്‍.

അന്തര്‍ദേശീയ അധികാര രാഷ്ട്രീയ സമവാക്യങ്ങളില്‍ രാഷ്ട്രങ്ങള്‍ തമ്മിലുള്ള അധികാര കിടമത്സരങ്ങള്‍ പ്രകടം. ശീത സമരക്കാലത്ത് (Cold War) ഒരു ഭാഗത്ത് അമേരിക്കയുടെ നേതൃത്വത്തില്‍ മുതലാളിത്ത സാമ്രാജ്യത്ത ശക്തികളും മറുഭാഗത്ത് സോവിയറ്റ് യൂണിയന്റെ നേതൃത്വത്തില്‍ കമ്മ്യൂണിസ്റ്റ് രാഷ്ട്രങ്ങളും ഒളിഞ്ഞും തെളിഞ്ഞും മുതലാളിത്ത-കമ്മ്യൂണിസ്റ്റ് രാഷ്ട്രങ്ങള്‍ പോരാട്ടങ്ങളിലേര്‍പ്പെട്ടു. ഈ ഇരു ശാക്തീക ചേരികളുടെ നേതൃത്വത്തില്‍ ഇരുധ്രുവ ലോകമെന്ന (Bipolar World) അവസ്ഥയാണ് ശീതസമര വേളയില്‍ ലോകജനത കണ്ടത്.

ശീതസമരം മൂര്‍ദ്ധന്യത്തില്‍ നക്ഷത്ര യുദ്ധ (Star Wars) തന്ത്രങ്ങള്‍ പോലും മെനയപ്പെട്ടു. 1980 കളുടെ അന്ത്യത്തില്‍ പക്ഷേ സോവിയറ്റ് യൂണിയന്‍ ശിഥിലീകരിക്കപ്പെട്ടു. അതോടെ അമേരിക്കന്‍ ആധിപത്യത്തില്‍ കീഴില്‍ ഏകധ്രുവ ലോക (Uni Polar) മെന്ന പുത്തന്‍ ലോക ക്രമം (New World Order) ഏറെക്കൂറെ നിലവില്‍ വന്നു. എന്നാല്‍ 2001 സെപ്തംബര്‍ 11 ലെ അമേരിക്കക്കെതിയുള്ള ഭീകരാക്രമണത്തോടെ ഏകധ്രുവലോകമെന്ന അവസ്ഥക്കുമേല്‍ കരിനിഴല്‍ വീണു. ഇതോടെ ബഹുധ്രുവ ലോക (Multi Polar World) മെന്നവസ്ഥ സംജാതമായി.

’90 കളുടെ തുടക്കത്തില്‍ വിവര സാങ്കേതിക വിദ്യാവിസ്‌ഫോടനം. ഒപ്പം ആഗോളവത്കരണ-ഉദാരവത്കരണ പ്രക്രിയയിലൂടെ നവ സാമ്പത്തിക ക്രമ (New Economic Order)വും. അതോടെ അന്തര്‍ദേശീയ ഫിനാന്‍സ് മൂലധനത്തിന്റെ കയറ്റുമതി-ഇറക്കുമതികള്‍ ശരവേഗത്തിലായി. മുതലാളിത്ത – കമ്മ്യൂണിസ്റ്റ് രാഷ്ട്രങ്ങളെന്ന വകഭേദങ്ങളില്ലാതെ കമ്മ്യൂണിസ്റ്റ് രാഷ്ട്രമെന്നവകാശപ്പെടുന്ന ചൈനപോലും അമേരിക്കയടക്കമുള്ള മുതലാളിത്ത സാമ്പത്തിക ശക്തികളുടെ മൂലധന കമ്പോളമായി. അമേരിക്കന്‍-യൂറോപ്യന്‍ വിപണികള്‍ ചൈനയടക്കമുള്ള വികസ്വര രാഷ്ട്രങ്ങള്‍ക്കുമുന്നില്‍ മലര്‍ക്കെ തുറക്കപ്പെട്ടു. ഈ അവസ്ഥയില്‍ ആഗോള മേധാവിത്വത്തിനായി അത്യന്താധുനികവും പരമ്പരാഗതവുമായ സൈനിക ശേഷികളുയുപയോഗിച്ചുള്ള വെട്ടിപ്പിടുത്തങ്ങളോട് അമേരിക്കയടക്കമുള്ള വന്‍കിട ശക്തികള്‍ക്ക് പൊതുവേ സുല്ലുപറയേണ്ടിവന്നു. അതേസമയം ആഗോള മേധാവിത്വമെന്ന അടങ്ങാത്ത മോഹം പാടെ ഉപേക്ഷിക്കുവാനും വയ്യാത്തവസ്ഥ.

ഐടി വികസന രംഗത്ത് വന്‍ കുതിച്ചുചാട്ടം നടത്തിയ അമേരിക്ക സൈബര്‍ ആക്രമണ (Cyber attack/war) ങ്ങളിലൂടെ ലോകത്തെ വീണ്ടും തങ്ങളുടെ അധീശത്വത്തിലാക്കുവാന്‍ ഐ.ടി അധിഷ്ഠിത തന്ത്രങ്ങള്‍ മെനഞ്ഞ് അവ കൃത്യമായി വിനിയോഗിക്കുന്നു. അമേരിക്കന്‍ ഭരണകൂടങ്ങള്‍ (ബുഷ്-ഒബാമ ഭരണകൂടങ്ങള്‍) പിന്നിട്ട ഒരു പതീറ്റാണ്ടിലധികമായി തങ്ങളുടെ പൗരന്മാരുടേയും അന്യ രാഷ്ട്രങ്ങളുടെയും ഡിജിറ്റല്‍ വിവര ശേഖര (Digital data base) ങ്ങള്‍ ചോര്‍ത്തിയെടുത്തുവെന്ന എഡ്വേര്‍ഡ് സ്‌നോഡന്റെ വെളിപ്പെടുത്തല്‍ ഒരിക്കല്‍ പാതിവഴിയില്‍ ഉപേക്ഷിക്കപ്പെട്ട നക്ഷത്ര യുദ്ധത്തിനുപകരം സൈബര്‍ യുദ്ധ/ആക്രമണ തന്ത്രങ്ങള്‍ ബുഷ് മുതല്‍ ഒബാമ വരെയുള്ള അമേരിക്കന്‍ ഭരണകൂടങ്ങള്‍ വിനിയോഗിക്കുകയാണ്. ആഗോള ഭീകരവാദത്തിന്റെ മറവില്‍ സൈബര്‍ ആക്രമണമുറകളിലൂടെ മറ്റു രാഷ്ട്രങ്ങളുടെ ഡിജിറ്റല്‍ ശേഖരങ്ങള്‍ പോലും കൊള്ളയടിക്കുന്നതിന് പിന്നില്‍ (ശേഖരിക്കുന്നതിനുപിന്നില്‍) പ്രതിപ്രവര്‍ത്തിക്കുന്നത് അമേരിക്ക ഇപ്പോഴും വെച്ചുപുലര്‍ത്തുന്ന ആഗോളാധിപത്യമെന്ന അടങ്ങാത്തമോഹം തന്നെയാണെന്ന് വ്യാഖ്യാനിക്കേണ്ടിവരും.

വ്യക്തി സ്വാതന്ത്ര്യത്തിനുമേല്‍ കൂച്ചുവിലങ്ങിടുന്നവരെന്ന അപഖ്യാതി കമ്മ്യൂണിസ്റ്റ് രാഷ്ട്രങ്ങളിലെ ഭരണകൂടങ്ങള്‍ക്കെതിരെ എക്കാലത്തും ശക്തമാണ്. അതേസമയം ഉദാര ജനാധിപത്യ (Liberal Democracy) വ്യവസ്ഥ പിന്തുടരുന്ന അമേരിക്ക എക്കാലത്തും പൗര സ്വാതന്ത്ര്യത്തിന്റെ പതാകവാഹകരാണെന്ന് അവകാശപ്പെടുന്നു. പക്ഷേ 48 വിദേശ രാഷ്ട്രങ്ങളുടെ ഡിജിറ്റല്‍ വിവര ശേഖരങ്ങള്‍ ചോര്‍ത്തിയെന്നതിനോടൊപ്പം ഫെയ്‌സ് ബുക്ക്, മൈക്രോസോഫ്റ്റ്, ആപ്പിള്‍, ഗൂഗിള്‍ എന്നീ സൈബര്‍ ഭീമന്മാരെ ആശ്രയിക്കുന്ന 121 മില്യന്‍ സ്വന്തം പൗന്മാരുടേയും ഡിജിറ്റല്‍ വിവരശേഖരങ്ങള്‍ അമേരിക്ക ചോര്‍ത്തിയെന്നതുകൂടി പുറത്തുവന്നിട്ടുണ്ട്.(1) പൗര സ്വാതന്ത്ര്യത്തിലേക്കും അവകാശങ്ങളിലേക്കും കടന്നുകയറാന്‍ ഉദാര ജനാധിപത്യവാദികളെന്ന് അവകാശപ്പെടുന്ന അമേരിക്കന്‍ ഭരണകൂടത്തിന് മടിയില്ലെന്നാണ് ഇതിലൂടെ വെളിവാക്കപ്പെട്ടത്.

ഗാര്‍ഡിയന്‍ വെളിപ്പെടുത്തല്‍

അമേരിക്കയുടെ ദേശീയ സുരക്ഷ ഏജന്‍സി (NSA) മൈക്രോസോഫ്റ്റ്, ഗൂഗിള്‍, ഫെയ്‌സ്ബുക്ക്, ആപ്പിള്‍, യു ട്യൂബ്, എഒഎല്‍ (American On Line), സ്‌കൈപ്പ് തുടങ്ങിയ അമേരിക്കന്‍ കമ്പനികളില്‍ നിന്ന് ഇന്ത്യയുള്‍പ്പെടെയുള്ള രാഷട്രങ്ങളുടെ അതീവ രഹസ്യരേഖകള്‍ ചോര്‍ത്തിയെടുത്തിട്ടുണ്ടെന്ന ബ്രിട്ടനിലെ ഗാര്‍ഡിയന്‍ ദിനപത്രത്തിന്റെ അന്വേഷണാത്മക റിപ്പോര്‍ട്ട് അന്തര്‍ദേശീയ നയതന്ത്ര രംഗത്ത് ഏറെ വിവാദങ്ങള്‍ക്കും അസ്വാരസ്യങ്ങള്‍ക്കും വഴിവെച്ചിരിക്കുകയാണ്. അമേരിക്കന്‍ പൗരനും മുന്‍ സിഐഎ ജീവനക്കാരനുമായ എഡ്വേര്‍ഡ് സ്‌നോഡന്‍ ചോര്‍ത്തിക്കൊടുത്ത രഹസ്യരേഖകളെ ആധാരമാക്കിയാണ് ഗാഡിയന്‍ ദിനപത്ര റിപ്പോര്‍ട്ട്. ഫിസ (Foriegn Intelligence Surveillance Court) യില്‍ അമേരിക്കന്‍ അറ്റോര്‍ണി ജനറല്‍ എറിക് ഹോ ള്‍ഡര്‍ 2009 ജൂലായ് 29ന് ഒപ്പുവെച്ച് സമര്‍പ്പിച്ച രണ്ട് അതീവ രഹസ്യ രേഖകളാണ് സ്‌നോഡനിലൂടെ ഗാര്‍ഡിയന്‍ ദിനപത്രം വെളിച്ചത്തുകൊണ്ടുവന്നത്.(2)

പ്രിസം (PRISM) എന്ന പേരിലറിയപ്പെടുന്ന പദ്ധതിയിലൂടെ രാഷ്ട്രങ്ങളുടെ ഡിജിറ്റല്‍ ശേഖരങ്ങള്‍ എന്‍എസ്എയുടെ രഹസ്യനിരീക്ഷണ വലയത്തിലകപ്പെട്ടു. സര്‍ച്ച് ഹിസ്റ്ററി, ഇ-മെയില്‍ ഉള്ളടക്കം, ഫയലുകള്‍, ലൈവ് ചാറ്റുകള്‍ എന്നീ ഡിജിറ്റല്‍ ശേഖരങ്ങളാണ് പെന്റഗണിന്റെ കമ്പ്യൂട്ടറുകളിലെത്തിയത്. 2007 മുതല്‍ല്‍ തന്നെ പ്രിസം പദ്ധതി പ്രകാരം തങ്ങളുടെ ഉപയോക്താക്കളുടെ ഡിജിറ്റല്‍ വിവര ശേഖരങ്ങള്‍ എന്‍.എസ്.എയുമായി പങ്കുവയ്ക്കാമെന്ന കരാറില്‍(3) മൈക്രോസോഫ്റ്റ് ഏര്‍പ്പെട്ടിരുന്നു. ഇതേ ചുവടുപിടിച്ച് ഗൂഗിള്‍, ഫെയ്‌സ്ബുക്ക്, പാല്‍ടോക്ക്, യു ട്യൂബ്, സ്‌കൈപ്പ്്, എ.ഒ.എല്‍, ആപ്പിള്‍ എന്നിവയും – ഗാര്‍ഡിയന്‍ വെളിപ്പെടുത്തുന്നു.

എന്‍എസ്എ വികസിപ്പിച്ചെടുത്തിട്ടുള്ള അനന്തമായ വിവരങ്ങള്‍ നല്‍കുന്നയാള്‍ (Boundless Informant)(4) എന്ന് വിളിക്കപ്പെടുന്ന ഡിജിറ്റല്‍ വിവര ഖനന/ശേഖരണ സാമഗ്രി (Data Mining Tool) യുടെ പൂര്‍ണ്ണ വിശദാംശങ്ങള്‍ തങ്ങളുടെ പക്കലുണ്ടെന്ന് ഗാര്‍ഡിയന്‍ പറയുന്നുണ്ട്. ഈ സാമഗ്രി ഉപയോഗിച്ച് വിവരങ്ങള്‍ ചോര്‍ത്താന്‍ ലക്ഷ്യമിടുന്ന രാഷ്ട്രത്തെ ഭൂപടത്തില്‍ തെരഞ്ഞെടുക്കുവാനും അതിന്റെ ഡിജിറ്റല്‍ വിവരങ്ങള്‍ ചോര്‍ത്തിയെടുക്കാനാകും. ഒരു രാഷ്ട്രത്തില്‍ നിന്ന് എത്ര ഡിജിറ്റല്‍ രേഖകള്‍ ശേഖരിച്ചുവെന്നും ശേഖരിച്ച രേഖകള്‍ ഏത് തരത്തിലുള്ളവയാണെന്നും ഈ സാമഗ്രിയിലൂടെ മനസ്സിലാക്കാം. 2013 മാര്‍ച്ചില്‍ മാത്രമായി എന്‍എസ്എ ലോകവ്യാപകമായ കമ്പ്യൂട്ടര്‍ നെറ്റ്‌വര്‍ക്കുകളില്‍ നിന്നും 97 ബില്യണ്‍ രഹസ്യ വിവരങ്ങള്‍ ശേഖരിച്ചിട്ടുണ്ട്. ഏത് തരത്തിലുള്ള ഡിജിറ്റല്‍ രേഖ ശേഖരിച്ചുവെന്ന് അറിയാന്‍ കഴിയുമെന്ന് പറയു േമ്പാള്‍ തന്നെ ശേഖരിച്ച ഡിജിറ്റല്‍ രേഖകളുടെ/ആശയ വിനിമയങ്ങളുടെ സ്വഭാവ/ഉളളടക്കമെന്താണെന്നതിനെപ്രതി ഗാഡിയന്‍ നിശബ്ദത പുലര്‍ത്തുന്നു!

തന്ത്രപ്രധാന ഡിജിറ്റല്‍ വിവരശേഖരങ്ങള്‍ സുരക്ഷിതമോ?

2013 മാര്‍ച്ചില്‍ മാത്രമായി പ്രിസം പദ്ധതിയിലൂടെ മൈക്രസോഫ്റ്റ്, ഗൂഗിള്‍, ഫെയ്‌സ്ബുക്ക്, ആപ്പിള്‍, യാഹൂ സെര്‍വ്വറുകളില്‍ നിന്ന് ഇന്ത്യയുടെ 6.3 ബില്യണ്‍ ഡിജിറ്റല്‍ വിവര ശേഖരങ്ങള്‍ ചോര്‍ത്തിയെടുക്കപ്പെട്ടിട്ടുണ്ടെന്നാണ് 2013 ജൂണ്‍ 11 ലെ ഗാര്‍ഡിയന്‍ റിപ്പോര്‍ട്ട് പറയുന്നത്. അമേരിക്കയിലെ ഇന്ത്യന്‍ നയതന്ത്ര കാര്യാലയത്തിന്റെ വാഷിങ്ടണ്‍ ദൗത്യങ്ങള്‍(5) അമേരിക്കന്‍ ദേശീയ സുരക്ഷാസമിതി രഹസ്യ നിരീക്ഷണ വലയത്തിലാണെന്നുകൂടിയുള്ള സ്‌നോഡന്റെ വെളിപ്പെടുത്തല്‍ ഇന്ത്യയുടെ തന്ത്രപ്രധാനമായ ഡിജിറ്റല്‍ വിവരശേഖരങ്ങളും അമേരിക്കന്‍ ചോര്‍ത്തിയിട്ടുണ്ടെന്നന്ന അതീവ ഗൗരവമേറിയ സംശയങ്ങള്‍ അവശേഷിപ്പിക്കുന്നുണ്ട്. ഇന്ത്യയുടെ ഡിജിറ്റല്‍ ശേഖരങ്ങള്‍ എന്തിനുവേണ്ടി ചോര്‍ത്തി? ഏത് തരത്തിലുള്ളവ ചോര്‍ത്തി? ചോര്‍ത്തിയെടുത്ത വിവരങ്ങളുടെ അടിസ്ഥാനത്തില്‍ അമേരിക്കയുടെ അടുത്ത നീക്കമെന്താണ്? ഇത്തരം അതീവ ഗൗരവമേറുന്ന സംശയങ്ങളാണ് ഗാഡിയന്‍ ദിനപത്രത്തിന്റെ റിപ്പോര്‍ട്ടുകള്‍ അവശേഷിപ്പിക്കുന്നത്.

രാജ്യരക്ഷ, കമ്മ്യൂണിക്കേഷന്‍ ആന്റ് ടെലികമ്മ്യൂണിക്കേഷന്‍, എനര്‍ജി ആന്റ്പവര്‍, ഫി നാന്‍സ്-ബാങ്കിങ്ങ് ആന്റ് ഇന്‍ഷൂറന്‍സ്, ഗവേണന്‍സ് ആന്റ് അഡിമിനിസ്‌ട്രേഷന്‍, ഹോം അഫയേഴ്‌സ്-ദേശീയ സുരക്ഷ, സയന്‍സ് ആന്റ് ടെക്‌നോളജി, ബയോ ഡൈവേഴ്‌സിറ്റി, അറ്റമിക് എനര്‍ജി ബോര്‍ഡ്, അറ്റമിക് എനര്‍ജി കമ്മീഷന്‍, അറ്റമിക് എനര്‍ജി ഡിപ്പാര്‍ട്ട്‌മെന്റ് തുടങ്ങിയ ഒട്ടനവധി കേന്ദ്ര/സംസ്ഥാന സര്‍ക്കാരുകളുടെ വെബ്‌സൈറ്റുകള്‍ ഹോസ്റ്റ് ചെയ്യപ്പെട്ടിട്ടുള്ളത് ഇന്ത്യന്‍ ഇന്‍ഫര്‍മേറ്റിക് സെന്ററിന്റെ ഉടമസ്ഥതയിലും നിയന്ത്രണത്തിലുമുള്ള nic.in, gov.in, ac.in(6) തുടങ്ങിയ ഇന്ത്യനധിഷ്ഠിത സെര്‍വറുകളിലാണെന്നാണ് പൊതുവേ കാണപ്പെടുന്നത്.

തങ്ങളുടെ ഉപയോക്താക്കളുടെ ഡിജിറ്റല്‍ വിവരശേഖരങ്ങള്‍ പ്രിസം പദ്ധതിയുമായി പങ്കുവയ്ക്കുന്ന മൈക്രോസോഫ്റ്റ് പോലുള്ള അമേരിക്കന്‍ ഐടി ഭീമന്‍മാരുടെ സോഫ്റ്റുവെയറുകളെയും ഹാര്‍ഡ്‌വെയറുകളെയുമാണ് രാജ്യത്തിന്റെ തന്ത്രപ്രധാനമായ സ്ഥാപനങ്ങളും വെബ്‌സൈറ്റുകളും ദേശീയ ഇ-ഗവേണന്‍സ് പ്രക്രിയയുമെല്ലാം പ്രധാനമായും ആശ്രയിക്കുന്നത്. അതിനാല്‍ രാജ്യത്തിന്റെ തനത് സെര്‍വറുകളില്‍ സൂക്ഷിക്കപ്പെട്ടിട്ടുള്ള ഡിജിറ്റല്‍ വിവര ശേഖരങ്ങളും അമേരിക്കന്‍ ഭരണകൂടത്തിന്റെ രഹസ്യാന്വേഷണ വിഭാഗം ചോര്‍ത്തിയെടുത്തുവെന്ന സംശയം സ്‌നോഡന്റെ വെളിപ്പെടുത്തലുകളില്‍ നിന്ന് വായിച്ചെടുക്കേണ്ടിവരും.

സ്‌നോഡന്‍ വെളിപ്പെടുത്തിയ വിവരങ്ങള്‍ ശരിയാണെങ്കില്‍ സൈബര്‍ ആയുധമെന്ന നിലയില്‍ സ്റ്റക്‌സ്‌നെറ്റ് (STUXNET)(7) എന്ന ഇന്റര്‍നെറ്റ് വേം  അമേരിക്കയും ഇസ്രായേലും ചേര്‍ന്ന് ഇറാന്റെ അണുഗവേഷണ കേന്ദ്രങ്ങളിലെ സെന്‍ട്രിഫ്യൂജുകള്‍ താറുമാറാക്കാന്‍ എഴുതിയുണ്ടാക്കിയിട്ടുണ്ട്. ഇന്ത്യയടക്കമുള്ള രാജ്യങ്ങളിലെ ഫാക്ടറികള്‍, റെയില്‍വേ, വിദ്യുച്ഛക്തി വിതരണം തുടങ്ങിയവയെല്ലാം പ്രവര്‍ത്തനരഹിതമാക്കുവാനും അണുഗവേഷണ കേന്ദ്രങ്ങളടക്കം അട്ടിമറിക്കാനും പ്രാപ്തമാണത്രേ ഇത്തരം വേമുകള്‍.

ഇറാനില്‍ നിന്നാണ് ഏറ്റവും കൂടുതല്‍ മെറ്റാഡാറ്റാ (META DATA ) എന്നു വിളിക്കപ്പെടുന്ന ഡിജിറ്റല്‍ ആശയ വിനിമയ ശേഖരങ്ങള്‍ (14 ബില്യണ്‍)(8) ചോര്‍ത്തിയെടുക്കപ്പെട്ടിട്ടുള്ളത്. ഇറാനും അമേരിക്കയും തമ്മിലുള്ള നയതന്ത്ര ബന്ധത്തിലെ വിള്ളലുകള്‍ ലോക സമാധാനത്തിനുപോലും ഭീഷണിയായേക്കാമെന്നവസ്ഥയാണ്. അതുകൊണ്ടുതന്നെ ഇറാനില്‍ നിന്നും ചോര്‍ത്തിയെടുക്കപ്പെട്ടിട്ടുള്ള ഡിജിറ്റല്‍ വിവര ശേഖരങ്ങളുടെ സ്വഭാവമെന്തായിരിക്കുമെന്ന് ഊഹിക്കാവുന്നതേയുള്ളൂ.

ജൂലീയിന്‍ അസാംജറിന്റെ വിക്കിലീക്‌സ് വെളിച്ചത്തുകൊണ്ടുവന്നത് ചോര്‍ത്തിയെടുക്കപ്പെട്ട കേബിളുകളുടെ ഉളളടക്കമാെണന്നിരിക്കെ യഥാര്‍ത്ഥത്തില്‍ ഗാര്‍ഡിയന്‍ ദിനപത്രത്തിന്റെ വെളിപ്പെടുത്തലില്‍ മുഖ്യമായും ഊന്നേണ്ടിയിരുന്നത് ചോര്‍ത്തിയെടുക്കപ്പെട്ടുവെന്ന് പറയുന്ന ഡിജിറ്റല്‍ വിവരശേഖരങ്ങളുടെ സ്വഭാവ/ഉളളടക്കമാണ്. കേവലം ഡിജിറ്റല്‍ വിവര ശേഖരങ്ങള്‍ ചോര്‍ത്തിയെന്നത് പൗരന്മാരുടെ ഡിജിറ്റല്‍ സുരക്ഷയിലേക്കും സ്വകാര്യതയിലേക്കുമുള്ള കടന്നുകയറ്റമെന്ന പാതകത്തിനപ്പുറം പോകുന്നില്ല. അതേസമയം പരമാധികാര രാഷ്ട്രങ്ങളുടെ അതീവ തന്ത്രപ്രധാനമായ ഡിജിറ്റല്‍ വിവര ശേഖരങ്ങള്‍ ചോര്‍ത്തിയെടുക്കപ്പെട്ടിട്ടുണ്ടോയെന്ന സംശയമാണിവിടെ കനംവയ്ക്കുന്നത്.

ഇന്ത്യയുടെ ഡിജിറ്റല്‍ ശേഖരങ്ങള്‍ ചോര്‍ത്തിയെടുത്തുവെന്നത്തി്‌ലെ പ്രതിഷേധം അമേരിക്കന്‍ വിദേശകാര്യ സെക്രട്ടറി ജോണ്‍ കെറിയുടെ ഇന്ത്യാസന്ദര്‍ശന വേളയില്‍ ഇന്ത്യന്‍ വിദേശകാര്യമന്ത്രി സല്‍മാന്‍ ഖുര്‍ഷിദ് അറിയിച്ചുവെന്നത് ശ്രദ്ധേയം. ഈ പ്രതിഷേധത്തില്‍ ഇന്ത്യയുടെ തന്ത്രപ്രധാനമായ സ്ഥാപനങ്ങളുടെകൂടി ഡിജിറ്റല്‍ വിവരങ്ങള്‍ അമേരിക്ക ചോര്‍ത്തിയെടുത്തിട്ടുണ്ടെന്ന് സംശയത്തെ ശക്തിപ്പെടുത്തപ്പെടുത്തുന്നില്ലേ? സ്‌നോഡന്റെ വെളിപ്പെടുത്തലുകളില്‍ ഇന്ത്യയുടെ തന്ത്രപ്രധാനമായ ഡിജിറ്റല്‍ വിവര ശേഖരങ്ങള്‍ ചോര്‍ത്തിയെടുക്കപ്പെട്ടുവെന്ന് ഒളിഞ്ഞുകിടക്കുന്നുണ്ടെങ്കില്‍ അത് ഇന്ത്യയുടെ പരമാധികാരത്തിനുമേലുള്ള അമേരിക്കയുടെ കടന്നുകയറ്റം തന്നെയാകും.

ഡിജിറ്റല്‍ സുരക്ഷയും സ്വകാര്യതയും

ഇന്ത്യയിപ്പോള്‍ നികുതിപണം സ്വീകരിക്കുന്നത് ഇ-ഫയിലിങ്ങിലൂടെയാണ്. ഇതിനുപയോഗിക്കുന്ന സോഫ്റ്റ്‌വെയറുകള്‍ അമേരിക്കന്‍ സോഫ്റ്റുവെയര്‍ കമ്പനിയായ മൈക്രോസോഫ്റ്റിന്റെ ഓപ്പറേറ്റിങ്ങ് സിസ്റ്റമുള്ള കമ്പ്യൂട്ടറുകളില്‍ മാത്രമേ പ്രവര്‍ത്തിക്കൂയെന്ന അവസ്ഥയാണ്. ഇവിടെ രാജ്യം പിരിച്ചെടുക്കുന്ന നികുതിപണത്തിന്റെ നല്ലൊരുഭാഗം ഇ-ഗവേണന്‍സിന്റെ പേരില്‍ ആഗോള ഐടി കുത്തക കമ്പനികളുടെ കൈകളിലെത്തിച്ചേരുന്നത് വാതായനം (‘Windows’) ഭരണകൂടം തന്നെ മലര്‍ക്കെ തുറന്നുവച്ചിരിക്കുന്നു. ഇതിലുപരി രാജ്യത്തിന്റെ വരുമാനം സംബന്ധിച്ച ഡിജിറ്റല്‍ വിവര ശേഖരങ്ങള്‍ മൈക്രോസോഫ്റ്റ് പോലുള്ള വിദേശ ഐടി കമ്പനികള്‍ക്ക് എപ്പോള്‍ വേണമെങ്കിലും യഥേഷ്ടം കയറിയിറങ്ങാനാകുമെന്ന അവസ്ഥയുമുണ്ട്.data centre

സ്വകാര്യ സ്ഥാപനങ്ങളും വ്യക്തികളും എന്തിനധികം പൊതുമേഖല-അര്‍ദ്ധ സര്‍ക്കാര്‍ സ്ഥാപനങ്ങളും മുഖ്യമായും ആശ്രയിക്കുന്നത് അമേരിക്കനധിഷ്ഠിത ഹോസ്റ്റ് ഗേറ്റര്‍ ( Host Gator ), ഗോഡാഡി (Godady) , ജസ്റ്റ് ഹോസ്റ്റ് (Just Host) , ഐ പേജ് (I Page), നെറ്റ്‌വര്‍ക്ക് സൊല്യൂഷന്‍ (Network Solution) തുടങ്ങിയ സെര്‍വറുകളേയാണ്.(9) പൊതുവേ ഇത്തരം സെര്‍വ്വറുകളെ ആശ്രയിക്കുന്നവര്‍ക്ക് പൂര്‍ണ്ണമായ ഡിജിറ്റല്‍ സുരക്ഷയും സ്വകാര്യതയുമുണ്ടെന്ന് ഉറപ്പിച്ചുപറയാനാകില്ല. കാരണം അവരുടെ ഡിജിറ്റല്‍ വിവര ശേഖരങ്ങള്‍ ഈ വിദേശ സെര്‍വര്‍ ഉടമകളുടെ നിയന്ത്രണത്തിലാണ്. ഇവര്‍ക്ക് തങ്ങളുടെ സെര്‍വറുകളില്‍ ഹോസ്റ്റ് ചെയ്യപ്പെട്ടിട്ടുള്ള ഡിജിറ്റല്‍ വിവര ശേഖരങ്ങള്‍ ചോര്‍ത്തിയെടുക്കാവുന്നതേയുള്ളൂ.

ബാച്ചിലര്‍ പാര്‍ട്ടിയും ഡിജിറ്റല്‍ സ്വകാര്യതയും

രസകരമെന്നു പറയട്ടെ, സ്‌നോഡന്റെ വെളിപ്പെടുത്തലുകള്‍ക്കു മുമ്പേ തന്നെ നമ്മുടെ കേരളത്തില്‍ തന്നെ സര്‍ക്കാരിന്റെ മുന്‍കൈയില്‍ വ്യക്തികളുടെ ഡിജിറ്റല്‍ സ്വത്വത്തിലേക്ക് കടന്നു കയറിയിട്ടുണ്ടെന്നതിന് തെളിവുകളുണ്ട്. ബാച്ചിലര്‍ പാര്‍ട്ടിയെന്ന മലയാള സിനിമ ഇന്റര്‍നെറ്റില്‍ അപ്‌ലോഡ് ചെയ്തവര്‍ക്കും അത് ഡൗണ്‍ലോഡ് ചെയ്ത് കണ്ടവര്‍ക്കുമെതിരെ 2012 സെപ്തംബര്‍ 09 ന് കേരളാ പോലീസിന്റെ ആന്റി പൈറസി വിഭാഗം 1010 പേര്‍ക്കെതിരെ കേസെടുത്തു. കേസെടുക്കപ്പെട്ടവരുടെ ഇന്റര്‍നെറ്റ് പ്രോട്ടോകോള്‍ മേല്‍വിലാസം (ഐ.പി അഡ്രസ്) ചോര്‍ത്തിയെടുത്താണ് ഇത്രയും പേര്‍ക്കെതിരെ സിനിമ കണ്ടുവെന്ന കുറ്റം ചുമത്തി പോലീസ് കേസ്സെടുത്തത്.

കൊച്ചിയിലെ ഒരു സ്വകാര്യ ഐ.ടി. സ്ഥാപനത്തെയാണ് വ്യക്തികളുടെ ഐ.പി അഡ്രസ്സുകള്‍ ചോര്‍ത്തി വ്യക്തികളുടെ ഡിജിറ്റല്‍ സ്വത്വത്തിലേക്ക് കടന്നുകയറുവാനുള്ള ചുമതലയേല്പിക്കപ്പെട്ടത്. വ്യക്തിയുടെ സ്വകാര്യതയിലേക്കുള്ള കടന്നുകയറ്റം കടുത്ത മനുഷ്യാവകാശ ലംഘനമായിട്ടാണ് നിയമപരമായി തന്നെ ഗണിക്കപ്പെടുന്നത്. മനുഷ്യാവകാശങ്ങളുടെ സംരക്ഷകരാകേണ്ടവരാണ് ഭരണകൂടവും അതിന്റെ കാവല്‍ക്കാരുമായ പോലീസും. ഇവര്‍ തന്നെ പൗരന്മാരുടെ സ്വകാര്യതയിലേക്ക് കടന്നുകയറുന്നതിനുള്ള ചുമതല ഒരു സ്വകാര്യ ഐടി സ്ഥാപനത്തെ ഏല്പിച്ചുവെന്നത് പൗരസമൂഹത്തോടുള്ള കടുത്ത വെല്ലുവിളിയല്ലാതെ മറ്റെന്താണ്?

കേരളത്തിലെ രാഷ്ട്രീയ പ്രവര്‍ത്തകര്‍, എം.പിമാര്‍, പ്രധാനപ്പെട്ട വ്യക്തിത്വങ്ങള്‍, പത്രപ്രവര്‍ത്തകര്‍ തുടങ്ങിയ 268 പേരുടെ ഇ-മെയിലുകള്‍ കേരള പോലീസ്് ചോര്‍ത്തിയെന്നുള്ള മാധ്യമ റിപ്പോര്‍ട്ടിലും (2011 ജനുവരി) തെളിഞ്ഞത് ഇന്റര്‍നെറ്റ് ഉപയോക്താക്കളുടെ ഡിജിറ്റല്‍ സുരക്ഷയിലേക്കും സ്വകാര്യതയിലേക്കും നമ്മുടെ സര്‍ക്കാരുകള്‍ ഇടതടവില്ലാതെ കന്നുകയറുന്നുവെന്നുതാണ്. കേരളത്തില്‍ തീവ്രവാദ/ഭീകരവാദ പ്രവര്‍ത്തനങ്ങള്‍ വേരോടുന്നുണ്ടോയെന്ന അന്വേഷണത്തിന്റെ ഭാഗമായി ഇ-മെയിലുകള്‍ ചോര്‍ത്തേണ്ടിവന്നുവെന്നാണ് സര്‍ക്കാരിന്റെ ന്യായീകരണം. ആളിപ്പടരുന്ന വിവാദ സോളാര്‍ കേസ് അന്വേഷണവുമായി ബന്ധപ്പെട്ട് മൊബൈല്‍ ഫോണ്‍വിളികളുടെ വിവരങ്ങള്‍ ചോര്‍ത്തിയതിനും സര്‍ക്കാര്‍ വക ന്യായീകരണങ്ങളുണ്ട്. സ്‌നോഡന്റെ വെളിപ്പെടുത്തലിനെ തുടര്‍ന്ന് ഇത്തരത്തിലുള്ള (തൊടു) ന്യായങ്ങള്‍ തന്നെയാണ് ആഗോള നയതന്ത്ര തലങ്ങളില്‍ അമേരിക്കന്‍ ഭരണകൂടവും നിരത്തുന്നത്.

ഐഐഎമ്മിനെതിരെ സൈബര്‍ ആക്രമണം

അമേരിക്കന്‍ ഭരണകൂടത്തിന്റെ സൈബര്‍ ആക്രമണങ്ങളുടെ പശ്ചാത്തലത്തില്‍ രാജ്യത്തെ ഉന്നത വിദ്യാഭ്യാസരംഗത്തെ ഇന്ത്യന്‍ ഇന്‍സ്റ്റിറ്റിയൂട്ട് ഓഫ് മാനേജ്‌മെന്റിന്റെ പൊതുപ്രവേശന പരീക്ഷ (Common Admission Text – CAT) യുടെ വെബ്ബ്‌സൈറ്റ് സൈബര്‍ ആക്രമണത്തിന് വിധേയമാക്കപ്പെട്ടുവെന്നത് ശ്രദ്ധേയമാണ്. ഐഐഎം (Indian Institute of Management) അടക്കമുള്ള രാജ്യത്തെ 170 ബി- സ്കൂളുകളി (Business Management Schools) ലേക്കുള്ള വിദ്യാര്‍ത്ഥി പ്രവേശനം പൊതുപ്രവേശന പരീക്ഷയിലെ റാങ്ക് ലിസ്റ്റ് പ്രകാരമാണ്. ‘ക്യാറ്റ്’ റാങ്ക് ലിസ്റ്റ് വെബ്ബ്‌സൈറ്റില്‍ www.catiim.in അപ്പ്‌ലോഡ് ചെയ്യപ്പെട്ടത്തിന് ശേഷം റാങ്ക് ലിസ്റ്റില്‍ ഗുരുതരമായ പിശക് കണ്ടെത്തി. വെബ്ബ്‌സൈറ്റിലുള്ള മാര്‍ക്കും അടിസ്ഥാന വിവരശേഖരത്തിലെയും മാര്‍ക്കില്‍ അന്തരം ശ്രദ്ധയില്‍പ്പെട്ടതോടെയാണ് ക്യാറ്റിന്റെ വെബ്ബ്‌സൈറ്റ് ആക്രമിക്കപ്പെട്ടുവെന്ന് ബോധ്യപ്പെട്ടത്.

ക്യാറ്റിനുവേണ്ടി വെബ്ബ്‌സൈറ്റ് നിര്‍മ്മിച്ചുനല്‍കിയിട്ടുള്ളത് യുപിയിലെ ഗാസിയാബാദിലുള്ള വെബ്ബ് വീവേഴ്‌സ് (Web weavers) എന്ന സ്വകാര്യ ഐടി സ്ഥാപനമാണ്. ഐഐഎമ്മിന്റെ ക്യാറ്റ് വെബ്‌സൈറ്റ് ഐടി കണ്‍സള്‍ട്ടന്റാണ്് കഴിഞ്ഞ മൂന്നുവര്‍ഷമായി വെബ്ബ് വീവര്‍. വെബ്ബ്‌സൈറ്റിലെ മാര്‍ക്ക് തിരുത്തിയതുമായി ബന്ധപ്പെട്ട് കോഴിക്കോട് പോലീസ്് രജിസ്റ്റര്‍ ചെയ്ത കേസ്സിന്റെ അന്വേഷണം തുടരുകയാണ്. ഐപിസി 420 വകുപ്പും ഐടി ആക്ട് 65-ാം വകുപ്പു പ്രകാരമുള്ള കേസ്സന്വേഷണത്തില്‍ വെബ്ബ് വീവര്‍ കമ്പനി ഉടമകളായ ഹസനും അഫ്ക്യൂവിനും വേണ്ടി ദില്ലി പോലീസിന്റെ സഹായത്താല്‍ കേരള പോലീസ് വലവിരിച്ചിരിക്കുകയാണ്. ഇതിനിടെ കേസ്സന്വേഷണം സിബിഐക്ക് കൈമാറിയിട്ടുണ്ട്.

രാജ്യത്തെ ഉന്നത വിദ്യാഭ്യാസ സ്ഥാപനങ്ങളുടെ ഉന്നത ശ്രേണിയിലുള്‍പ്പെട്ട ഐഐഎം പോലും തങ്ങളുടെ ഡിജിറ്റല്‍ ശേഖരങ്ങള്‍ ഭദ്രമായി കാത്തുസൂക്ഷിക്കുന്നതില്‍ ദയനീയമായി പാരാജയപ്പെടുന്നു! ഇതിലുപരി ക്യാറ്റിന്റെ വൈബ്ബ്‌സൈറ്റ് ഹോസ്റ്റ് ചെയ്യപ്പെട്ടിരിക്കുന്നത് അമേരിക്കന്‍ ഐടി സ്ഥാപനമായ ഹോസ്റ്റ് ഹേറ്റര്‍ (Name Server: ns2077.Hostgator.com, ns2078. Hostgator.com) ന്റെ സെര്‍വ്വറിലാണുതാനും. അമേരിക്കന്‍ ആസ്ഥാനമായുള്ള സെര്‍വറുകളില്‍ നിന്ന് അമേരിക്കയുടെ പ്രിസം പദ്ധതി പ്രകാരം ഇന്ത്യയടക്കമുള്ള രാജ്യങ്ങളിലുള്ളവരുടെ ഡിജിറ്റല്‍ ശേഖരം ചോര്‍ത്തിയെടുക്കുന്നു. ഈ പശ്ചാത്തലത്തില്‍ അമേരിക്കന്‍ സെര്‍വറില്‍ ഹോസ്റ്റ് ചെയ്യപ്പെട്ടിട്ടുള്ള ഡിജിറ്റല്‍ ശേഖരങ്ങള്‍ കൊള്ളയടിക്കപ്പെടുകയില്ലെന്ന് ഐഐഎം പോലുള്ള രാജ്യത്തെ ഉന്നത വിദ്യാഭ്യാസ കേന്ദ്ര നടത്തിപ്പുക്കാര്‍ക്ക് ഉറപ്പിക്കുവാനാകുമോയെന്നറിയില്ല.

ഇന്റര്‍നെറ്റ് സമ്പദ്‌വ്യവസ്ഥ

പഴയകാല കൈമാറ്റ സമ്പ്രദായത്തില്‍ (Barter System) നിന്നും ഉദയംകൊണ്ട സമ്പദ്‌വ്യവസ്ഥകള്‍ നൂറ്റാണ്ടുകളുടെ പരിണാമ ഘട്ടങ്ങള്‍ പിന്നിട്ട് ഇന്ന് ഓണ്‍ലൈന്‍ കൊടുക്കല്‍വാങ്ങലുകളുടെ ഇന്റര്‍നെറ്റ് സമ്പദ്‌വ്യവസ്ഥ (Internet Economy)(10) പിറവിയെടുത്തിരിക്കുന്നു. ഡിജിറ്റല്‍ സ്വത്വ പരിപാലന (Digital Indentity Management- Idm) മെന്നതിന്റെ അനിവാര്യത ആഗോള തലത്തില്‍ ഇതിനകം തന്നെ കൃത്യമായി തിരിച്ചറിഞ്ഞിട്ടുണ്ട്. രാഷ്ട്ര നയരൂപീകരണ കര്‍ത്താക്കള്‍ സാമ്പത്തികസഹകരണവികസന സംഘടന (ഛrganization for Economic, Cooperation and Development- OECD)(11) യൂടെ ആഭിമുഖ്യത്തില്‍ 2008 ജൂണ്‍ 17,18 തിയ്യതികളില്‍ സിയോളില്‍ മന്ത്രിതല യോഗം ചേര്‍ന്ന് ഐഡിഎമ്മിന്റെ അനിവാര്യതയിലൂന്നി കൂലംകഷമായി ചര്‍ച്ച ചെയ്ത് സിയോള്‍ മന്ത്രിതല പ്രഖ്യാപനം നടത്തി.

ഇന്റര്‍നെറ്റ് മൊബൈല്‍ ബാങ്കിങ്ങുകള്‍, ഇകോമേഴ്‌സ്, ക്രെഡിറ്റ്-ഡബിറ്റ് കാര്‍ഡ് ഇടപാടുകള്‍ തുടങ്ങിയ മാധ്യമങ്ങളിലൂടെയാണ് ഇന്റര്‍നെറ്റ് സമ്പദ്‌വ്യവസ്ഥ ശക്തിപ്പെടുന്നത്. ഇതില്‍ പക്ഷേ സുരക്ഷയും സ്വകാര്യതയും ദുര്‍ബ്ബലമാക്കപ്പെടുന്നുവെന്ന കടുത്ത ആശങ്കകളുണ്ട്. ഇത്തരമൊരു പശ്ചാത്തലത്തിലാണ് ഡിജിറ്റല്‍ സുരക്ഷയും സ്വകാര്യതയും പരമാവധി വര്‍ദ്ധിപ്പിക്കുയെന്നതിലൂന്നി ഇന്റര്‍നെറ്റ് ഐഡന്റിറ്റി മാനേജ്‌മെന്റിന്റെ അനിവാര്യത ഉയര്‍ത്തിപ്പിടിച്ചുള്ള സിയോള്‍ മന്ത്രിതല പ്രഖ്യാപനം. ഇന്ത്യ, അമേരിക്ക, ജര്‍മ്മനി, ബ്രിട്ടന്‍ തുടങ്ങിയ 42ഓളം രാഷ്ട്രങ്ങള്‍ ഈ പ്രഖ്യാപനത്തില്‍ പങ്കാളികളാണ്. അമേരിക്കതന്നെ പക്ഷേ ഈ പ്രഖ്യാപനത്തെ കാറ്റില്‍ പറത്തിയെന്ന് സ്‌നോഡന്റെ വെളിപ്പെടുത്തല്‍ അടിവരയിടുന്നു! ഇന്ത്യയാകട്ടെ ഇക്കാര്യത്തെ ഗൗരവമായി സമീപിക്കുന്നില്ലെന്നതാണ് ഇന്ത്യന്‍ ഡിജിറ്റല്‍ വിവര ശേഖരങ്ങള്‍ അമേരിക്ക ചോര്‍ത്തിയെടുത്തുവെന്നതില്‍ നിന്ന് വ്യക്തമാകുന്നത്.

ഇ സിഗ്നേച്ചര്‍

സാമ്പത്തിക ഇടപാടുകളിലെ മുഖ്യമാധ്യമങ്ങളിലൊന്നായ ചെക്കില്‍ കൈയൊപ്പ് രേഖപ്പെടുത്തുന്നതോടുകൂടിയാണല്ലോ പണസംബന്ധമായി കൊടുക്കല്‍-വാങ്ങലുകളുടെ പ്രയോഗം സാധൂകരിക്കപ്പെടുന്നത്. സൈബര്‍ ലോകത്തിന്റെ ശക്തമായ സ്വാധീനം സര്‍വ്വതലത്തിലും ശീഘ്രഗതിയില്‍ വ്യാപിച്ചിരിക്കുന്നു. ഇതിലേറ്റവും പ്രാധാന്യമേറുന്നത് സാമ്പത്തിക ഇടപാടുകളടക്കമുള്ളവയിലെ സൈബര്‍ ലോകത്തിന്റെ സ്വാധീനമാണ്. ഇടപാടുകളുടെ നൈയാമികമായ ആധികാരികതയ്ക്ക് സൈബര്‍ ലോകത്തിന്റെ കാണാവേഗങ്ങളിലെ ഇടപാടുകളില്‍ ഇടപാടുകാര്‍ നേരിട്ട് ഹാജരായി കൈയൊപ്പ് രേഖപ്പെടുത്തുകയെന്നത് പ്രായോഗികമല്ല. ഈ അപ്രയോഗികതയെ മറിക്കടക്കുകയാണ് ഡിജിറ്റല്‍ സിഗ്നേച്ചര്‍. സൈബര്‍ ഇടപാടുകളില്‍ ഡിജിറ്റല്‍ സിഗ്നേച്ചര്‍ നിയമപരമായി അംഗീകരിക്കപ്പെട്ടിരിക്കുന്നു. 2000 ഒക്‌ടോബര്‍ 17 ന് പ്രാബല്യത്തില്‍ വന്ന ഐടി ആക്ട് (Information Technology Act-2000) പ്രകാരമാണ് ഡിജിറ്റല്‍ സിഗ്നേച്ചറിന് നൈയാമിക പിന്‍ബലം ലഭ്യമാകുന്നത്.(12)

ഡിജിറ്റല്‍ സിഗ്നേച്ചര്‍ പ്രോസസിങ്ങിന് ഔദ്യോഗികമായി ചുമതലപ്പെടുത്തിയിട്ടുള്ള രജിസ്ട്രികളുണ്ട്. ഇന്ത്യയില്‍് സ്വകാര്യ ഐടിസ്ഥാപനങ്ങളെയാണ് രജിസ്ട്രികളായി ചുമതലപ്പെടുത്തിയിട്ടുളളത്. ഇവയിെേറയും മൈക്രോസോഫ്റ്റുപോലുള്ള വന്‍കിട അമേരിക്കന്‍ വിദേശ ഐടി കമ്പനികെളയാണത്രെ ആശ്രയിക്കുന്നത്. അമേരിക്കന്‍ ദേശീയ സുരക്ഷ ഏജന്‍സിയുടെ പ്രിസം പദ്ധതിയുമായി വര്‍ഷങ്ങളോളമായി സജീവമായി സഹകരിക്കുന്ന മൈക്രോസോഫ്റ്റ് തങ്ങളുടെ ഓപ്പറേറ്റിങ്ങ് സിസ്റ്റത്തിന്റെ പിന്‍ബലത്തിലുള്ള ഡിജിറ്റല്‍ സിഗ്നേച്ചര്‍ രജിസ്ട്രികള്‍ ചോര്‍ത്തിക്കൊടുക്കപ്പെടുകയില്ലെന്ന് സ്്‌നോഡന്റെ വെളിപ്പെടുത്തലിന്റെ പശ്ചാത്തലത്തില്‍ എങ്ങനെ ഉറപ്പിക്കാനാകും?

indexയൂണിക് ഐഡി കാര്‍ഡ്-വിവരശേഖരങ്ങള്‍ സുരക്ഷിതമോ?

ഇന്ത്യന്‍ പശ്ചാത്തലത്തില്‍ ഡിജിറ്റില്‍ ഐഡന്റിറ്റി മാനേജ്‌മെന്റിനെ സംബന്ധിച്ച ആശങ്കകള്‍ ശക്തമാണ്. യുഐഡി കാര്‍ഡ് പ്രോസസ് ചെയ്യുന്നതിനായി പൗരന്മാരുടെ ജൈവ സവിശേഷ തകളായ കണ്ണിന്റെ കൃഷ്ണമണിയും (Iris) വിരലടയാളങ്ങളുമടക്കം സര്‍വ്വ വിവരങ്ങളും കേന്ദ്ര സര്‍ക്കാര്‍ ശേഖരിച്ചിട്ടുണ്ട്. സബ്‌സീഡിയടക്കമുള്ള സര്‍ക്കാരാനുകൂല്യങ്ങള്‍ ഇനിമുതല്‍ യുഐഡി കാര്‍ഡ് മുഖേനയേ ലഭ്യമാകൂ. ശേഖരിക്കപ്പെട്ടിട്ടുള്ള ജൈവ സവിശേഷതകളടക്കമുള്ളവ കാര്‍ഡിന്റെ അവസാന പ്രോസസിങ്ങില്‍ മാറിപ്പോകുകയില്ലെന്ന് കൃത്യമായി ഉറപ്പിക്കപ്പെടുന്നുണ്ടോ? ഇന്ത്യന്‍ ബ്യൂറോക്രസിയുടെ ശാപമായ അനാസ്ഥയും പുറംകരാര്‍ ജീവനക്കാരുടെ ആത്മാര്‍ത്ഥതയില്ലായ്മയും കണ്ട് തഴമ്പിച്ചിരിക്കുന്നുവെന്നതാണ് ഈ സംശയത്തിനാധാരം. കാര്‍ഡിലുള്‍പ്പെടുത്തിയിട്ടുള്ള സര്‍വ്വ വിവരങ്ങളും തന്റേതുതന്നെയാണെന്ന് പൗരന് ഒത്തുനോക്കുവാനുള്ള (Cross Matching) അവസരമില്ലെന്നത് അതീവ ഗൗരവതോടെ കാണുന്നില്ല.

കാര്‍ഡ് നിലവില്‍ വന്നതോടെ പൗരന്മാരുടെ ഡിജിറ്റല്‍ ഐഡന്റിറ്റിയുടെ സൂക്ഷിപ്പുകാരാണ് കേന്ദ്രസര്‍ക്കാര്‍. എന്നാലിത് ദുരുപയോഗം ചെയ്യപ്പെടുകയില്ലെന്നും സുരക്ഷിതമായിരിക്കുമെന്നും പൗരന്മാരുടെ സ്വകാര്യതയിലേക്കുള്ള കടന്നുകയറ്റത്തിനുള്ള മാധ്യമമാകുകയില്ലെന്നുമുള്ള ഉറപ്പിനെപ്രതിയുള്ള ആശങ്കകള്‍ സര്‍ക്കാരിന് ഇനിയും ദൂരീകരിക്കാനായിട്ടില്ല. കാര്‍ഡ് പ്രോസസിങ്ങ് പുറംകരാര്‍ കൊടുത്തിരിക്കുകയാണ് സര്‍ക്കാര്‍. രാജ്യത്തെ പൗരന്മാരുടെ വിവര ശേഖരങ്ങള്‍ ഇവരിലാണ് ആദ്യമെത്തിപ്പെടുന്നത്. ഇവരിലൂടെ പക്ഷേ പൗരന്മാരുടെ ഡിജിറ്റല്‍ ഐഡന്റിറ്റി സുരക്ഷിതവും സ്വകാര്യവുമായിരിക്കുമെന്നുറപ്പുണ്ടോ? ഇതിനുള്ള മറുപടിയായി പറയുന്നത് ശേഖരിക്കപ്പെട്ട വിവരങ്ങള്‍ പൂര്‍ണ്ണമായും സര്‍ക്കാരിന് കൈമാറുന്നുവെന്നാണ്. കരാറുകാരന്‍ ശേഖരിക്കപ്പെട്ട വിവരങ്ങളുടെയെല്ലാം പക്ഷേ ഇലക്‌ട്രോണിക് കോപ്പി കയ്യില്‍ കരുതിവെക്കില്ലെന്ന് ആര്‍ക്കാണുറപ്പ്? ഇനി അഥവാ കോപ്പി ചെയ്യപ്പെടാതെ തന്നെ ശേഖരിക്കപ്പെട്ട പൗരന്മാരുടെ വിവരങ്ങള്‍ സുരക്ഷിതമായി കാത്തുസൂക്ഷിക്കുന്നതില്‍ കേന്ദ്ര സര്‍ക്കാര്‍ വേണ്ടത്ര ജാഗരൂകരാണോയെന്ന ആശങ്കയുണ്ട്.

ഡിജിറ്റല്‍ റിപ്പബ്ലിക്കും ആക്റ്റിവിസവും

പ്രാക്തന സമൂഹത്തില്‍ നിന്നുളള ആധുനിക ദേശീയ രാഷ്ട്ര (Nation State) ങ്ങളുടെ പരിണാമത്തിന് ദീര്‍ഘകാല ചരിത്രമുണ്ട്. ട്രൈബല്‍ സ്റ്റേറ്റ്, നദീതടങ്ങളെ കേന്ദ്രീകരിച്ച് പൗരസ്ത്യ സാമ്രാജ്യങ്ങള്‍, ഗ്രീക്ക് നഗര രാഷ്ട്രങ്ങള്‍ (City States), റോമാ സാമ്രാജ്യം, ഫ്യൂഡല്‍ സ്റ്റേറ്റുകള്‍ എന്നിവ പിന്നിട്ടാണ് ആധുനിക ദേശീയ രാഷ്ട്രങ്ങളുടെ പിറവി. പ്ലേറ്റോയുടെ ‘റിപ്പബ്ലിക്കി’ലൂടെയും അരിസ്റ്റോട്ടിലിന്റെ’പോളിസി’ലൂടേയും തോമസ് ഹോബ്‌സിന്റെ സോഷ്യല്‍ കോണ്‍ട്രാക്റ്റ് തിയ്യറി (സാമൂഹ്യ കരാര്‍ ഉടമ്പടി) ലുടേയും ജോണ്‍ ലോക്കിന്റെ ‘ടു ട്രീറ്റീസ് ഓഫ് ഗവണ്‍മെന്റി’ലൂടെയും രൂപാന്തരം പ്രാപിച്ച് വ്യതിരിക്തങ്ങളായ ആധുനിക പ്രാതിനിധ്യ ജനാധിപത്യ വ്യവസ്ഥകള്‍ പ്രത്യക്ഷപ്പെട്ടു. ഇവയോടൊപ്പം തന്നെ വ്യത്യസ്ത രാഷ്ട്രീയ പ്രത്യയ ശാസ്ത്രങ്ങളുടെ പിന്‍ബലത്തില്‍ രാഷ്ട്രീയാധികാര സ്ഥാപനങ്ങളും ഘടനയും രൂപംകൊണ്ടു.

അഥീനിയന്‍ ജനാധിപത്യം (Athenian Demorcacy) ഫ്യൂഡലിസം, ഫാസിസം, സോഷ്യലിസം, സമഗ്രാധിപത്യം, ജനാധിപത്യം, സോഷ്യല്‍ ഡെമോക്രസി തുടങ്ങിയ രാഷ്ട്രീയ പ്രത്യയ ശാസ്ത്രങ്ങളെ പിന്‍പറ്റി ഭരണകൂടങ്ങളുടെ മുന്‍കയ്യില്‍ പരമാധികാര രാഷ്ട്രങ്ങളായി. ഈ വിവര യുഗ (Information Age) ത്തില്‍ പക്ഷേ ഇലക്‌ട്രോണിക്(13)/ഡിജിറ്റല്‍ റിപ്പബ്ലിക്ക് എന്ന നിലയിലേക്കുള്ള മാറ്റത്തിന്റെ പാതയിലാണ് ആധുനിക രാഷ്ട്രങ്ങളെന്നതിന്റെ സൂചനകള്‍ അതിശക്തമാണ്.

ഇന്ത്യയുടെ ടെലികോം റെഗുലേറ്ററി അഥോറിറ്റി (ട്രായ്) യുടെ കണക്ക് (14)പ്രകാരം രാജ്യത്ത് മൊത്തം 893.15 മില്യണ്‍ മൊബൈല്‍/ലാന്റ്‌ഫോണ്‍ വരിക്കാരുണ്ട്. ഇതില്‍ 82.08 ശതമാനവും മൊബൈല്‍ ഫോണ്‍ വരിക്കാരാണ്. ജനുവരി 2013 വരെ 15.01 മില്യണ്‍ ബ്രോഡ്ബാന്‍ഡ് വരിക്കാരുണ്ടെന്നും പറയുന്നു. സിസ്‌കോം വിഷ്വല്‍ നെറ്റ് വര്‍ക്കിങ്ങ് ഇന്റക്‌സ് പ്രവചിക്കുന്നത്(15) 2017 കൂടി രാജ്യത്ത് 348 മില്യണ്‍ ഇന്റര്‍നെറ്റ് ഉപയോക്താക്കളുണ്ടാകുമെന്നാണ്. 2012 ലിത് 138 മില്യണായിരുന്നു.

രാജ്യത്തിന്റെ ടെലിഗ്രാം സംവിധാനം സ്മരണകളുടെ സന്ദേശ കാവ്യമായി. ഐടി അധിഷ്ഠിത അച്ചടി-ദൃശ്യ-ഓണ്‍ലൈന്‍ മാധ്യമങ്ങള്‍, ഓഫീസ് യന്ത്രവല്‍കൃത സംവിധാനങ്ങള്‍ (Office Automation System), ഇലക്‌ടോണിക് വോട്ടിങ്ങ് യന്ത്രം ഇവയെല്ലാം ഇ-ജനാധിപത്യ വ്യവസ്ഥയിലെ ഇലക്‌ടോണിക് രാഷ്ട്രമെന്ന അവസ്ഥ സൃഷ്ടിച്ചിട്ടുണ്ട്. ഇലക്‌ട്രോണിക് റിപ്പബ്ലിക്കുകള്‍ സൈബര്‍ ലോകത്തിന്റെ കാണാവേഗങ്ങളില്‍ അതിവേഗം ഇടംപിടിച്ചതോടെയാകട്ടെ അവ ഡിജിറ്റല്‍ റിപ്പബ്ലിക്കുകളെന്ന അവസ്ഥാന്തരത്തിലുമാണ്.

‘നാം മാധ്യമങ്ങളില്‍ നിന്ന് ഏറെ ആവശ്യപ്പെടുമ്പോള്‍ നമ്മുടെ പ്രതിനിധികളില്‍ നിന്ന് ഒന്നും ആവശ്യപ്പെടുന്നില്ലെ’ന്ന്(16) പറയുന്നതിലൂടെ എന്‍.ബി.സി ടിവി നെറ്റ്‌വര്‍ക്കിങ്ങ് മുന്‍ പ്രസിഡണ്ട് ലോറന്‍സ് ഗ്രോസ്‌മെന്‍ അടിവരയിടുന്നത് ജനാധിപത്യവ്യവസ്ഥയിലെ മാധ്യമ ശക്തിയെയാണ്. ഇലക്‌ടോണിക് റിപ്പബ്ലിക്കുകളില്‍ മാധ്യമങ്ങളുടെ പ്രധാന പങ്ക് അടയാളപ്പെടുത്തുമ്പോള്‍ തന്നെ മാധ്യമ പ്രവര്‍ത്തനം ഒട്ടും ഗൗരവമല്ലാത്ത അവസ്ഥയിലേക്കുമാറുകയാണെന്നുകൂടി ഗ്രോസ്‌മെന്‍ പരിതപിക്കുന്നു. ഇവിടെയാണ് വിവര സാങ്കേതിക വിദ്യാ വിസ്‌ഫോടനത്തിലൂടെ രൂപാന്തരപ്പെട്ടുകൊണ്ടിരിക്കുന്ന ഡിജിറ്റല്‍ റിപ്പബ്ലിക്കുകളിലെ ഡിജിറ്റല്‍ സ്വത്വമാര്‍ജ്ജിക്കുന്ന യുവതയുടെ തനത് ഡിജിറ്റല്‍ ആക്ടീവിസമെന്ന പുത്തന്‍ പോര്‍മുഖം അതിവേഗം തുറക്കപ്പെടുന്നത്.

ടുണിഷ്യ, ഈജിപ്ത്, ലിബിയ തുടങ്ങിയ അറബ് രാഷ്ട്രങ്ങളില്‍ അറബ് വസന്തമെന്ന് വിളിക്കപ്പെട്ട ജനകീയ മുന്നേറ്റങ്ങള്‍ക്ക് ലോകം സാക്ഷ്യം വഹിച്ചു. അണ്ണാഹസാരയുടെ അഴിമതി വിരുദ്ധ സമരമുന്നേറ്റവും ദില്ലിയിലെ കൂട്ട ബലാത്സംഗ വിരുദ്ധ സമരശക്തിയും ഇന്ത്യ കണ്ടു. ഇവയിലെല്ലാം വിവര ആശയ വിനിമയ സാങ്കേതിക വിദ്യ മുഖ്യ(സോഷ്യല്‍ നെറ്റ്‌വര്‍ക്കുകള്‍) ആയുധമായി വിനിയോഗിക്കപ്പെട്ടു. ഇതെല്ലാം പക്ഷേ ജനാധിപത്യത്തിന്റെ കാവലാളുകളെന്നവകാശപ്പെടുന്ന ഭരണകൂടങ്ങള്‍ക്ക് സൃഷ്ടിച്ച തലവേദനയൊട്ടും ചെറുതല്ല.

രാജ്യത്തിനെതിരെയുള്ള ആഭ്യന്തര-ബാഹ്യശക്തികളുടെ രഹസ്യ നീക്കങ്ങള്‍ കണ്ടെത്താന്‍ ഇന്റലിജന്‍സ് ബ്യൂറോ (ഐബി), റോ (Research & Analysis Wing- RAW) തുടങ്ങിയ ഏജന്‍സികളുണ്ട്. പരമ്പരാഗത പരമാധികാര റിപ്പബ്ലിക് എന്നവസ്ഥയില്‍ നിന്ന് ഡിജിറ്റല്‍ റിപ്പബ്ലിക് എന്ന നിലയിലേക്ക് ആധുനിക രാഷ്ട്രങ്ങള്‍ രൂപാന്തരം പ്രാപിക്കുകയാണ്. ഡിജിറ്റല്‍ സ്വത്വത്തിക്കേ് വഴിമാറികൊണ്ടിരിക്കുന്ന പുതുതലമുറയുടെ ജനകീയ അഭിപ്രായ രൂപീകരണങ്ങളെയും മുന്നേറ്റങ്ങളെയും മുന്‍കൂട്ടി കണ്ടെത്തി തടയിടുന്നതില്‍ വിന്യസിക്കപ്പെട്ടിട്ടുള്ള രഹസ്യാന്വേഷണ ഏജന്‍സികളുടെ പരമ്പരാഗത രീതിശാസ്ത്രത്തിലൂടെ സാധ്യമാകുക ശ്രമകരമാണ്. അതുകൊണ്ടുതന്നെ തങ്ങളുടെ അധികാര കസേരകള്‍ക്ക് ഇളക്കം തട്ടിക്കുന്ന സോഷ്യല്‍ മീഡിയാപ്രചരണങ്ങള്‍ക്ക് കടിഞ്ഞാണിടേണ്ടത് ഭരണകൂടങ്ങളുടെ ആവശ്യമായിമാറിയിട്ടുണ്ട്.

സെന്‍ട്രല്‍ മോണിറ്ററിങ്ങ് സിസ്റ്റം

അമേരിക്കന്‍ ഭരണകൂടത്തിന്റെ പ്രിസം പദ്ധതിക്ക് സമാനമായി ഇന്ത്യ സെന്‍ട്രല്‍ മോണിറ്ററിങ്ങ് സിസ്റ്റം(സി.എം.എസ്) എന്ന പേരില്‍ ഫോണ്‍-ഇന്റര്‍നെറ്റ് ആശയ വിനിമയങ്ങള്‍ നിരീക്ഷിക്കുവാനും ശേഖരിക്കുവാനുമുള്ള സംവിധാനം വികസിപ്പിച്ചെടുത്തിട്ടുണ്ട്. പൗരന്മാരുടെ ഡിജിറ്റല്‍ സുരക്ഷയുടേയും സ്വകാര്യതയുടേയും സംരക്ഷണാര്‍ത്ഥമുള്ള നിയമത്തിന്റെ അഭാവത്തില്‍ 2013 ഏപ്രില്‍ പ്രവര്‍ത്തനം ആരംഭിച്ച സിഎംഎസിനെതിരെയുള്ള ആശങ്കകളും വിമര്‍ശനങ്ങളും ഇതിനകംതന്നെ ഉയര്‍ന്നിട്ടുണ്ട്.

400 കോടി രൂപ ചെലവ് പ്രതീക്ഷിക്കപ്പെടുന്ന സിഎംഎസ് ടെലഫോണ്‍ കോള്‍ ഇന്റര്‍സെപ്ഷന്‍ സിസ്റ്റവുമായി ബന്ധിപ്പിക്കുന്നു. ഇതിലൂടെ വോയ്‌സ് കോളുകള്‍, എസ്എംഎസ്സുകള്‍, ഫാക്‌സ് ആശയവിനിമയങ്ങള്‍, എംഎംഎസ് (മര്‍ട്ടിമീഡിയ മെസ്സേജ് സര്‍വ്വീസ്), വീഡിയോ കോളുകള്‍ തുടങ്ങിയവ പ്രദാനം ചെയ്യുന്ന 3 ജി നെറ്റ്‌വര്‍ക്കുകള്‍ രഹസ്യ നിരീക്ഷണ വലയത്തിലകപ്പെടും. റോ , സിബിഐ, എന്‍ഐഎ, എന്‍ഫോഴ്‌സ്‌മെന്റ് ഡയറക്ടറേറ്റ് തുടങ്ങിയ രാജ്യത്തിന്റെ തന്ത്രപ്രധാന അന്വേഷണ ഏജന്‍സികള്‍ക്കെല്ലാം ഈ സംവിധാനം ഉപയോഗിക്കാം.

തീവ്രവാദ-ഭീകരവാദ പ്രവര്‍ത്തനങ്ങളെ രഹസ്യമായി നിരീക്ഷണ വിധേയമാക്കുകയെന്നതിന്റെ പേരിലാണ് സിഎംഎസ് സംവിധാനം രാജ്യത്ത് സജീവമാകുന്നത്. എന്നാലിത് ഭരണഘടന ഉറപ്പുനല്‍കുന്ന പൗരന്റെ അഭിപ്രായ സ്വാതന്ത്ര്യത്തിലേക്കുള്ള ഭരണകൂട കടന്നുകയറ്റമാണെന്ന ശക്തിപ്പെടുന്ന ആശങ്ക കാണാന്‍ ഇന്ത്യാസര്‍ക്കാര്‍ കൂട്ടാക്കുന്നില്ല. ഇത്തരമൊരു പശ്ചാത്തലത്തില്‍വേണം അമേരിക്കന്‍ ഭരണകൂടത്തിന്റെ ഡിജിറ്റല്‍ ശേഖര കൊള്ളയെ ന്യായീകരിച്ചുകൊണ്ടുള്ള ഇന്ത്യന്‍ വിദേശകാര്യമന്ത്രി സല്‍മാന്‍ ഖുര്‍ഷിദിന്റെ പ്രഖ്യാപനത്തെ കാണാന്‍.

രാജ്യത്തെ ഐടി ആക്ടിന്റെ ദുരുപയോഗം ശക്തിപ്പെടുന്നതിന്റെ ദുസൂചനകളേറെയാണ്. 2012 ഏപ്രിലില്‍ പശ്ചിമ ബംഗാള്‍ മുഖ്യമന്ത്രി മമതാ ബാനര്‍ജിയുടെ പടംവെച്ച് കളിയാക്കികൊണ്ട് ഇ-മെയില്‍ പ്രചരിപ്പിച്ചുവെന്ന് ആരോപിച്ച് ജാദവേപ്പൂര്‍ യൂണിവേഴ്‌സിറ്റി അധ്യാപകന്‍ അംബികേഷ് മഹാപത്രയെ അറസ്റ്റ് ചെയ്തു. അഴിമതിക്കെതിരെയുള്ള കാര്‍ട്ടൂണ്‍ സോഷ്യല്‍ മീഡിയ നെറ്റ്‌വര്‍ക്കിലൂടെ പ്രചരിപ്പിച്ചതിന് 2012 ഒക്‌ടോബറില്‍ കാര്‍ട്ടൂണിസ്റ്റ് അസീം ത്രിവേദി അറസ്റ്റ് ചെയ്യപ്പെട്ടു. ബാല്‍ താക്കറെയുടെ മരണത്തെതുടര്‍ന്ന് മുംബെയില്‍ ശിവസേന നടത്തിയ ബന്ദിനെതിരെ വിമര്‍ശിച്ച് ഫെയ്‌സ്ബുക്കില്‍ കുറിപ്പെഴുതിയതിന് മലയാളിയടക്കമുള്ള രണ്ട് പെണ്‍കുട്ടികളെ അറസ്റ്റ് ചെയ്തു. ഈ അറസ്റ്റുകളെല്ലാം ഐടി ആക്ടിന്റെ ദുരുപയോഗമായിരുന്നു.

രാജ്യസുരക്ഷയെക്കാള്‍ തങ്ങള്‍ക്കെതിരെ ഉയര്‍ന്നുവരുന്ന വിമര്‍ശനങ്ങളെ നേരിടുന്നതിനുവേണ്ടിമാത്രമാണ് ഐ.ടി ആക്ടിനെ ഭരണാധികാരികള്‍ ഉപയോഗിക്കുകയോ, ദുരുപയോഗിക്കുകയോ ചെയ്യുന്നത്. അതേസമയം രാജ്യത്തിന്റെ ഡിജിറ്റല്‍ വിവരശേഖര സുരക്ഷയെപ്പറ്റി ഇവര്‍ക്ക് ആലോചനകളേയില്ല. ഈയവസ്ഥയില്‍ ഡിജിറ്റല്‍ റിപ്പബ്ലിക്കുകളിലെ പൗരന്മാരുടെ സുരക്ഷയും സ്വകാര്യതയും ഭരണകൂടത്തിന്റെ ആത്മാര്‍ത്ഥമായ മുന്‍കൈയില്‍ ഉറപ്പിക്കപ്പെടുമെന്നു കരുതാനാവില്ല-പ്രത്യേകിച്ചും ഇന്ത്യയുടെ സിഎംഎസ് സംവിധാനം പൂര്‍ണ്ണമായും സജ്ജമാക്കപ്പെടുന്നതോടെ.

വ്യക്തികള്‍/പൗരസമൂഹം ഭരണകൂടത്തിന്റെ മുന്‍കയ്യില്‍ ഐടിയധിഷ്ഠിത രഹസ്യ നിരീക്ഷണത്തിന് വിധേയമാക്കപ്പെടുകയോ ഇരയാക്കപ്പെടുകയോ ചെയ്യും. പരമ്പരാഗത വ്യക്തി സ്വാതന്ത്ര്യത്തിലേക്കും സ്വകാര്യതയിലേക്കുമുള്ള ഭരണകൂട കടന്നുകയറ്റമെന്നതിനപ്പുറം ഡിജിറ്റല്‍ റിപ്പബ്ലിക്കിലെ പൗരന്മാരുടെ ഡിജിറ്റല്‍ സ്വത്വത്തിന്മേലുള്ള കടന്നുകയറ്റമായിരിക്കും ഫലത്തില്‍ സംഭവ്യമാകുക. പതിവുപോലെ ദേശരക്ഷ, രാജ്യതാല്പര്യം, ക്രമസമാധാനമെന്നതിന്റെയൊക്കെ മറവില്‍ തന്നെയായിരിക്കും ഈ ചെയ്തികളുണ്ടാകുക. ഡിജിറ്റല്‍ സ്വത്വത്തിന്റെ ചെലവില്‍ ദേശീയ സുരക്ഷയും താല്പര്യവും സംരക്ഷിക്കപ്പെടണമെന്ന മുന്‍ഗണനാക്രമം ഉറപ്പിച്ചെടുക്കുന്നതില്‍ തന്നെയായിരിക്കും ഭരണകൂട തന്ത്രം മെനയപ്പെടുക.

വ്യക്തികളുടെ /സ്ഥാപനങ്ങളുടെ ഡിജിറ്റല്‍ വിവര ശേഖരങ്ങളില്‍ ഭരണകൂടങ്ങളുടെ കടന്നുകയറ്റം ആവശ്യമാണോ അതല്ലെങ്കില്‍ അനാവശ്യമാണോയെന്ന സമസ്യകള്‍ക്ക് ആലോചനകളില്ലാതെ ഉത്തരം കണ്ടെത്തപ്പെടേണ്ടതല്ലന്നുവേണം പറയാന്‍. തീവ്രവാദ/ഭീകരവാദ പ്രവര്‍ത്തനങ്ങളുടെ പശ്ചാത്തലത്തില്‍ രാഷ്ട്രത്തിന്റെ സമാധാനവും അഖണ്ഡതയും സംരക്ഷിക്കപ്പെടേണ്ട ദിശയില്‍ ഡിജിറ്റല്‍ വിവര ശേഖരങ്ങളുടെ സ്വകാര്യതയും സുരക്ഷയും പൂര്‍ണ്ണമായ അര്‍ത്ഥത്തില്‍ കാത്തുസൂക്ഷിക്കപ്പെടേണ്ടതില്ലെന്ന നിലപാടിലാണ് ഭരണകൂടങ്ങള്‍. ഇതിനോട് പക്ഷേ യോജിക്കുവാനാകില്ലെന്ന നിലപാടുള്ളവര്‍ ആഗോളതലത്തില്‍ തന്നെ ഒട്ടും കുറവല്ല. ഡിജിറ്റല്‍ റിപ്പബ്ലിക്കിലേക്ക് വഴിമാറുന്ന രാഷ്ട്രങ്ങളിലെ പൗരന്മാരുടെ ഡിജിറ്റല്‍ സുരക്ഷയുടെയും ദേശീയ സുരക്ഷയുടെയും മുന്‍ഗണനാക്രമം നിശ്ചയിക്കപ്പെടുന്നതില്‍ തര്‍ക്കവിതര്‍ക്കങ്ങള്‍ ഒരുപക്ഷേ കലാപങ്ങള്‍ ഉടലെടുക്കുമെന്ന് സുനിശ്ചിതം.

വിവരശേഖര സംരക്ഷണ നിയമം

ഇന്ത്യയില്‍നിന്നും ഡിജിറ്റല്‍ വിവരശേഖരം ചോര്‍ത്തിയെടുത്തുവെന്നതിന്റെ പശ്ചാത്തലത്തില്‍ രാജ്യത്തിന് ഡാറ്റാ സംരക്ഷണ നിയമം (Data Protection Act)അനിവാര്യമാകുന്നുണ്ട്. അന്തര്‍ദേശീയ മനുഷ്യാവകാശ സംഘടനയുടെ ഹ്യൂമന്‍ റൈറ്റ്്‌സ് വാച്ച് (17) ഇക്കാര്യത്തില്‍ ഇന്ത്യയുടെ അടിയന്തിര ശ്രദ്ധയുണ്ടാകേണ്ടതുണ്ടെന്ന് അടിവരയിടുന്നു. പൗരന്മാരുടെ അവകാശവും സ്വകാര്യതയും അന്തര്‍ദേശീയ മനുഷ്യാവകാശ പ്രഖ്യാപനം ഉറപ്പുനല്‍കുന്നുണ്ട്. ഈ പ്രഖ്യാപനത്തില്‍ ഇന്ത്യ ഭാഗഭാക്കുമാണ്. എങ്കിലും സ്വകാര്യതാ സംരക്ഷണ നിയമ (Privacy law) നിര്‍മ്മാണത്തിന് ഇനിയും ഇന്ത്യ തയ്യാറായിട്ടില്ല.

2000 ല്‍ പാസ്സാക്കപ്പെട്ട ഐടി ആക്ടിന്റെ പരിധിയിലാണ് ഇപ്പോള്‍ ഡാറ്റാ സംരക്ഷണം. രാജ്യം പക്ഷേ ഡിജിറ്റല്‍ റിപ്പബ്ലിക്കിലേക്ക് വഴിമാറിക്കൊണ്ടിരിക്കുന്ന വേളയില്‍ ഡാറ്റാ സംരക്ഷണത്തിനും സ്വകാര്യതയ്ക്കും മാത്രം ഊന്നല്‍ നല്‍കിയിട്ടുള്ള നിയമ നിര്‍മ്മാണത്തിന് ഇന്ത്യയുടെ ശ്രദ്ധ തിരിഞ്ഞിട്ടില്ല. എന്തിനകം സൈബര്‍ ഇന്ത്യയെന്ന് ഘോഷിക്കപ്പെടുമ്പോള്‍തന്നെ രാജ്യത്ത് ഇനിയും സൈബര്‍ സുരക്ഷാനിയമ (Cyber Security Law) മില്ല.

ഇന്റര്‍നെറ്റ് മൊബൈല്‍ ബാങ്കിങ്ങുകളിലേര്‍പ്പെടുന്നവരുടെ ക്രെഡിറ്റ്/ഡെബിറ്റ് കാര്‍ഡുകളുടെ രഹസ്യപിന്‍നമ്പര്‍ ചോര്‍ത്തിയെടുത്തുള്ള പണാപഹരണ സൈബര്‍ കുറ്റങ്ങളും വെബ്‌സൈറ്റ് ഹാക്കിങ്ങുകളും അനുദിനം പെരുകുകയാണ്. പുറംകരാറിലൂടെ (ബിപിഒ) വിദേശ സ്ഥാപനങ്ങളുടെയും വ്യക്തികളുടെയും ക്രെഡിറ്റ് കാര്‍ഡ് സാമ്പത്തിക ഇടപാടുകളടക്കമുള്ള വിവിധങ്ങളായ വിഷയഗ്രഹണ സമര്‍ത്ഥമായ ഡിജിറ്റല്‍ വിവരങ്ങളും (Sensitive Data) വ്യക്തികളുടെ വിവരങ്ങളും രാജ്യത്തെത്തുന്നുണ്ട്. ഇവ ചോരണചെയ്യപ്പെടുന്നതിനുള്ള സാധ്യത വിരളമല്ല. അതുകൊണ്ടുതന്നെ ഡിജിറ്റല്‍ വിവര ശേഖരങ്ങളുടെ സുരക്ഷയും സ്വകാര്യതയും അതീവ ഗൗരവമേറിയതാണ്.

യൂറോപ്യന്‍ യൂണിയന്റെ ഡാറ്റാ സ്വകാര്യ ചട്ടക്കൂടിനെ (Europian Union Data Privacy Frame Work-1996) ചുവടുപിടിച്ച് 2006 ല്‍ ഇന്ത്യന്‍ പാര്‍ലമെന്റില്‍ വ്യക്തിഗത ഡാറ്റാ സംരക്ഷണ ബില്‍ (Personl Data Protection Bill) അവതരിപ്പിക്കപ്പെട്ടുവെങ്കിലും അത് പാസ്സാക്കപ്പെട്ടില്ല. 2000 ല്‍ ഐടി ആക്ട് പാസ്സാക്കപ്പെട്ടു. അതിന്റെ വ്യാപ്തിയില്‍ പക്ഷേ ഡാറ്റാ സംരക്ഷണമെന്നത് ഇടംപിടിച്ചിട്ടില്ല. ഡിജിറ്റല്‍ റിപ്പബ്ലിക്കിലേക്ക് വഴിമാറിക്കൊണ്ടിരിക്കുന്ന രാജ്യത്തെ ഡാറ്റാ സംരക്ഷണം നിലവിലുള്ള ഐടി ആക്ടിലൂടെ സാധ്യമാകുകയില്ലെന്ന് ചുരുക്കം. ഡിജിറ്റല്‍ വിവര ശേഖര സുരക്ഷയും സ്വകാര്യതയും ഉറപ്പുവരുത്തുന്നതില്‍ വിയറ്റ്‌നാമെന്ന(18) കൊച്ചു രാജ്യത്തിന്റെ ശുഷ്കാന്തിയെങ്കിലും ഐടി രംഗത്ത് വന്‍കുതിച്ചുചാട്ടം നടത്തിയെന്നവകാശപ്പെടുന്ന ഇന്ത്യ കണ്ട് പഠിക്കുന്നത് നന്നായിരിക്കും.

2013 ഏപ്രിലില്‍ രാജ്യത്തെ പൗരന്മാരുടെ ഡിജിറ്റല്‍ വിവരശേഖരങ്ങളെ രഹസ്യ നിരീക്ഷണത്തിന്‍ കീഴിലാക്കുന്നതിനായുള്ള സെന്‍ട്രല്‍ മോണിറ്ററിങ്ങ് സംവിധാനം നിലവില്‍ വന്നിരിക്കുന്നു. അതുകൊണ്ടുതന്നെ ഡാറ്റാ സംരക്ഷണ നിയമ നിര്‍മ്മാണത്തിന് കേന്ദ്ര സര്‍ക്കാര്‍ വേണ്ടത്ര മുന്‍ഗണന നല്‍കുമോയെന്ന സംശയമുയരാതിരിക്കുന്നില്ല. ഡിജിറ്റല്‍ വിവര ശേഖരങ്ങള്‍ ചോര്‍ത്തിയെടുത്ത അമേരിക്കന്‍ നടപടിയെ ഇന്ത്യന്‍ വിദേശകാര്യമന്ത്രി സല്‍മാന്‍ ഖുര്‍ഷിദ് പിന്തുണച്ചത് ഇതോടൊപ്പം ചേര്‍ത്തുവായിക്കണം.

വെബ്ബ്‌സൈറ്റുകളുടെ കാര്യകര്‍ത്താവ് ആര്?

സ്വകാര്യ സ്ഥാപനങ്ങള്‍ സര്‍ക്കാര്‍, അര്‍ദ്ധ സര്‍ക്കാര്‍, യൂണിവേഴ്‌സിറ്റികള്‍, പൊതുമേഖലാ സ്ഥാപനങ്ങള്‍ തുടങ്ങിയവക്കെല്ലാം വെബ്ബ്‌സൈറ്റുകളുണ്ട്. ഇവയുടെ ഉടമസ്ഥതയും കാര്യകര്‍തൃത്വവും ആരിലാണ് അധിഷ്ഠിതമായിരിക്കുന്നതെന്നത് ശ്രദ്ധിക്കപ്പെടുന്നതേയില്ല. വെബ്ബ്‌സൈറ്റ് നിര്‍മ്മാണ ചുമതലകള്‍ പൊതുവെ സ്വകാര്യ ഐടി സ്ഥാപനങ്ങള്‍ക്കാണ്. വെബ്ബ്‌സൈറ്റ് ഡൊമൈന്‍ പേര് (സൈറ്റിന്റെ പേര്) രജിസ്റ്റര്‍ ചെയ്യുന്നതും സൈറ്റ് ഏത് സെര്‍വറില്‍ ഹോസ്റ്റ് ചെയ്യണമെന്നതെല്ലാം ഏകപക്ഷീയമായി തീരുമാനിക്കുന്നത് ഐടി സ്ഥാപനങ്ങള്‍ തന്നെ. അക്കാര്യത്തില്‍ വെബ്ബ്‌സൈറ്റിന് പണം മുടക്കുന്നവര്‍ പ്രത്യേകിച്ച് നിര്‍ദ്ദേശങ്ങളൊന്നും കൊടുക്കാറില്ല. ഇതു സംബന്ധിച്ച അജ്ഞതയാണിതിന് പൊതുവെയുള്ള കാരണം.

എഡ്വേര്‍ഡ് സ്‌നോഡന്റെ വെളിപ്പെടുത്തല്‍ ഇപ്പറഞ്ഞ സ്ഥാപനങ്ങളുടെ ഡിജിറ്റല്‍ വിവര ശേഖരങ്ങള്‍ (digital data base) സുരക്ഷിതമാണോയെന്നതിനെപ്രതിയുള്ള അതീവ ഗൗരവമേറിയ ആലോചന ആവശ്യപ്പെടുന്നുണ്ട്. ഖേദകരമെന്നു പറയട്ടെ, ചില സൈറ്റുകളുടെ വെബ്ബ് ഡൊമൈനുകള്‍ ഉടമയുടെ പേരിലല്ല രജിസ്റ്റര്‍ ചെയ്യപ്പെടുന്നത്. സൈറ്റിന്റെ പൂര്‍ണ്ണ നിയന്ത്രണത്തിനായുള്ള സി-പാനലി (control panel) ന്റെ യൂസര്‍ ഐഡിയും പാസ്‌വേഡും സൈറ്റ് ഉടമക്ക് അറിയില്ല. ഇതെല്ലാം സൈറ്റ് രൂപകല്പന ചെയ്ത്് വികസിപ്പിക്കുന്ന ഐടി സ്ഥാപനത്തിന്റെ ഉടമസ്ഥതയിലും പൂര്‍ണ്ണ നിയന്ത്രണത്തിലുമാരിയിരിക്കും. അതുകൊണ്ട് ഉടമ അറിയാതെ തന്നെ തന്റെ വെബ്ബ്‌സൈറ്റില്‍ യഥേഷ്ടം കയറിയിറങ്ങുവാനുള്ള സ്വാതന്ത്ര്യം സൈറ്റ് രൂപകല്പന ചെയ്ത് പരിപാലിക്കുന്നവര്‍ക്കുമുണ്ട്. പണംമുടക്കിയ യഥാര്‍ത്ഥ സൈറ്റ് ഉടമയുടെ ഡിജിറ്റല്‍ സുരക്ഷയും സ്വകാര്യതയും അന്യന്റെ കയ്യിലാണെന്നവസ്ഥ! ഐഐഎമ്മിന്റെ ക്യാറ്റ് വെബ്ബ്‌സൈറ്റ് രൂപകല്പന ചെയ്ത് വികസിപ്പിച്ച ഐടി സ്ഥാപനം തന്നെ സൈറ്റില്‍ യൂണിവേഴ്‌സിറ്റിയാല്‍ അപ്‌ലോഡ് ചെയ്യപ്പെട്ട മാര്‍ക്കുകള്‍ തിരുത്തിയത് സംബന്ധിച്ച സിബിഐ അന്വേഷണം ഇതോടൊപ്പം ചേര്‍ത്തുവായിക്കുക.

വെബ്ബ്‌സൈറ്റ് രൂപകല്പന ചെയ്യുന്നവരിലേറെയും ഡിജിറ്റല്‍ ഡാറ്റാ ശേഖരങ്ങള്‍ ഹോസ്റ്റ് ചെയ്യാനായി ആശ്രയിക്കുന്നത് അമേരിക്കന്‍ അധിഷ്ഠിത സെര്‍വര്‍ ദാദാക്കളെയാണ്. ഡിജിറ്റല്‍ ഡാറ്റകള്‍ സൂക്ഷിക്കുവാന്‍ സെര്‍വര്‍ സ്‌പെയ്‌സ് വാങ്ങുന്നതിനോടൊപ്പം തന്നെ ഇ-മെയില്‍ ഐഡിയുണ്ടാക്കുന്നതിനും സാധ്യമാണ്. പ്രധാനമായും ഈ ഇ-മെയില്‍ ഐഡികളാണ് ഈ ഡിജിറ്റല്‍ യുഗത്തില്‍ സര്‍വ്വവിധ ആശയ വിനിയമങ്ങളുടെയും ഫയലുകളുടെയും ഇമേജുകളുടെയും ആഗമന-നിര്‍ഗ്ഗമന മാധ്യമം.

അമേരിക്കന്‍ അധിഷ്ഠിത സെര്‍വ്വര്‍ സ്ഥാപനങ്ങളുടെ സഹകരണത്തോടെ ഇന്ത്യയടക്കമുള്ള 48 രാഷ്ട്രങ്ങളുടെ വന്‍ ഡിജിറ്റല്‍ രേഖകളുടെ ശേഖരങ്ങള്‍ അമേരിക്കന്‍ ഭരണകൂടം ശേഖരിച്ചിട്ടുണ്ടെന്ന് ഇതിനകം വ്യക്തമാക്കപ്പെട്ടിട്ടുണ്ട്. അമേരിക്കന്‍ അധിഷ്ഠിത സെര്‍വ്വര്‍ ദാതാക്കളും സോഫ്ട്‌വെയര്‍ നിര്‍മ്മാതാക്കളുമായ മൈക്രോസോഫ്റ്റ്, ഗൂഗിള്‍, ആപ്പിള്‍, യാഹു, ഫെയ്‌സ്ബുക്ക് തുടങ്ങിയവര്‍ അമേരിക്കന്‍ ഭരണകൂട നിര്‍ദ്ദേശങ്ങള്‍ പാലിക്കുന്നുവെന്ന വസ്തുത നിലനില്‍ക്കെ അമേരിക്കന്‍ സെര്‍വറുകളില്‍ ലോകത്തിന്റെ വിവിധ കോണുകളില്‍നിന്ന് ഹോസ്റ്റ് ചെയ്യപ്പെട്ടിട്ടുള്ള ഡിജിറ്റല്‍ വിവരശേഖരങ്ങള്‍ വേണമെങ്കില്‍ അമേരിക്കന്‍ ഭരണകൂടത്തിന് എളുപ്പത്തില്‍ ശേഖരിയ്ക്കാവുന്നതേയുള്ളൂ. ലോകവ്യാപകമായുള്ള ഇന്റര്‍നെറ്റ് ഉപയോക്താക്കള്‍ അമേരിക്കന്‍ സെര്‍വ്വര്‍ സ്ഥാപനങ്ങളെ പൂര്‍ണ്ണമായും വിശ്വാസത്തിലെടുത്താണ് തങ്ങളുടെ ഡിജിറ്റല്‍ വിവരശേഖരങ്ങള്‍ അവരുടെ സെര്‍വറുകളില്‍ ഹോസ്റ്റ് ചെയ്യുന്നത്. അവയെല്ലാം പക്ഷേ അമേരിക്കന്‍ ഭരണകൂടത്തിന് ചോര്‍ത്തിനല്‍കുന്നതിലൂടെ അമേരിക്കന്‍ സെര്‍വര്‍ സ്ഥാപനങ്ങള്‍ അവരെ ആശ്രയിക്കുന്ന ഇന്റര്‍നെറ്റ് ഉപയോക്താക്കളോട് കടുത്ത വിശ്വാസവഞ്ചനയാണ് ചെയ്യുന്നത്.

സര്‍ക്കാര്‍ വെബ്ബ്‌സൈറ്റുളുടെ ഉടമ ആരാണ്?

കേരളത്തിലെ ചില പൊതുമേഖല സ്ഥാപനങ്ങളുടെ വെബ്ബ് സൈറ്റുകളുടെ പിന്നാമ്പുറ വിവരങ്ങള്‍ നോക്കുക. കേരള ടൂറിസം വകുപ്പ് വെബ് സൈറ്റി (keraltourism.org) ന്റെ അഡ്മിനിസ്‌ട്രേഷന്‍ ഇ-മെയില്‍ മേല്‍വിലാസം (admin e-mail) സൈറ്റ് വികസിപ്പിച്ചെടുത്ത് പരിപാലിച്ചുപോരുന്ന തിരുവനന്തപുരത്തെ ഇന്‍വിസ് മള്‍ട്ടിമീഡിയ (invis multimedia) എന്ന ഐടി സ്ഥാപനമാണ്. ടെക്‌നിക്കല്‍ രജിസ്‌ട്രേഷന്‍ അമേരിക്കയിലെ ഇലിനോയ്‌സിലെ വേല്‍ചാമി ശങ്കരലിംഗം എന്ന വ്യക്തിയുടെ പേരിലും! കേരള സര്‍ക്കാരിന്റെ ടൂറിസം വകുപ്പിന്റെ വെബ്ബ്‌സൈറ്റ് പൂര്‍ണ്ണമായും ഇപ്പറഞ്ഞ സ്വകാര്യ ഐടി സ്ഥാപനത്തിന്റെ പൂര്‍ണ്ണ നിയന്ത്രണത്തിലാ ണെന്നാണ് ഇതില്‍ നിന്ന് വ്യക്തമാക്കുന്നത്. 1998 മുതല്‍ ടൂറിസം വകുപ്പിന്റെ വെബ്ബ്‌സൈറ്റ് പരിപാലിക്കുന്നത് തങ്ങളാണെന്ന് ഈ സ്ഥാപനത്തിന്റെ വെബ്ബ്‌സൈറ്റ് പറയുന്നു. അതിന്റെ അര്‍ത്ഥം പൊതു ഖജനാവില്‍നിന്ന് പൈസ ചെലവഴിച്ച് നിര്‍മ്മിക്കപ്പെട്ട വെബ്ബ്‌സൈറ്റിന്റെ കണ്‍ട്രോള്‍ പാനലി (c-panel) ന്റെ യൂസര്‍ ഐഡിയും പാസ്‌വേര്‍ഡും (User Id and Password) ഈ സ്വകാര്യ സ്ഥാപനത്തിന്റെ കൈപിടിയിലാണെന്നാണ്. ചുരുക്കി പറഞ്ഞാല്‍ ടൂറിസം വകുപ്പിന്റെ ഡിജിറ്റല്‍ വിവരശേഖരങ്ങളില്‍ തിരുവനന്തപുരത്തെ ഇന്‍വിസ് ഐടി സ്ഥാപനത്തിന് യഥേഷ്ടം വിഹരിക്കാം.

ടൂറിസം വകുപ്പിന്റെ ഡിജിറ്റല്‍ സുരക്ഷയും സ്വകാര്യതയും (c-panel ലിന്റെ പൂര്‍ണ്ണ നിയന്ത്രണാധികാരമെന്നു കൂടി വായിക്കുക) ലോകാവസാനം വരെ ഈ സ്വകാര്യ സ്ഥാപനത്തിന്റെ കൈപ്പിടിയിലൊതുക്കി നിറുത്തുന്നു. വര്‍ഷാവര്‍ഷം വെബ്ബ്‌സൈറ്റ് പരിപാലനമെന്ന വകയില്‍ പൊതുഖജനാവിലെ ഗണ്യമായൊരു തുക കൃത്യമായി ഈ സ്വകാര്യ സ്ഥാപനത്തിന്റെ അക്കൗണ്ടിലെത്തുന്നു. ദീര്‍ഘകാല ബിസിനസ് താല്പര്യങ്ങള്‍ കൂടിയാണ് ഇവിടെ പരിരക്ഷിക്കപ്പെടുന്നത്. സി. പാനലിന്റെ യൂസര്‍ ഐഡിയും പാസ്‌വേര്‍ഡും ടൂറിസം വകുപ്പിന്റെ നിയന്ത്രണത്തിലാകാത്തിടത്തോളം കാലം ഈ അവസ്ഥ തുടരുക തന്നെ ചെയ്യും. സൈറ്റ് പരിപാലനം കുത്തകവല്‍ക്കരിക്കപ്പെടുമ്പോള്‍ വാര്‍ഷിക പരിപാലനത്തുക യഥേഷ്ടം വര്‍ദ്ധിപ്പിക്കുവാനുള്ള പൂര്‍ണ്ണ സ്വാതന്ത്ര്യം കൂടിയാണ് ഈ സ്ഥാപനത്തിന്റെ കൈയില്‍ ഭദ്രമാകുന്നത്. അതേസമയം ടൂറിസം വകുപ്പിന്റെ ഡിജിറ്റല്‍ ശേഖരങ്ങള്‍ ഒട്ടും സുഭദ്രമാകുന്നില്ലതാനും.

കേരള സര്‍ക്കാരിന്റെ ജനസേവ കേന്ദ്രങ്ങള്‍ക്കായി വികസിപ്പിച്ചെടുത്ത ഫ്രന്‍സ് (FRIENDS)(19)എന്ന സോഫ്റ്റ്‌വെയറിന്റെ ഉടമസ്ഥതയെപ്രതി മൈക്രോസോഫ്റ്റിന്റെ ഒരു ഉപസ്ഥാപനവും സര്‍ക്കാരും തമ്മിലുടലെടുത്ത കേസിന്റെ വിധി വിസ്മരിക്കരുത്. ഹൈക്കോടതിവിധി സര്‍ക്കാരിന്റെ ഉടമസ്ഥത ഉയര്‍ത്തിപ്പിടിക്കുന്നുണ്ട്. ഇത്തരത്തിലൊരു അനുകൂലവിധിയുണ്ടായിട്ടുപോലും സര്‍ക്കാര്‍ അര്‍ദ്ധ സര്‍ക്കാര്‍ സ്ഥാപനങ്ങളുടെ വെബ്‌സൈറ്റുകളുടെ ഉടമസ്ഥതയും നിയന്ത്രണവും സ്വകാര്യസ്ഥാപനങ്ങള്‍ക്ക് ലോകാവസാനംവരെ പതിച്ചുകൊടുക്കപ്പെട്ടതില്‍ അഴിമതിയുടെ സൂചന തള്ളിക്കളയാനാവില്ല.

കേരള സര്‍ക്കാരിന്റെ കൊച്ചിയിലെ ഇന്‍ഫോ പാര്‍ക്കിന്റെ (infopark.in) സ്ഥിതിയും വ്യത്യസ്തമാകുന്നില്ല. ഇതിന്റെ രജിസ്ട്രന്റ്, ടെക്‌നിക്കല്‍, അഡ്മിന്‍ ഇ- മെയിലുകള്‍ തിരുവനന്തപുരം ടെക്‌നോപാര്‍ക്കിലെ Calpine Solutions എന്ന സ്വകാര്യ കമ്പനിയിലെ ഒരു മാത്യൂസിന്റെ പേരിലാണ്. (mathews @calpineaech.com)(20). ഇന്‍ഫോപാര്‍ക്കിന്റെ ഡിജിറ്റല്‍ വിവര ശേഖരങ്ങള്‍ ഹോസ്റ്റ് ചെയ്യപ്പെട്ടിട്ടുള്ളത് കാലിഫോര്‍ണിയ ആസ്ഥാനമായുള്ള Global Technology & Solutions Inc എന്ന കമ്പനിയുടെ സെര്‍വറില്‍. തിരുവനന്തപുരം ടെക്‌നോ പാര്‍ക്കിന്റെ ഡിജിറ്റല്‍ വിവര ശേഖരങ്ങളും ഇതേ അമേരിക്കന്‍ സെര്‍വറില്‍ തന്നെ. ഇന്‍ഫോപാര്‍ക്കിന്റെ വെബ്ബ്‌സൈറ്റിന്റെ പരിപാലനം കാല്‍പിന്‍ സൊല്യൂഷന്റെ കൈപ്പിടിയിലാണെന്നു പറയുമ്പോള്‍ സൈറ്റിന്റെ സി-പാനലിന്റെ പൂര്‍ണ്ണ നിയന്ത്രണം ഈ സ്വകാര്യ ഐടി കമ്പനിക്ക് തന്നെ.

കാര്‍ഷിക ഗവേഷണ പദ്ധതികളേറെ നടക്കുന്ന കേരള കാര്‍ഷിക സര്‍വ്വകലാശാലയുടെ വെബ്ബ്‌സൈറ്റിലെ ഡിജിറ്റല്‍ വിവര ശേഖരങ്ങള്‍ ഹോസ്റ്റ് ചെയ്യപ്പെട്ടിട്ടുള്ളത് ഹോസ്റ്റ് ഗേറ്റര്‍ എന്ന അമേരിക്കന്‍ സെര്‍വ്വറിലാണ്. കേരളത്തിന്റെ ധാതുസമ്പത്തുക്കളുടെ ഖനനത്തിലും സംസ്കരണത്തിലും വ്യാപരിക്കുന്ന പൊതുമേഖല സ്ഥാപനമായ കേരള മിനറല്‍സ് ആന്റ് മെറ്റല്‍സ് (കെ.എം.എം.എല്‍) വെബ്‌സൈറ്റിലെ ( kmml.com ) ഡിജിറ്റല്‍ ശേഖരങ്ങള്‍ അമേരിക്കന്‍ കമ്പനിയായ ഐബിഎം നിയന്ത്രിത സെര്‍വറിലാണ്. കേരളത്തിന്റെ ഐടി അഭിമാന കേന്ദ്രങ്ങളെന്നറിയപ്പെടുന്ന ഇന്‍ഫോപാര്‍ക്കിന്റെയും ടെക്‌നോപാര്‍ക്കിന്റെയും പൊതുമേഖലാ സ്ഥാപനങ്ങളുടെയും ഡിജിറ്റല്‍ വിവര ശേഖരങ്ങള്‍ അമേരിക്കന്‍ സെര്‍വറുകളിലാണെന്നിരിക്കെ അവയുടെ സുരക്ഷയും സ്വകാര്യതയും ദുര്‍ബലാവസ്ഥയിലല്ലെന്ന് പറയാനാകില്ല, എഡ്വേര്‍ഡ് സ്‌നോഡന്റെ വെളിപ്പെടുത്തലിന്റെ പശ്ചാത്തലത്തില്‍.

ഐടിയുടെ ഇന്ത്യന്‍ അവസ്ഥ

ഐടി രംഗത്ത് സോഫ്റ്റ്‌വെയര്‍ ഗവേഷണവികസന (Research & Development -R&D) ത്തിന് പ്രത്യേകം ഊന്നല്‍ നല്‍കപ്പെടുന്നില്ല. ബിസിനസ്സ് പ്രോസസ്സിങ്ങ് ഔട്ട് സോഴ്‌സ്  എന്ന പേരിലറിയപ്പെടുന്ന പുറംകരാര്‍പണി മാത്രമാണ് ഫലത്തില്‍ രാജ്യത്തിന്റെ സൈബര്‍ രംഗം. മൈക്രസോഫ്റ്റ് വിന്‍ഡോസ്, ഒറാക്കിള്‍ ഡാറ്റാബയ്‌സ്, ജാവ തുടങ്ങിയ വിദേശ ഐടി കമ്പനികളുടെ സോഫ്റ്റ് വെയറുകള്‍ ഉപയോഗിക്കുവാനുള്ള ഫ്രണ്ട് എന്റ് അപ്ലിക്കേഷന്‍ (Front End Application) എഴുതിയുണ്ടാക്കുന്നതിലാണ് രാജ്യത്തെ ഐടി അധിഷ്ഠിത കമ്പനികളിലേറെയും വ്യാപരിക്കുന്നത്. ഇതുതന്നെ ലഭിക്കുന്നത് മറ്റു വിദേശ ഐടി കമ്പനികളില്‍ നിന്നുള്ള ഉപകരാറുകളായിട്ടാണ്. യഥാര്‍ത്ഥത്തില്‍ ബിപിഒ ഉപകേന്ദ്രങ്ങള്‍ മാത്രമാണ് ഇന്ത്യന്‍ ഐടി കമ്പനികളിലേറെയും.

വിദേശ ഐ.ടി കമ്പനികളുടെ ഐടി അധിഷ്ഠിത ഗുമസ്ത പണികളിലേര്‍പ്പെട്ടിരിക്കുന്ന കോള്‍ സെന്ററു (Call Centers) കളേയും രാജ്യത്തിന്റെ ഐടി വിപ്ലവപട്ടികയില്‍ കണ്ണിചേര്‍ത്തിയിരിക്കുന്നു! ഇന്ത്യയുടെ പരമ്പരാഗത സമ്പദ്‌വ്യവസ്ഥയുടെ നട്ടെല്ലാണ് കാര്‍ഷിക-വ്യാവസായിക ഉല്പാദന മേഖലകള്‍. മാറിയ സാമ്പത്തിക സാഹചര്യത്തില്‍ പക്ഷേ ഐടി സപ്പോര്‍ട്ട് സര്‍വ്വീസ് മേഖലകളില്‍ നിന്നും കോടികളുടെ വിദേശ നാണ്യം രാജ്യത്തേക്ക് ഒഴുകുന്നുണ്ട്. ഈ സേവന മേഖലയുടെ വരുമാനവുംകൂടി ഉള്‍പ്പെടുത്തിയതോടെയാണ് ഇന്ത്യയുടെ പുത്തന്‍ സമ്പദ്‌വ്യവസ്ഥ പിറവിയെടുക്കുന്നത്. ഇന്ത്യയുടെ ഐടി ലോകം സോഫ്റ്റുവെയര്‍ ഗവേഷണവികസന രംഗത്ത് തനത് സാന്നിദ്ധ്യം ഉറപ്പിക്കുന്നതിന് മുന്‍ഗണന നല്‍കി ആഭ്യന്തര ഐടി അധ്ഷ്ഠിത വിപണി സൃഷ്ടിക്കുന്നതില്‍ കാര്യമാത്രമായ ശ്രദ്ധ നല്‍കുന്നില്ല. അതുകൊണ്ടു തന്നെ ആഗോള സമ്പദ്‌വ്യവസ്ഥയുടെ ഉയര്‍ച്ചതാഴ്ചകള്‍ വിദേശ ബിപിഒയിലൂടെ ലഭ്യമാകുന്ന വിദേശ നാണ്യത്തെ ആശ്രയിക്കുന്ന ഇന്ത്യയുടെ പുത്തന്‍ സാമ്പത്തിക വ്യവസ്ഥയുടെ സ്ഥിരതയെ തന്നെ ആടിയുലക്കുന്നുണ്ടുതാനും.

ഇന്ത്യയുടെ ഭരണയന്ത്രം ഏറെകൂറെ ഇപ്പോള്‍ ഇ-വത്ക്കരിക്കപ്പെട്ടിരിക്കുന്നു (ഇ-ഗവേണന്‍സ്). അതേസമയം രാജ്യത്തിന്റെ ഇ-ഗവേണന്‍സ് പ്രക്രിയ മുഖ്യമായും ആശ്രയിക്കുന്നത് വിദേശ കുത്തക ഐടി കമ്പനികളുടെ സോഫ്റ്റുവെയറുകളെയാണ്. ഇതിനുപകരം ഇന്ത്യയുടെ സൈബര്‍ ലോകത്ത് നിന്നുതന്നെ രാജ്യത്തിന് ആവശ്യമായ ഇ-ഗവേണന്‍സ് അടക്കമുള്ള കമ്പ്യൂട്ടര്‍വത്കരണ പ്രക്രിയക്കാവശ്യമായി സോഫ്റ്റുവെയറുകള്‍ തദ്ദേശീയമായി വികസിപ്പിച്ചെടുക്കേണ്ടതുണ്ട്.

ഐടിരംഗത്ത് തനതായ ഓപ്പറേറ്റിങ്ങ് സിസ്റ്റമടക്കമുള്ള സോഫ്റ്റ്‌വെയറുകള്‍ ഗവേഷണത്തിലൂടെ വികസിപ്പിച്ചെടുക്കുന്നതില്‍ ഇന്ത്യ ഇനിയും ബഹുദൂരം മുന്നോട്ട് പോകേണ്ടതുണ്ട്. ഐടി വിസ്‌ഫോടനമെന്നത് അമേരിക്കപോലുള്ള രാഷ്ട്രങ്ങളിലെ ഐടി കമ്പനികളുടെ കമ്പ്യൂട്ടറധിഷ്ഠിത ഗുമസ്തപണിയായ ബിസിനസ്സ് ഔട്ട്്‌സോഴ്‌സിങ്ങ് മാത്രമാണെന്നത് തിരുത്തപ്പെടണം. വിവരസാങ്കേതികവിദ്യ സഹായക സര്‍വ്വീസ് (IT Enabled services) കള്‍ മാത്രമല്ല സോഫ്റ്റ് വെയര്‍-ഹാര്‍ഡ്‌വെയര്‍ വികസനവുമുള്‍ചേര്‍ന്നതാണ് ഐടി വ്യവസായ മേഖല.

രാജ്യത്തിന്റെ സമ്പുഷ്ഠമായ ഐടി മാനവ വിഭവശേഷി പരമാവധി പ്രയോജനപ്പെടുത്തുന്നതില്‍ പ്രതേ്യകം ശ്രദ്ധ ചെലുത്തിയിരുന്നുവെങ്കില്‍ രാജ്യത്ത് യഥാര്‍ത്ഥ ഐടി വിപ്ലവം സാധ്യമാക്കപ്പെടുമായിരുന്നു. മാത്രമല്ല ഭാരതീയ ഗണിത/ജാമ്യതീയ ശാസ്ത്ര തലത്തൊട്ടപ്പന്മാരായ ആര്യഭട്ടയുടേയും രാമാനുജത്തിന്റെയും പിന്‍തലമുറക്കാരെ വിദേശ ഐടി കമ്പനികളുടെ ഐടി അധിഷ്ഠിത പുറംകരാര്‍ ഗുമസ്ത പണിക്കാരാക്കി മാറ്റിയെടുത്ത പാതകത്തില്‍ നിന്നും രാജ്യത്തിന്റെ ഭരണാധികാരികള്‍ക്ക് തലയൂരാനാകുമായിരുന്നു.

ഇലക്‌ട്രോണിക് ഉല്പന്നങ്ങളുടെ സംഭരണം

രാജ്യത്തിന്റെ ടെലികമ്മ്യൂണിക്കേഷന്‍ഐടി മേഖലകള്‍ക്ക് ആവശ്യമായ ഹാര്‍ഡ്‌വെയര്‍ ഉള്‍പ്പെടെയുള്ള ഇലക്‌ട്രോണിക് ഉല്പന്നങ്ങള്‍ ആഭ്യന്തര വിപണിയില്‍ നിന്നുതന്നെ വാങ്ങണമെന്ന ‘ബൈ ഇന്ത്യ’ (Buy India) നയം കേന്ദ്ര സര്‍ക്കാര്‍ പിന്‍വലിച്ചിരിക്കുന്നു.(21) 2013 ഫെബ്രുവരിയില്‍ പ്രഖ്യാപിപ്പിക്കപ്പെട്ട നയം ജൂലായ് എട്ടിനാണ് പിന്‍വലിക്കപ്പെട്ടത്. യുഎസ്-ഇന്ത്യ ബിസിനസ്സ് കൗണ്‍സിലിന്റെ സമ്മര്‍ദ്ദഫലമായാണ് കേവലം അഞ്ചുമാസത്തിനുള്ളില്‍ തന്നെ കപില്‍ സിബിലിന്റെ കേന്ദ്ര ടെലികോം മന്ത്രാലയം രൂപംകൊടുത്ത ബൈ ഇന്ത്യാനയം പ്രധാനമന്ത്രി കാര്യായലത്തിന്റെ പ്രത്യേക നിര്‍ദ്ദേശ പ്രകാരം പിന്‍വലിക്കപ്പെട്ടത്. ഈ നയം രൂപപ്പെടുത്തിയുതന്നെ രാജ്യസുരക്ഷയെ കരുതിയാണ്. ഇത് മുഖവിലക്കെടുക്കുവാന്‍ തയ്യാറാകാതെ പ്രധാനമന്ത്രി കാര്യാലയം വിദേശ താല്പര്യസംരക്ഷണത്തിന് മുന്‍തൂക്കം നല്‍കുകയായിരുന്നു.

തുറന്ന ആഗോള വിപണി വ്യവസ്ഥയില്‍ വ്യക്തിഗത രാഷ്ട്രങ്ങളുടെ ഉല്പന്നള്‍ക്കും പ്രത്യേക സംരക്ഷണ (Protectionism-) മില്ലെന്ന സാമ്പത്തിക ഉദാരീകരണ മൗലികവാദിയായ ഇന്ത്യന്‍ പ്രധാനമന്ത്രി മന്‍മോഹന്‍ സിങ്ങിന്റെ ഇടപെടലിലൂടെ ബൈ ഇന്ത്യ നയം പിന്‍വലിക്കപ്പെട്ടില്ലെങ്കിലേ അതിശയമുള്ളൂ. അതേസമയം തങ്ങളുടെ ഐടി മേഖയിലെ തൊഴിലുകള്‍ ഇന്ത്യയടക്കമുള്ള രാജ്യങ്ങള്‍ക്ക് കരാര്‍ നല്‍കുന്നതില്‍ കടുത്ത നിയന്ത്രണം വേണമെന്ന പ്രൊട്ടെക്ഷനിസ്റ്റ് നിലപാടിലാണ് ഒബാമ ഭരണകൂടം. ഈ നിലപാടിനുനേരെ പക്ഷേ ഇന്ത്യന്‍ പ്രധാനമന്ത്രി കണ്ണടക്കുകയാണ്. ഇതിന് പിന്നില്‍ ഇന്ത്യന്‍ പ്രധാനമന്ത്രിയുടെ അമേരിക്കന്‍ വിധേയത്വമല്ലാതെ മറ്റെന്താണ്?Malayalam variks Cover 2013 aug 07

ഇന്ത്യയുടെ തന്ത്രപ്രധാനമായ സ്ഥാപനങ്ങളുടെ ഇ-വത്ക്കരണ പ്രക്രിയയും ദേശീയ ഇ-ഗവേണന്‍സും മൈക്രോസോഫ്റ്റ്, ഒറാക്കിള്‍, ജാവ തുടങ്ങിയ അമേരിക്കന്‍ ഐടി ഭീമന്മാരുടെ സോഫ്റ്റ്‌വെയറുകളെയാണ് മുഖ്യമായും ആശ്രയിക്കുന്നത്. രാജ്യത്തിന്റെ ഡിജിറ്റല്‍ ശേഖരങ്ങളില്‍ ഇപ്പറഞ്ഞ അമേരിക്കന്‍ ഐടി സ്ഥാപനങ്ങള്‍ക്ക് കടന്നുകയറുവാനുള്ള സാധ്യത ഇപ്പോഴേ ആവോളം തുറന്നിട്ടിട്ടുണ്ട്. ഇതിനുംപുറമേ അവരുടെ തന്നെ ഹാര്‍ഡ്‌വെയറുകളുടെ കൂടി ഉപയോഗം പതിന്മടങ്ങ് വര്‍ദ്ധിക്കുകയാണ്. ഇത് രാജ്യത്തിന്റെ ഡിജിറ്റല്‍ സുരക്ഷയും സ്വകാര്യതയും ഇനിയുമേറെ ദുര്‍ബലമാക്കപ്പെടുമെന്ന അവസ്ഥയായിരിക്കും ഫലത്തില്‍ സംജാതമാക്കുക. ഇത് അതീവ ഗൗരവത്തോടെ കാണാതെ പോകുന്നുവെങ്കില്‍ പെന്റഗണ്‍ ഇന്ത്യയുടെ ഡിജിറ്റല്‍ വിവര ശേഖരങ്ങള്‍ തീര്‍ത്തും അനായാസമായി ഇനിയും ആവശ്യാനുസരണം അമേരിക്കന്‍ ഐടി കമ്പനികളുടെ സഹായത്താല്‍ ചോര്‍ത്തിയെടുക്കും. ഇതോടൊപ്പം തന്നെ പ്രതിരോധ മേഖലയില്‍ വിദേശ നിേക്ഷപമുയര്‍ത്തുവാനുളള നീക്കവും രാജ്യത്തിന് ദോഷമാകാതിരിക്കില്ല.

കമ്പ്യൂട്ടര്‍ എമര്‍ജന്‍സി റസ്‌പോണ്‍സ് ടീം

ഇന്ത്യയുടെ ഡിജിറ്റല്‍ സുരക്ഷയും സ്വകാര്യതയും കാത്തുസൂക്ഷിക്കുന്നതിനും സൈബര്‍ ആക്രമണങ്ങളെ പ്രതിരോധിക്കുന്നതിനുമായി ഡോ. ഗുല്‍ഷന്‍റായ് ഡയറക്ടര്‍ ജനറലായുള്ള കമ്പ്യൂട്ടര്‍ എമര്‍ജന്‍സി ടീമിന് രാജ്യം രൂപം നല്‍കിയിട്ടുണ്ട്. രാജ്യത്തിന്റെ ഡിജിറ്റല്‍ ശേഖരങ്ങള്‍ കാത്തസൂക്ഷിക്കുന്നതില്‍ ഈ ടീം അതിദയനീയമായി പരാജയപ്പെട്ടിരിക്കുന്നുവെന്നതാണ് ഇന്ത്യന്‍ സൈബര്‍ ലോകത്തിനുമേലുള്ള മൈക്രോസോഫ്റ്റ് പോലുള്ള അമേരിക്കന്‍ ഐടി കമ്പനിയുടെ സഹകരണത്തോടെയുള്ള അമേരിക്കന്‍ സൈബര്‍ ആക്രമണം വെളിവാക്കുന്നത്.

ഇന്ത്യയുടെ ഡിജിറ്റല്‍ വിവരശേഖരങ്ങള്‍ കാത്തുസൂക്ഷിക്കാന്‍ ചുമതലയേല്‍പ്പിക്കപ്പെട്ടിട്ടുള്ള റസ്‌പോണ്‍സ് ടീമിന്റെ അംഗബലം കാര്‍ ഡ്രൈവറടക്കം കേവലം 31(21) പേര്‍ മാത്രമാണെന്ന് ഈ ടീമിന്റെ വെബ്‌സൈറ്റ് തന്നെ പറയുന്നു. 30+1 അംഗബലം കൊണ്ട് അമേരിക്കയടക്കമുള്ള ഡിജിറ്റല്‍ വിവരശേഖര കൊള്ളക്കാരെ രാജ്യത്തിന് പ്രതിരോധിക്കാനാകുമെന്ന് കരുതുന്നതില്‍ തന്നെ ഇന്ത്യന്‍ ഐടി വിപ്ലവത്തിന്റെ പൊള്ളത്തരവും പാപ്പരത്തവും പിടിപ്പുകേടും പ്രകടമാണ്. ഇപ്പോഴിതാ സ്വന്തമായി വികസിപ്പിച്ചെടുത്ത സോഫ്റ്റ്‌വെയറുകളിലെൂടെ പാക്കിസ്താനുപോലും നമ്മുടെ രാഷട്രപതി ഭവനില്‍ നിന്നുപോലും ഡിജിറ്റല്‍ വിവരശേഖരങ്ങള്‍ ചോര്‍ത്താമെന്ന അവസ്ഥയില്‍ രാജ്യത്തിന്റെ ഐടി ‘വിപ്ലവ’മെത്തിനില്‍ക്കുന്നു!!
footnotes

1. http://www.guardian.co.uk/world/2013/jun/06/obama-administration-nsa-verizon-records
2.http://www.guardian.co.uk/world/2013/jun/06/nsa-phone-records-verizon-court-order
3.http://www.guardian.co.uk/world/2013/jun/06/us-tech-giants-nsa-data
4.http://www.guardian.co.uk/world/2013/jun/08/nsa-boundless-informant-global-datamining
5.The Hindu 2013 July 03
6.goidirectory.nic.in/sector_index.php
7.http://abcnews.go.com/blogs/headlines/2013/07/edward-snowden-u-s-israel-co-wrote-cyber-super-weapon-stuxnet/
8.http://www.medianama.com/2013/06/223-indian-govt-called-out-by-human-rights-watch-on-cms-usa-collects-6-3-billion-data-from-india
9.http://toptenfamous.com/top-ten-hosting-provider-companies-in-us/
10.http://www.oecd.org/internet/ieconomy/43195291.pdf
11.http://www.oecd.org/futureinternet/40989438.pdf
12.http://international.abhinavjournal.com/images/Management_&_Technology/Mar13/13.pdf
13.Press Release No. 18/2013 Information Note to the Press 2013 march 15
14.http://articles.timesofindia.indiatimes.com/2013-06-04/internet/39739635_1_traffic-indian-mobile-data-internet-access
15.http://www.dukechronicle.com/articles/1996/10/04/former-nbc-president-promotes-electronic-republic
16.http://www.medianama.com/2013/06/223-indian-govt-called-out-by-human-rights-watch-on-cms-usa-collects-6-3-billion-data-from-india
17.http://beatthechip.blogspot.in/2010/06/cyber-security-digital-activism.html
18.Frios v/s state of Kerala, AIR 2006 ker 279,200693) KLT 210,207(34)PTC 98 ker
19. http://tools.whois.net/whoisbyip/
20.http://online.wsj.com/article/SB10001424127887323823004578593322244132636.html
21.http://deity.gov.in/content/indian-computer-emergency-response-team-cert